Exodo 22
22
Mandar tac cha'an mi laj q'uextan lac bet
1Majqui jach mi' xujch'in mi wacax mi tiñʌme', mi tsi' tsʌnsa, mi tsi' choño, wersa mi' q'uextʌben i yum jo'cojt wacax mi chʌncojt tiñʌme'. 2Che' mi' tajtʌl xujch' woli bʌ i yochel ti' yotot yambʌ winic che' ñup'ul otot, mi tsa' lojwi, mi tsa' chʌmi, ma'anic i mul jini tsa' bʌ i lowo. 3Mi tsa' ujti che' ti q'uiñil an i mul jini mu' bʌ i tsʌnsan. Che' mi' tajtʌl xujch' mi caj i sutq'uin jini tsa' bʌ i ch'ʌmʌ. Mi mach mejlic, mi caj i chojñel ti to'ol e'tel cha'an mi' tojbentel i yum. 4Mi tsa' tajle yic'ot i xujch' mi cuxul to jini wacax, mi burro, mi tiñʌme', cha'yajl mi caj i tojben i yum. 5Majqui jach mi' yotsan i yʌlac' ti buc'bal mi ti jamil mi ti ts'usubil ti' tojlel i pi'ʌl, mi tsi' colo ti xʌmbal i yʌlac', wersa mi caj i toj. Mi caj i yʌq'uen i pi'ʌl i q'uexol pejtel chuqui tsi' jisa.
6Mi an majqui mi' pul cholel, mi tsa' c'axi c'ajc ti' lum yambʌ winic, mi tsa' puli jini much'quibil bʌ jam am bʌ i wut yic'ot jini wa'al to bʌ jam, wersa mi caj i toj.
7Che' an chuqui ma' wʌq'uen a pi'ʌl cha'an mi' cʌntʌbeñet mi taq'uin mi a wʌlac', mi tsa' xujch'ibenti loq'uel ya' ba' lotol, mi tsa' tajle jini xujch', wersa mi' toj cha'yajl. 8Mi ma'anic tsa' tajle jini xujch' wersa mi' pʌjyel majlel a pi'ʌl ba' mi' cha'leñob meloñel cha'an mi' tsictiyel mi jini tsi' ch'ʌmʌ.
9Che' an chuqui sajtem, mi wacax, mi burro, mi tiñʌme', mi pisil, mi yambʌ, mi tsi' cha' taja i yum che' ya'an yic'ot yambʌ winic mach bʌ yomic i sutq'uiben, che' jini mi caj i majlelob jini cha'tiquilob ba' mi' melob i bʌ. Jini tsa' bʌ tajle i mul ti' tojlel xmeloñel mi caj i q'uextʌben cha'yajl.
10Che' an chuqui ma' wʌq'uen yambʌ winic cha'an mi' cʌntʌbeñet, mi burro mi wacax mi tiñʌme' mi alʌc'ʌl, mi tsa' chʌmi, mi tsa' lojwi, mi tsa' sajti che' ma'anic majqui woli' q'uel, 11wersa mi la' majlel la' mel la' bʌ ba' mi' yujtel meloñel cha'an mi' tsictiyel mi tsi' chilbeyet a chubʌ'an. Mi ma'anic tsi xujch'i, la' i sub ti' tojlel Dios. Wersa mi caj a ñopben i t'an. Ma'anic mi caj i yʌq'ueñet i tojol. 12Pero mi tsi' xujch'i jini alʌc'ʌl, wersa mi caj i yʌq'ueñet i tojol. 13Mi tsi' c'uxu bʌte'el, la' i ch'ʌmbeñet tilel i colojbal cha'an mi' tsictesan. Che' jini ma'anic mi caj i toj.
14Majqui jach mi' majñan alʌc'ʌl ti' tojlel i pi'ʌl, wersa mi caj i tojben i yum mi tsa' lojwi, o mi tsa' chʌmi che' mach ya'ic an i yum. 15Mi ya'ʌch an i yum alʌc'ʌl, ma'anic mi caj i toj. Che' ja'el mi tsi' yʌq'ue taq'uin cha'an mi' poj c'ʌn ti e'tel, jasʌl jach.
Bajche' yom mi laj q'uel lac pi'ʌlob
16Mi an juntiquil winic mu' bʌ i lotin xch'oc, mi tsa' wʌyi yic'ot, wersa mi caj i yʌc' i tojol ñujpuñijel. Wersa mi caj i pʌy cha'an i yijñam anquese ma'anic tsi' c'ajti. 17Mi mach yomic i sijin i tat jini xch'oc, mux i to'ol toj ñujpunijel jini winic.
18Yom mi' tsʌnsʌntel xwujt. 19Mi an mu' bʌ i pi'len alʌc'ʌl wersa mi' tsʌnsʌntel. 20Wersa mi' tsʌnsʌntel jini mu' bʌ i yʌq'uen i majtan dioste'. Cojach lac Yum mi' yʌq'uentel i majtan.
21Mach ma' lotin jini mach bʌ a pi'ʌlic ch'oyol bʌ ti yambʌ lum, come parte ba' ch'oyoletla che' bʌ ya' añetla ti Egipto. 22Mach mi la' tic'lan meba' x'ixic yic'ot meba' alʌl. 23Mi tsa' la' tic'la, mi c'am tsi' pejcayon, mi caj cubiben i t'an. 24Mi caj c wen mich'an, mi caj c tsʌnsañetla ti espada. La' wijñam yic'ot la' walobilob mi caj i yochelob ti meba'.
25Che' ma' wʌq'ueñob taq'uin ti majan c cha'año' bʌ cha'an pobrejob, mach ma' ch'ʌmben i jol che' bajche' xp'ojlesa taq'uiñob. 26Mi tsa' ch'ʌmbe i pislel jini p'ump'un bʌ i wenta prenda, yom ma' cha' aq'uen che' mi' yic'an. 27Come jini pisil lʌpbil bʌ i cha'an jiñʌch i mosil che' ti ac'ʌlel. Mi ma'anic ma' sutq'uiben, ¿bajche' mi' caj ti wʌyel? Che' c'am mi' pejcañon mi caj cubiben i t'an, come cujil c'uxbiya.
28Mach ma' p'aj Dios mi jinic am bʌ i ye'tel. 29Che' i yorajlelix c'ajbal mach mi' jal'an c majtan mu' bʌ caj a wʌq'ueñon, i diezmojlel tac pejtel i wut lum. Aq'ueñon ja'el jini ascuñʌl bʌ a walobilob. 30Aq'ueñon ja'el i yʌx'al a wacax yic'ot a tiñʌme'. Wucp'ejl q'uin mi' cʌytʌl yic'ot i ña'. Ti waxʌcp'ejlel q'uin mi caj a wʌq'ueñon.
31Yom mi la' wajñel ti ch'ujul. Mi tsi' c'uxu a wʌlac' jini bʌte'el mach mi la' c'ux i colojbal i we'el che' mi la' taj ti jamil. Yom mi la' chocben ts'i'.
Currently Selected:
Exodo 22: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
