Exodo 20
20
Jini lujump'ejl mandar
(Dt. 5.1-21)
1-2Dios tsi' subu pejtel ili t'an: Joñon a Yumon a Dioson. Tsac pʌyʌyet loq'uel ti' lumal egiptojob, ya' ba' chucbilet ti majtan e'tel. 3Mach a ñop yambʌ dios. Yom jach ma' ñopon. 4Mach a bajñel mel a dios tac, mi i yejtal winic mi i yejtal bʌte'el am bʌ ti pañimil mi i yejtal mut am bʌ ti chan, mi i yejtal chʌy am bʌ ti ja'. 5Mach a c'uchchocon a bʌ ti' tojlelob. Mach a diosiñob, come a Yumon a Dioson. Joñon jach a Dioson. Cujil mich'ajel che' ma'anic j c'uxbintel. Mi cʌq'ueñob i toj i mul winicob x'ixicob yic'ot i yalobilob c'ʌlʌl ti' yuxlajmlel yic'ot ti' chʌnlajmlel i yalobilob jini mu' bʌ i ts'a'leñoñob. 6Mic pʌsbeñob i yutslel c pusic'al bajc'ʌlob mu' bʌ i c'uxbiñoñob mu' bʌ i jac'beñon c mandar.
7Mach a lon tajben i c'aba' a Yum a Dios, come a Yum ma'anic mi caj i ñusʌben i mul jini mu' bʌ i lon tajben i c'aba'. 8Yom ma' chʌn p'is ti a wenta i yorajlel c'aj o. Yom ma' q'uel ti ch'ujul jini q'uin. 9Wʌcp'ejl q'uin yom ma' cha'len e'tel yic'ot pejtel chuqui yom melol. 10I wucp'ejlel q'uin i yorajlelʌch c'aj o cha'an a Yum Dios. Ti ili q'uin mach a wis cha'len e'tel, mi jatet, mi ch'iton bʌ a walobil, mi xch'oc bʌ a walobil, mi a winic, mi a criada, mi a wʌlac' mi jini am bʌ ti a tojlel mach bʌ a pi'ʌlic, 11come ti wʌcp'ejl q'uin a Yum tsi' mele panchan yic'ot pañimil, jini ñajb, yic'ot pejtel i bʌl. Tsi' c'aja i yo che' ti wucp'ejlel q'uin. Jini cha'an a Yum tsi' yʌlʌ uts'at i q'uiñilel c'aj o. Tsi' q'uele ti ch'ujul.
12C'uxbin a tat a ña' cha'an ma' jalijel ti jini lum tsa' bʌ i yʌq'ueyet a Yum Dios. 13Mach a cha'len tsʌnsa. 14Mach a cha'len ts'i'lel. 15Mach a cha'len xujch'. 16Mach a cha'len jop't'an ti' contra a pi'ʌl. 17Mach a mulʌben i yotot a pi'ʌl, mi i yijñam mi i winic, mi i criada, mi i wacax, mi i burro, mi yambʌ chuqui tac an i cha'an. Che' tsi' yʌlʌ Dios.
Jini winicob x'ixicob tsi' wen cha'leyob bʌq'uen
(Dt. 5.22-33)
18Pejtelel winicob x'ixicob tsi' q'ueleyob i xu'il chajc. Tomocña woli ti letsel i buts'il jini wits. Tsi' yubiyob i t'an chajc yic'ot i t'an trompeta. Tsiltsilñayob ti bʌq'uen che' bʌ tsi' q'ueleyob. Tsi' tʌts'ʌyob i bʌ. Ñajt tsa' wa'leyob. 19Tsi' subeyob Moisés: Pejcañon lojon, mi caj c ñich'tʌbeñet a t'an. Pero mach comic mi' pejcañon lojon Dios ame chʌmicon lojon, che'ob. 20Moisés tsi' jac'beyob: Mach la' cha'len bʌq'uen. Tsa' tili Dios cha'an mi' q'uel la' pusic'al. Yom mi la' bʌc'ñan Dios cha'an ma'anic mi la' cha'len mulil, che'en. 21Ñajt tsa' wa'leyob winicob x'ixicob. Moisés tsa' majli ba'an Dios ya' ba'an ic'ch'ipan bʌ.
Mandar cha'an pulʌntib
22Lac Yum tsi' sube Moisés: Suben israelob: “Tsa'ix la' wubi che' bʌ tsac pejcayetla wʌ' ti panchan. 23Mach la' mel la' dios tac mi ti plata mi ti oro. 24Yom mi la' melbeñon pulʌntib ti pajc'. Ya' yom mi la' pulbeñon jini tsʌnsʌbil bʌ c majtan, yic'ot c majtan cha'an wocolix cʌlʌ yic'ot tiñʌme' yic'ot wacax. Ya' jach yom ba' mi cʌc' j C'aba' cha'an mic ña'tʌntel. Che' jini mi caj c tilel ba' añetla cha'an mi cʌq'ueñetla i tijicñʌyel la' pusic'al. 25Mi la' wom la melbeñon pulʌntib ti xajlel, mach mi la' tsep ti e'tʌjibʌl, come che' jini bibi' mij q'uel. 26Mach mi la' melben i quejb tac pulʌntib ame mi' tsictiyel i mal la' bujc”, che'en.
Currently Selected:
Exodo 20: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
