Exodo 23
23
Jini wen tac bʌ
1Mach ma' p'ojlesan t'an che' mach a wujilic mi isujm. Mach ma' cha'len lot cha'an ma' mucben i mul xjontolil. 2Anquese cabʌlob mu' bʌ i cha'leñob jontolil, mach ma' tsajcañob majlel ti jontolil. Mach ma' cha'len lot ti' tojlel am bʌ i ye'tel cha'an ma' taj a c'uxbintel ti' tojlel a pi'ʌlob. 3Mi an i mul juntiquil pobre bʌ, mux i toj anquese ma'anic i chubʌ'an. Mach jelchojquic jach mi caj a c'uxbin.
4Che' ma' tajben i yʌlac' a contra che' sajtem, yom ma' cha' pʌsben i yum. 5Mi tsa' taja burro tsa' bʌ yajli yic'ot i cuch, mach ma' to'ol ñusan. Anquese i cha'an a contra mu' bʌ i ts'a'leñet, yom ma' coltan.
6Mach ma' coltan jini rico ti' contra jini pobre, come che' jini mi' sojquel meloñel. 7Mach ma' jop'ben i mul yambʌ. Mach ma' wʌc' ti tsʌnsʌntel jini mach bʌ anic i mul, come ma'anic mi caj c ñusʌbeñet a mul che' jini. 8Mach ma' mucul ch'ʌm a majtan, come che' mi' ch'ʌm i majtan jini am bʌ i ña'tʌbal, mi' jac' i lotintel. Che' jini, mi' yubin wocol jini toj bʌ winic ti' tojlel xmeloñel.
9Mach yomic ma' tic'lan jini ch'oyol bʌ ti yambʌ lum. La' wujil bajche' yubil che' añetla ti yambʌ lum, come tsa' ajniyetla ti Egipto.
I wucp'ejlel jab yic'ot i wucp'ejlel q'uin
10Wʌcp'ejl jab mi caj la' cha'len pac' yic'ot c'ajbal ila ti lum. 11Che' tsa'ix ts'ʌctiyi wʌcp'ejl jab yom ma' poj aq'uen i c'aj i yo jini lum jump'ejl jab. Jini a pʌc'ʌb mu' bʌ i yʌc' i wut la' i c'uxob jini p'ump'uño' bʌ. Mi tsa' to cʌle la' i c'ux bʌte'el. Che'ʌch yom mi' yujtel ja'el ti a ts'usubil yic'ot olivojil. 12Wʌcp'ejl q'uin mi caj a cha'len e'tel. Ti wucp'ejlel q'uin mi caj a c'aj a wo yic'ot a wacax yic'ot a burro. Che' jini mi mejlel i c'aj i yo i yalobil xe'tel a cha'an yic'ot a jula' ch'oyol bʌ ti yambʌ lum. 13Ch'ʌmʌla ti la' wenta pejtelel chuqui tsac subeyetla. Mach la' pejcan dioste' tac. Mach yomic mi' yubintel i c'aba' dioste' tac ti la' tojlel.
Jini uxp'ejl q'uiñijel ti jujump'ejl jab
(Ex. 34.18-26; Dt. 16.1-17)
14Uxyajl mi caj la' melbeñon q'uiñijel ti jujump'ejl jab. 15Yom mi la' mel jini q'uiñijel cha'an waj mach bʌ anic i levadurajlel. Wucp'ejl q'uin mi caj la' c'ux waj mach bʌ anic i levadurajlel che' bajche' tsac subeyetla ti mandar. Yom mi la' mel jini q'uiñijel che' ti marzo, come ti ili ora tsa' loq'uiyetla ti Egipto. Ti jujuntiquiletla yom mi la' wʌq'ueñon c majtan. 16An i q'uiñilel c'ajbal ja'el che' mi la' wʌq'ueñon ñaxan bʌ i wut pʌc'ʌbʌl. Che' ti' jilibal jujump'ejl jab an q'uiñijel ja'el cha'an i wut pejtelel pʌc'ʌbʌl, che' bʌ tsa'ix la' tuc'u ochel pejtelel i wut pʌc'ʌbʌl. 17Uxyajl ti jujump'ejl jab wersa mi la' pʌs la' bʌ tic tojlel ti la' pejtelel.
18Mach mejlic la' wʌq'ueñon i ch'ich'el c majtan yic'ot waj am bʌ i levadurajlel. I lewil jini we'elʌl mach mejlic la' lot c'ʌlʌl che' ti sʌc'ajel. 19Yom mi la' tuc' ochel ti cotot jini ñaxan bʌ i wut la' pʌc'ʌb, jini yajcʌbil bʌ. Mach mejlic la' ch'ʌx alʌ tiñʌme' mi chivo ti' ya'lel i chu' i ña'.
Tsa' chojqui tilel i yAngel lac Yum cha'an mi' pʌy majlel israelob
20Awilan wolic chocbeñetla majlel jini cAngel ti la' tojlel cha'an mi' cʌntañetla majlel. Mi caj i pʌyetla majlel ti la' wajñib chajpʌbil bʌ c cha'an. 21P'isi ti la' wenta. Jac'benla i t'an. Mach la' ñusʌben i t'an, come ma'anic mi caj i ñusʌbeñet la' mul. Mi caj c tsictesan c bʌ ti la' tojlel quic'ot cAngel. 22Mi uts'at mi la' jac'ben i t'an, cha'an mi la' mel che' bajche' tsi' subeyetla, mi caj j contrajin la' contrajob. Mi caj c tic'lan jini mu' bʌ i tic'lañetla.
23Come jini cAngel ñaxan mi caj i majlel ti' tojel la' wut cha'an mi' pʌyetla majlel ti' lumal amorreojob yic'ot heteojob yic'ot ferezeojob yic'ot cananeojob yic'ot heveojob yic'ot jebuseojob. Mi caj c jisañob ti pejtelel. 24Mach yomic mi la' ch'ujutesan i dioste' tac. Mach yomic mi la' cha'libeñob i ye'tel. Mach yomic mi la' mel che' bajche' i melbalob. Yom mi la' jisañob ti pejtelelob. Yom mi la' jem pejtelel i dioste' tac. 25Joñon a Yumon a Dioson. Yom mi la' melbeñon que'tel. Mi caj cʌq'ueñetla cabʌl i bʌl la' ñʌc yic'ot ja'. Mi caj c lajmesʌbeñetla la' c'amʌjel. 26Ma'anic mi caj i puts'el i yalobil mi juntiquilic x'ixic. Mux i cʌntañob i yalobilob pejtelel x'ixicob. Mi caj c ts'ʌctesan la' jabilel. 27Mi caj c bʌc'tesan la' contrajob. Mi caj i toj sajtelob i pusic'al pejtelel winicob x'ixicob ba' mi caj la' c'otel. Mi caj c puts'tesan pejtelel la' contrajob. 28Mi caj c choc tilel jini bʌbʌq'uen bʌ lajal bʌ bajche' xux ti' tojlel la' contrajob. Mi caj i puts'elob loq'uel ti la' tojlel jini heveojob yic'ot cananeojob yic'ot heteojob. 29Ma'anic mi caj c chocob loq'uel ti la' tojlel ti jump'ejl jach jab cha'an jochol mi' cʌytʌl jini lum, ame che'ic mi' wen p'ojlel jini bʌte'el ti jamil. 30C'unte' jach mi caj c choc loq'uel ti la' tojlel, jinto mi la' wen p'ojlel cha'an mi la' ch'ʌm ti la' wenta jini lum.
31Ya' jaxʌl la' lum ti Chʌchʌc bʌ Najb, yic'ot ya' ti colem ñajb ba'an filisteojob, yic'ot ba'an tiquin bʌ lum c'ʌlʌl ti colem ja' i c'aba' Eufrates, come mi caj cʌc' ti la' wenta pejtelel winicob x'ixicob año' bʌ ti jini lum. Jatetla mi caj la' chocob loq'uel. 32Mach mi la' mel trato yic'otob. Mach yomic mi la' pejcan i dioste' tac. 33Mach yomic temel mi' yajñelob la' wic'ot ti la' lumal, ame mi' pʌyetob ti mulil tij contra. Mi mux la' ch'ujutesan i dioste' tac, mi caj la' yajlel ti' p'ʌtʌlel cha'an mi la' cʌyon”, che'en.
Currently Selected:
Exodo 23: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
