Exodo 18
18
Jetro tsi' jula'ta Moisés
1Jetro, jini motomaj ya' ti Madián, i ñij'al Moisés, tsi' yubi pejtelel jini ñuc tac bʌ tsa' bʌ i mele Dios cha'an mi' coltan Moisés yic'ot i cha'año' bʌ che' bʌ tsi' pʌyʌyob loq'uel ti Egipto. 2Jetro, i nij'al Moisés, tsi' cha' pʌybe tilel Séfora, i yijñam Moisés, come Moisés tsi' sube sujtel ti' yotot ya' ti Madián che' ya' to añob ti Egipto. 3An cha'tiquil ch'iton bʌ i yalobilob. I c'aba' juntiquil jiñʌch Gersón: “Ch'oyol ti ñajtʌl”, come Moisés tsi' yʌlʌ: Xñumelon ti pañimil, mach c lumalic, che'en. 4I c'aba' yambʌ jiñʌch Eliezer, “Dios mi' coltañon”, come tsi' coltayon che' bʌbʌq'uen mi' tsʌnsañon ti espada Faraón, che'en. 5Jetro i nij'al Moisés, tsa' c'oti ba'an Moisés ya' ti colem bʌ i tiquiñal lum. Tsi' pʌybe tilel i yijñam yic'ot i yalobilob, ba' woli' jijlelob israelob ba'an i wits Dios. 6Tsa' subenti Moisés: Julemix Jetro a nij'al yic'ot a wijñam yic'ot cha'tiquil ch'iton bʌ a walobilob. Tsi' chocbeyet tilel t'an. 7Moisés tsa' majli i taj i nij'al. Tsi' c'uchchoco i bʌ. Tsi' ts'ujts'ube i c'ʌb. Tsi' c'ajtibeyob i bʌ bajche' añob. Tsa' tem ochiyob ti otot. 8Moisés tsi' tsictesʌbe i nij'al pejtelel tsa' bʌ i mele lac Yum ti' tojlel Faraón yic'ot ti' tojlel egiptojob cha'an i c'uxbintel israelob. Tsi' tsictesʌbe ja'el bajche' tsi' coltayob lac Yum ti pejtelel jini wocol tac bʌ tsa' bʌ i yubiyob ti bij.
9Wen tijicña tsi' yubi Jetro cha'an pejtel jini ñuc tac bʌ tsa' bʌ i mele lac Yum ti' tojlel israelob, che' bʌ tsi' loc'sayob ti' p'ʌtʌlel egiptojob. 10Jetro tsi' yʌlʌ: La' sujbic i ñuclel lac Yum, come tsi' loc'sayetla ti' p'ʌtʌlel egiptojob, ti' p'ʌtʌlel Faraón. 11Cujilix ñuc lac Yum, mach ñuquic dioste' tac, come ñuc tsi' pʌsʌ i bʌ lac Yum ti' tojlel jini egiptojob tsa' bʌ i chañ'esayob i bʌ, che'en. 12Jetro i nij'al Moisés tsi' yʌq'ue Dios pulbil bʌ yic'ot tsʌnsʌbil bʌ i majtan. Tsa' tili Aarón yic'ot pejtelel xñoxob año' bʌ ti Israel ba'an i nij'al Moisés cha'an temel mi' c'uxob waj ti' tojlel Dios.
Tsi' wa'chocoyob juezob
(Dt. 1.9-18)
13Che' ti yijc'ʌlal tsa' buchle Moisés cha'an mi' cha'len meloñel. Ya' añob winicob x'ixicob ti' tojlel Moisés c'ʌlʌl ti sʌc'ajel c'ʌlʌl ti ic'ajel. 14I nij'al Moisés tsi' q'uele pejtelel i ye'tel Moisés ti' tojlel winicob x'ixicob. Tsi' yʌlʌ: ¿Chuqui wola' mel? ¿Chucoch bajñel buchulet ti meloñel ti' tojlel pejtelel winicob x'ixicob c'ʌlʌl ti sʌc'ajel c'ʌlʌl ti ic'ajel?
15Moisés tsi' jac'ʌ: Come jini winicob x'ixicob mi' tilelob ba' añon che' yomob i toj'esʌntel ti Dios. 16Che' añob i wocol mi' tilelob ba' añon cha'an mic melob cha'an mi' lajmel leto. Mic tsictesʌbeñob chuqui tsi' yʌlʌ Dios ti' mandar, che'en. 17I nij'al Moisés tsi' sube: Mach uts'atic bajche' wola' mel. 18Cabʌl wola' jisan a wersa. Woli' lujb'añob winicob x'ixicob ja'el, come c'ax tsʌts ili e'tel woli bʌ a mel. Mach mejlic a bajñel mele'. 19Ñich'tʌbeñon c t'an. Wolic toj'esañet. La' ajnic Dios awic'ot. Yajcʌbilet cha'an ma' pejcan Dios cha'an i coltʌntel winicob x'ixicob. An ti a wenta cha'an ma' wʌc' ti' wenta Dios chuqui woli' yujtel. 20Yom ma' cʌntesan israelob jini mandar tac che' bajche' ts'ijbubil. Pʌsbeñob i bijlel ba' yom mi' cha'leñob xʌmbal, yic'ot chuqui yom mi' melob. 21Che' ja'el yom ma' yajcan winicob año' bʌ i ña'tibal, xuculo' bʌ winicob mu' bʌ i bʌc'ñañob Dios, winicob mach bʌ anic mi' mulañob taq'uin. Yom ma' wa'chocoñob ti' ye'tel. Yom juntiquil yumʌl ti' tojlel jujump'ejl mil yic'ot yambʌ ti' tojlel jo'jo'c'al yic'ot yambʌ ti' tojlel lujump'ejl i yuxc'al tac, yic'ot yambʌ ti' tojlel lujuntiquil tac. 22Jini wa'chocobilo' bʌ mi caj i cha'lenob meloñel ti' tojlel i pi'ʌlob. Che' mi' tejchel tsʌts tac bʌ, la' tilic i subeñetob. Jini wa'chocobilo' bʌ mi caj i melob jini e'tel mach bʌ wocolic. Che' jini mi caj i yujtel a we'tel. Jini año' bʌ i ye'tel mi caj i coltañetob. 23Mi che'ʌch ma' mel, mi che'ʌch yom Dios, mi mejlel a chʌn cha'len a we'tel. Che' jini tijicñayob mi caj i sujtelob ti' yotot pejtelel ili winicob x'ixicob, che'en.
24Moisés tsi' jac'be i t'an i ñij'al. Tsi' lu' mele che' bajche' tsi' yʌlʌ. 25Moisés tsi' yajca winicob am bʌ i ña'tʌbal ti pejtelel Israel. Tsi' yʌq'ueyob i ye'tel ti' tojlel i pi'ʌlob ti jujunmojt, juntiquil yumʌl ti' tojlel mil, yambʌ ti' tojlel jo'jo'c'al tac, yic'ot yambʌ ti' tojlel lujuntiquil i yuxc'al tac, yic'ot yambʌ ti' tojlel lujuntiquil tac. 26Tsi' cha'leyob meloñel ti' tojlel i pi'ʌlob. Jini tsʌts tac bʌ tsi' subeyob Moisés. Jini mach bʌ wocolic ti melol tsi' bajñel meleyob. 27Moisés tsa' majli i cʌy ti bij i ñij'al che' bʌ tsa' sujti ti' lumal.
Currently Selected:
Exodo 18: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
