Exodo 25
25
Jini majtañʌl cha'an Tabernáculo
(Ex. 35.4-9)
1-2Lac Yum tsi' sube Moisés: Subeñob jini israelob cha'an mi' yʌq'ueñoñob c majtan. La' i yʌc'ob ti' yutslel i pusic'al majqui jach yom. Ch'ʌmbeñon tilel c majtan tac am bʌ ti ili lista: 3-7oro, plata, bronce, yʌjyʌx bʌ pisil, chʌccojan bʌ pisil, chʌchʌc pisil, lino pisil, chʌchʌc bʌ i pʌchʌlel i tat tiñʌme', i pʌchʌlel chivo, te' i c'aba' acacia*, i ya'lel olivo cha'an c'ajc, pom, xajlel i c'aba' ónice, yic'ot ujʌl cha'an mi' ts'istʌl ochel ti' bujc motomajob i c'aba' efod* yic'ot ti' majquil i bujc. 8Com mi' mel israelob jump'ejl Tabernáculo, jiñʌch ch'ujul bʌ otot cha'an mi cajñel yic'otob. 9Yom mi' melbeñoñob jini Tabernáculo ti pisil che' bajche' mi caj c tsictesan. Jiñʌch i planojlel jini pisil bʌ otot yic'ot i planojlel chuqui tac yom c'ʌñol cha'an jini Tabernáculo.
Jini Arca ba' mi' lojtel i T'an Dios
(Ex. 37.1-9)
10Yom mi la' c'ʌn acaciate' ti' melol Arca*. Yom i tamlel jump'ejl metro yic'ot junc'al centímetro, yic'ot 75 centímetro ti' xujc, yic'ot 75 centímetro i chanlel. 11Yom mi la' tep' ti puro oro ya' ti' mal yic'ot ti' pat. Yom mi la' wʌc' ti' joytʌlel i ti' ti'il i xujc tac, melbil bʌ ti puro oro ja'el. 12Yom mi la' mel ja'el chʌmp'ejl xotol tac bʌ oro cha'an ma' wʌc' ya' ti jujunwejl i xujc. Yom cha'p'ejl ti junwejl yic'ot yambʌ cha'p'ejl ti yambʌ junwejl i xujc. 13Yom mi la' mel bara tac ja'el melbil bʌ ti te' i c'aba' acacia. Yom mi la' tep' ti oro. 14Yom mi la' juc ochel jini bara tac ti jujunwejl i xujc jini Arca ba' an xotol tac melbil bʌ ti oro, cha'an mi la' q'uech majlel jini Arca baqui jach yom. 15Yom mi' cʌytʌl jini bara tac ya' ti jini xotol tac bʌ tsucu taq'uin. Mach yomic mi' loc'sʌntel. 16Jini T'an mu' bʌ caj cʌq'ueñet yom ma' wotsan ya' ti' mal jini Arca. 17Yom mi la' melben i majc jini Arca ya' ti' pam ba' mic ñusʌben i mul winicob x'ixicob. Yom i tamlel jump'ejl metro yic'ot junc'al centímetro. Yom i xujc 75 centímetro. Yom i chanlel 75 centímetro ja'el. 18Yom mi la' mel cha'tiquil i yejtal ángelob ti puro oro, melbil yom ti martillo. 19Yom mi la' wʌc' ti jujunwejl ya' ba' mi caj c ñusʌbeñob i mul jini winicob x'ixicob. 20Jini i yejtal jini ángelob tich'bil yom i wich' ya' ti' pam jini Arca. Jini i wutob yom mi' q'uelob ya' ba' mi caj c ñusʌbeñob i mul jini winicob x'ixicob.
21Yom ma' wʌq'uen i majc jini Arca ya' ti' pam. Mi caj a wotsan ti' mal jini Arca jini T'an mu' bʌ caj cʌq'ueñet. 22Mi caj lac taj lac bʌ ya'i. Mi caj lac tem cha'len t'an ya' ti' pam jini Ajñibʌl ba' mic ñusan mulil ya' ti' yojlil jini cha'tiquil i yejtal ángelob. Pejtelel jini t'an mu' bʌ caj c subeñet mi caj i yajñel ya' ti' mal Arca. Mi caj c subeñet pejtelel jini mandar tac yom bʌ mi' jac'ob jini israelob.
Jini mesa* cha'an waj
(Ex. 37.10-16)
23Yom mi la' mel jump'ejl mesa ti acaciate'. I tamlel yom jump'ejl metro. Yom ojlil metro i xujc. Yom 75 centímetro i chanlel. 24Yom mi la' tep' ti puro oro. Tep'bil yom ja'el ti' joytʌlel i xujc tac i ti' ti'il ti puro oro. 25Yom mi la' melben che' bajche' ojlil pach' c'ʌb i ñuclel i ch'ʌjlil i xujc tac jini mesa ti' joytʌlel. Mele ja'el yambʌ i ch'ʌjlil i ti' ti'il i xujc tac pero mero ch'o'ch'oc yom i ti'il ti oro. 26Yom mi la' mel chʌnxojt oro cha'an mi la' wʌc' ya' ti jujunwejl i xujc jini mesa. Yom junxojt ya' ti jujunts'ijt i yoc jini mesa am bʌ ti chan, mach ya'ic ti' yebal i yoc jini mesa. 27Jini xotol tac bʌ mi caj i yajñel ya' ti' xujc tac cha'an mi' mejlel ti ochel jini bara tac, cha'an ja'el mi' mejlel ti ch'ujyel majlel jini mesa. 28Yom mi la' c'ʌn acaciate' ti' melol jini bara tac. Tep'ela ti oro. 29Yom mi la' mel ti oro jini plato tac, yic'ot cuchara tac, yic'ot jara tac, yic'ot colem taza tac. Iliyi mi caj i c'ʌjñel cha'an lʌmʌl tac bʌ majtañʌl. 30Yom mi la' wʌc' jini pan ya' ti mesa cha'an mi' yajñel tic tojlel ti pejtelel ora.
Lámpara melbil bʌ ti oro
(Ex. 37.17-24)
31Yom mi la' mel ja'el jump'ejl lámpara* ba' mi' ts'ʌjbel c'ajc, yom melol ti puro oro. Yom mi la' mel ti martillo i c'ʌclib yic'ot i te'el. Melbil yom ti martillo ja'el i copa tac yic'ot i ch'ʌjlil tac. Junxojt jach jini oro mi caj i mejlel ti' pejtelel. 32-33Yom wʌcts'ijt i c'ʌb i te'el jini c'ajc tac, uxts'ijt i c'ʌb ti jujunwejl i te'el. Yom uxp'ejl i ch'ʌjlil lajal bajche' i nich jini almendro* ti jujunts'ijt i c'ʌb. Ti jujump'ejl i ch'ʌjlil yom an che' bajche' i yutbal i nich pimel. 34-35Ya' ti' te'el i buchlib c'ajc yom ch'ʌmp'ejl copa che' lajal bajche' i nich almendro, ya' ti' xʌc' tac. Che' ja'el yom jump'ejl che' bajche' i nich pimel ya' ti' ni' tac i c'ʌb yic'ot ya' ti yebal tac i c'ʌb. 36Pejtelel i yutbal tac yic'ot i c'ʌb tac, yic'ot i te'el, yom melol ti junq'uejl jach oro jats'bil ti martillo. 37Che' ja'el yom mi la' mel wucp'ejl ba' mi' tsujq'uel jini c'ajc, cha'an mi la' tsuc' cha'an mi' pʌs i c'ʌc'al ti' tojlel la' wut. 38Jini mu' bʌ la' c'ʌn cha'an mi la' yʌp jini c'ajc yic'ot i yajñib i tʌñʌl jini c'ajc melbil yom ti puro oro. 39Yom mi la' c'ʌn lujump'ejl i yuxc'al (50) kilo puro oro cha'an pejtelel mu' bʌ i c'ʌjñel cha'an ba' mi' ts'ʌjbel jini c'ajc. 40Wen q'uele bajche' yilal wolic pʌsbeñet cha'an che'i mi la' mel pejtelel che' bajche' wolic pʌsbeñet ila ti wits. Che' tsi' yʌlʌ lac Yum.
Currently Selected:
Exodo 25: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
