Aizaia 46
46
1“Babilɔn wuna bahigu m-bɔŋɔ!
Bɛl mini Nɛbo daa nyɛla bɛ ni jɛmdi wun’ shɛŋa.
Amaa pumpɔŋɔ bɛ zaŋ li ʒilila bunsi;
ka di nyɛ ʒi’ shɛŋa
din chɛ ka di wum bunsi maa.
2Wuna maa ku tooi tiligi bɛmaŋa.
Bɛ gbahi ba kaman daba la chaŋ.
Babilɔn wuna maa bahigu m-bala!
3“Yaakubu zuliya
mini Izraɛlnim’ zaa bɛn kpalim,
wummiya!
Mani n-daa gbibi ya yi manim’
puuni zaŋ tabili bɛ ni daa
dɔɣi ya saha shɛli
zaŋ kana pumpɔŋɔ.
4Mani n-nyɛ yi Naawuni,
hal yi yi ti kurigi m-paligi gba,
n ni gbib’ ya.
Mani n-nam ya,
ka ni gbib’ ya.
N ni sɔŋ ya, ka tiligi ya.
5“Ŋuni ka yi lee yɛn zaŋ ma
buɣisi ka nya ka m min’ o saɣi?
So beni ŋ-ŋmani ma?
6Ninvuɣ’ shɛb’ zaŋdi anzinfa
pari sania zuɣu zahindi li,
ka zaŋdi bɛ kola ni
salima pahiri tiri machɛlinim’
ka bɛ maani wuna tiri ba,
ka bɛ damdiri tiŋ’ jɛmdi li!
7Bɛ kpuɣiri li tamdila bɛ
bɔɣusapima zuɣu chana.
Bɛ yi ti zaŋ li zali luɣ’ shɛli,
di kul kpalim ʒiɛla nimaani;
di ku tooi vuui chaŋ shɛli.
Ka so yi suhi li, di ku tooi yɛli shɛli
bee n-yihi dilana o muɣisigu ni.
8Yinim’ bɛn nyɛ alahichinim’ ŋɔ,
teemiya dimbɔŋɔ yɛla,
ka zaŋ li niŋ yi tɛha ni.
9Teemiya bin’ shɛŋa
din daa pun niŋ piligu ni ha la yɛla;
dama mani n-nyɛ Naawuni,
ka so kani pahi n zuɣu.
Mani n-kul nyɛ Naawuni,
ka so kani ŋmani ma.
10Mani n-nyɛ ŋun mi
yɛl’ shɛli din ti yɛn niŋ
dahin’ shɛli ha piligu.
Kurimbuni ha ka
m pun mi yɛl’ shɛŋa
din na bi niŋ yɛla.
Mani n-yɛli,
n ni lo nia shɛŋa zaa ni pali,
ka n ni niŋ n ni lo
ni n niŋ shɛlikam zaa.
11M bolila do’ so
ni o yi wulimpuhili polo kana.
O yɛn kabimina kaman suligu la
nti niŋ n ni lo ni n niŋ shɛli.
Mani n yɛli maa,
ka di mi shiri ni niŋ lala.
12Yinim’ bɛn nyɛ tipawumlinim’ bɛn tɛhi ni tiliginsim be katiŋ’ ŋɔ,
wummiya!
13N vu n tiliginsim mirina,
ka di shee bi wɔɣa.
N tiliginsim maa kandina ku yuui.
N ni tiligi Jɛrusalɛm,
ka di ti Izraɛlnim’ jilima.”
Currently Selected:
Aizaia 46: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
