Kahigibu 5
5
Litaafi mini Piɛbila
1 #
Ɛzɛk 2.9-10; Aiz 29.11 Ka n daa nya litaafi shɛli ka di be ŋun ʒi nam ʒiishee maa nudirigu ni, ka sabbu be di puuni mini di nyaaŋa, ka bɛ zaŋ bintabinda ayopɔin n-dihi tabili di noli. 2Ka n nya malaika ŋun mali kpiɔŋ ka o kuhiri pampam bɔhira, “Ŋuni n-lee simdi ni o tabigi bintabinda ŋɔ ka bɔɣi litaafi ŋɔ n-lihi di puuni?” 3Ka so daa ka alizanda ni bee dunia ŋɔ ni bee dunia tiŋgbani puuni ŋun ni tooi bɔɣi litaafi maa bee nti tooi lihi di puuni. 4Ka so ni daa kani simdi ni o bɔɣi litaafi maa n-lihi di puuni maa zuɣu daa chɛ ka n kum pam. 5#Pil 49.9; Aiz 11.1, 10 Di saha ka kpamba maa ni yino yɛli ma, “Di kumda! Nyama, Naa Dauda zuliya ni bɛ ni booni so Juda zuliya ni Gbuɣinli la di nasara. Dinzuɣu o ni tooi tabigi bintabinda ayopɔin maa ka bɔɣi litaafi maa.” 6#Aiz 53.7; Zak 4.10 Ka n daa nya Piɛbila, ka o ŋmanila bɛ ni daa pun ku so, ka o ʒe nam ʒiishee maa sunsuuni ka binnɛma anahi la mini kpamba la be n-gil’ o. Piɛbil’ maa daa malila yila ayopɔin mini nina ayopɔin din nyɛ Naawuni shih’ ayopɔin shɛba o ni zaŋ tim dunia ŋɔ zaa ni na la. 7Ka o daa chaŋ ti deei litaafi maa ŋun ʒi nam ʒiishee maa nudirigu ni. 8#Yila 141.2 O ni daa deei litaafi maa naai, ka binnɛma anahi la mini kpamba pisinaanahi la gbani Piɛbil’ maa tooni. Bɛ zaa daa malila mɔɣilɔnim’ mini salima lahi, ka tulaale zim din nyɛ Naawuni ninvuɣ’ gahinda wunsuhigu pal’ lahi maa. 9#Yila 33.3; 98.1; Aiz 42.10 Ka bɛ daa yiini yil’ pal’ shɛli yɛra,
“Nyini n-simdi ni a deei litaafi maa
n-tabigi di bintabinda maa;
dama nyini ka bɛ daa ku,
ka a zaŋ a ʒim pa talima daadamnim’ zuɣu
n-deei ba ti Naawuni.
Daadamnim’ bɛn yi dɔɣim kam ni
mini zuliya balibu kam ni
ni niriba balibu kam ni
10 #
Yibu 19.6; Kah 1.6 ka a dihi nam n-zaŋ ba leei maligumaaniba
ni bɛ jɛmdi ti Duuma Naawuni,
ka ni ti diri nam dunia ŋɔ ni.” 11#Dan 7.10 Di saha ka n daa lihi nya, ka wum malaika bɔbili bɛn nyɛ tusatusa paai shɛm kukoya. Bɛ daa ʒe n-gilila nam ʒiishee maa ni binnɛma anahi la ni kpamba la, 12ka duhiri bɛ yɛhi yɛri pampam,
“Piɛbil’ so bɛ ni daa ku ŋɔ simdi ni o mali yiko
mini azichi ni yɛm ni kpiɔŋ,
ka nya tibiginsim mini jilima ni alibarika!”
13Ka n daa wum binnamda balibu kam kukoya. Binnamda zaa bɛn be alizanda ni mini dunia ŋɔ ni ni tiŋgbani puuni ni teeku ni daa kuhirimi yɛra,
“Ŋun ʒi nam ʒiishee ŋɔ ni mini Piɛbil’ ŋɔ
mal’ alibarika,
ka simdi tibigibu ni jilima tibu ni kpiɔŋ malibu
hal ni saha din ka bahigu!”
14Ka binnɛma anahi la yɛli, “Ami!” Ka kpamba la mi daa gban’ tiŋa n-jɛmdi Naawuni.
Currently Selected:
Kahigibu 5: DBwDB
Highlight
Copy
Compare
Share
Want to have your highlights saved across all your devices? Sign up or sign in
Dagbani Bible with Deuterocanonical Books © Bible Society of Ghana, 2011.
