Exodo 19
19
Jini israelob ya' ti Sinaí
1Che' loq'uemobix israelob ti Egipto, che' ti' yuxp'ejlel uw ti jini ñaxan bʌ tsic, tsa' c'otiyob ya' ti colem bʌ i tiquiñal lum i c'aba' Sinaí. 2Tsa' loq'uiyob ti Refidim, tsa' majliyob ti colem bʌ i tiquiñal lum i c'aba' Sinaí. Tsa' jijliyob ti tiquin bʌ lum ya' ti' tojel wits. 3Moisés tsa' letsi ti wits cha'an mi' taj Dios.
Lac Yum tsi' pejca ya' ti wits. Tsi' yʌlʌ: Subeñob i p'olbal Jacob, jini israelob: 4“Tsa'ix la' q'uele chuqui tsac tumbeyob egiptojob. Tsac pʌyʌyetla tilel che' bajche' ti' wich' xiye' cha'an mi la' ñochtañon. 5Mi xuc'ul mi la ñich'tʌbeñon c t'an, mi uts'at mi la' jac' jini xuc'ul bʌ c t'an, mi caj la' wochel tic cha'an ti' tojlel pejtelel colem tejclum tac, come c cha'añʌch pejtelel pañimil. 6Mi caj la' wochel ti motomaj yic'ot ti ch'ujul. Mi caj la' yumʌntel”. Jiñʌch mu' bʌ caj a cha' subeñob israelob, che'en lac Yum.
7Jini cha'an tsa' tili Moisés i pʌy ñoxobix bʌ israelob. Tsa' caji i tsictesʌbeñob pejtel ili t'an tsa' bʌ i yʌlʌ lac Yum ti mandar. 8Comol tsi' jac'ʌyob pejtel winicob x'ixicob: Mi caj c mel lojon che' bajche' tsi' yʌlʌ lac Yum, che'ob. Moisés tsi' cha' sube lac Yum chuqui tsi' yʌlʌyob. 9Lac Yum tsi' sube: Awilan, talon ba' añet ti i'ic' bʌ tocal, cha'an mi' yubiñob jini israelob che' mic pejcañet, cha'an mi' q'ueletob ti ñuc ti pejtelel ora. 10Cucu subeñob, la' i wʌn chajpañob i bʌ wʌle yic'ot ijc'ʌl. La' i wuts'ob i pislel. 11Yom chajpʌbilobix chabi. Come chabi lac Yum mi caj i jubel ya' ti Sinaí ti' tojel pejtelel winicob x'ixicob. 12Mi caj a mel mojon tac ya' ti' joytilel jini wits cha'an mach mi' ñumelob. Subeñob: “Chʌcʌ q'uele la' bʌ cha'an ma'anic mi la' letsel ti wits. Mach yomic ja'el mi la' tʌl jini wits. Majqui jach mi' tʌl jini wits wersa mi caj i chʌmel. 13Mi caj la' jul ti xajlel jini am bʌ i mul, pero mach yomic mi la' tʌl. Mi tsa' letsi ti wits i bʌte'el mi caj la' jul ti jalʌjb. Mach mejlix i chʌn cuxtiyel”. Che' yom ma' subeñob. Che' mi' yubintel c'am bʌ i t'an trompeta, mi caj i ñochtañob ili wits, che'en lac Yum.
14Moisés tsa' jubi ti wits cha'an mi' subeñob. Tsi' yʌc'ʌyob ti' wenta Dios. Tsi' wuts'uyob i pislel. 15Moisés tsi' subeyob: Yom chajpʌbiletix la chabi. Mach yomic mi la' ñochtan x'ixicob, che'en.
16Che' ti sʌc'ajel ti' yuxp'ejlel q'uin tsa' caji ti tojmel tac chajc. An i xu'il tac chajc yic'ot i'ic' bʌ tocal ya' ti wits, yic'ot c'am bʌ i t'an trompeta. Tsiltsilñayob ti bʌq'uen pejtelel winicob x'ixicob ya' ti xchumtʌl. 17Moisés tsi' pʌyʌyob loq'uel ba' jijlemob cha'an mi' tajob Dios. Ya' tsa' cʌleyob ti yebal wits. 18Tsa' joy ic'a ti buts' jini Sinaí wits, come lac Yum tsa' jubi tilel ti pam wits ti c'ajc. Jini buts' tomocña tsa' letsi che' bajche' i buts'il horno. Tsiltsilñayob ti bʌq'uen pejtelel winicob x'ixicob. 19Tsa' bej caji ti c'am bʌ t'an trompeta. Moisés tsi' cha'le t'an. Dios tsi' jac'ʌ yic'ot i t'an chajc. 20Tsa' jubi tilel lac Yum ti' pam Sinaí wits. Lac Yum tsi' pʌyʌ letsel Moisés ya' ti pam wits. Che' bʌ tsa' letsi Moisés, lac Yum tsi' sube: 21Yom ma' cha' jubel cha'an ma' wʌq'ueñob mandar a pi'ʌlob, cha'an mach mi' ñumelob ba'an mojon tac cha'an mi' q'ueloñob, ame chʌmicob cabʌlob. 22La' ajnicob ti ch'ujul jini motomajob mu' bʌ caj i lʌc'tesañob ame mij contrajiñob.
23Moisés tsi' sube lac Yum: Mach mejlicob ti letsel ti Sinaí wits come tic'bilob. Tsa' subeyon cha'an mi cʌq'uen i mojonlel tac ili wits, cha'an mi' q'uejlel ti ch'ujul, che'en Moisés. 24Lac Yum tsi' sube: Yom ma' cha' jubel. Pʌyʌ letsel Aarón awic'ot. Pero subeñob jini motomajob yic'ot winicob x'ixicob mach yomic mi' c'axelob ba'an mojon tac cha'an mi' tilelob ba' añon, ame mij contrajiñob, che'en lac Yum. 25Jini cha'an Moisés tsa' majli i subeñob winicob x'ixicob che' bajche' tsi' yʌlʌ Dios.
Currently Selected:
Exodo 19: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
