Aizaia 41
41
Naawuni lo Izraɛlnim’ alikauli
1Yinim’ bɛn nyɛ teeku dulinim’ ŋɔ,
fomiya ka wum n ni yɛn yɛli ya shɛm ŋɔ.
Di simdi ni zuliya kam labi neei bɛ kpiɔŋ.
Bɛ zaŋm’ bɛ yɛtɔɣa kana ti tɔɣisi.
Chɛliya ka ti laɣim saria karibu shee.
2Ŋuni n-lee zaŋ nasaridira
ŋɔ yi wulimpuhili polo na,
ka chɛ ka o diri nasara
luɣ’ shɛlikam ŋɔ?
O chɛ ka o nyaŋ nanim’
mini zuliya kam.
O zaŋ o takɔbi tim
bɛ ni n-niŋ ba kaman
taŋkpaɣu la.
Ka zaŋ o piɛma to
n-wurim ba kaman wurigu la.
3O kari doli ba chani ni alaafee,
ka di bi ŋman’ o naba
shihiri tiŋa.
4Ŋuni n-lee zali dimbɔŋɔ ka niŋ li,
ka wuhi ʒiɛmana yɛla
piligu ni zaŋ kana?
Man’ Yawɛ n-daa beni piligu ni,
ka ni lan beni naabu ni.
5Teeku dulinim’ nyaya ka
dabiɛm kpe ba,
ka dunia ŋɔ luɣilikam nim’
niŋgbuna sɔhira,
ka bɛ kab’ laɣimna.
6Ka bɛ sɔŋdi taba,
ka yɛra, “M mali suhukpeeni!”
7Ka kapinta yɛli machɛle,
“A niŋ viɛnyɛliŋga.”
Ka ŋun kpɛri dari
ka di niŋdi polipoli kpaŋsi
ŋun kpahiri li tuɣiri taba ka yɛra,
“Di tuɣibu maa viɛla;”
ka bɛ zaŋ kpahikpahi li tuɣi taba,
ka di ku tooi yihi.
8 #
2 Yɛl 20.7; Jeem 2.23 “Amaa nyin’ Izraɛl ŋun nyɛ n dabili ŋɔ,
nyin’ Yaakubu ŋun nyɛ n ni pii so,
ka lan nyɛ n zo Ibrahimma zuliya ŋɔ;
9dunia ŋɔ luɣilikam ni
ka n yih’ a na;
ka bol’ a ka a yi dunia ŋɔ luɣ’ shɛlikam ni katiŋ’ na,
ka n yɛl’ a, “A nyɛla n dabili.
Mani m-piig’ a
ka bi zaɣis’ a.”
10Di zɔri dabiɛm, m be a sani.
Mani n nyɛ a Naawuni.
Kul di zɔri dabiɛm!
N ni ti a kpiɔŋ ka sɔŋ a,
n ni tilig’ a ka gul’ a,
ka chɛ ka a di nasara.
11Ninvuɣ’ shɛb’ bɛn suhuri
yiɣisi bah’ a zuɣu ni di vi;
ka ninvuɣ’ shɛb’ bɛn tuhir’ a
mi ni kpalim yoli ka kpi.
12A ni ti bo a dimnim’ shee,
amaa ka ku nya ba;
ninvuɣ’ shɛb’ bɛn tuhir’ a
ni ti bahi yoli.
13Dama man’ Yawɛ ŋun nyɛ a
Naawuni ŋɔ kul gbibila
a nudirigu ni.
Mani n-nyɛ ŋun yɛl’ a,
“Di zɔri dabiɛm; n ni sɔŋ a la.”
14Yawɛ yɛliya,
“ Yinim’ Izraɛlnim’ bɛn pɔri ka ka yaa ŋɔ,
di zɔriya dabiɛm, n ni sɔŋ ya.
Mani Izraɛl Naawuni ŋun be
kasi ŋɔ n-nyɛ yi Tiligira.
15N ni chɛ ka yi be kaman nɛl’ la.
N ni chɛ ka yi nyina
nyɛ zaɣ’ pala ka dira.
Yi ni niɛm zoya n-wurim li,
ka niŋ daboya kaman wurigu la.
16Yi ni yɛli ba bahi,
ka pɔhim ʒi ba chaŋ,
ka sanʒiɛɣu ʒe n-wurim ba.
Di saha yi suhuri ni paligi
man’ Yawɛ zuɣu;
ka yi paɣi mani ŋun nyɛ
Izraɛl Naawuni ŋun be kasi ŋɔ.
17Faranim’ mini nandaamba
yi ti bɔri kom ka bi nya,
ka kɔnyuri chɛ ka bɛ lɔna kuui,
man’ Yawɛ ni deei bɛ suhigu.
Mani ŋun nyɛ Izraɛl Naawuni
ŋɔ ku bahi ba.
18N ni chɛ ka mɔɣa dɔni
zoya sunsuuni tiŋgban’ kuŋ ni,
ka chɛ ka kɔbil’ nina
yooi vinvama ni.
N ni chɛ ka kom puhigi
mɔɣu ni zɔra,
ka chɛ ka kom yi
tiŋgban’ kuŋ ni na zɔra.
19N ni chɛ ka sida tihi
mini akasia tihi ni mitil tihi
ni olivi tihi ni sipirɛs
ni oki tihi ni gahi ti galisi mɔɣu ni.
20Ka sokam zaa nya li ka baŋ
ni man’ Yawɛ n-niŋ li.
Bɛ ni baŋ ni Izraɛl Naawuni
ŋun be kasi ŋɔ n-chɛ
ka di niŋ maa.”
21Yawɛ ŋun nyɛ Yaakubu Naa ŋɔ yɛliya,
“ Zaŋmiya yi yɛtɔɣa na,
ka zaŋ yi ni mali yɛtɔɣ’ shɛli ni yi yɛli
zaŋ chaŋ di polo na.
22Zaŋmiya li na nti yɛli ti
ashili yɛl’ shɛŋa din yɛn niŋ.
Yɛlimiya ti kurimbuni ha yɛla
ni nyɛ shɛm, ka ti zahim li nya
din yɛn niŋ di puuni
bee wuhimiya ti ashili yɛl’
shɛŋa din yɛn niŋ
dahin’ shɛli ha.
23Yɛlimiya ti din yɛn niŋ
pumpɔŋɔ zaŋ chana,
ka di chɛ ka ti baŋ
ni yi shiri nyɛla wuna.
Niŋmiya zaɣ’ viɛlli bee zaɣ’ biɛɣu
ka di chɛ ka dabiɛm
kpe ti ka ti tarigi.
24Yi pala shɛli,
ka yi tuma gba pa shɛli.
Ŋunkam pii ya tum din chihira.
25M bolila nuzaa polo ninvuɣ’
so ka o kana.
O yila wulimpuhili polo na
ka nyɛ ŋun jɛmdi ma.
O ni du n-tam nanim’ zuɣu
n-no ba kaman tandi la
bee kaman yaɣimɛr’ ni nɔri
yaɣiri shɛm la.
26Ŋuni n-lee yɛl’ ti di yɛla
piligu ni ha ni di chɛ ka ti baŋ li,
ka ŋuni n-daŋ yɛli di yɛla,
ka ti ni tooi yɛli ni o mali yɛlimaŋli?
So daa pun bi yɛli di yɛla,
ka so bi zaŋ li moli;
so mi pun bi wum yi
yɛtɔɣ’ shɛli.
27N daa tuui zaŋ li
yɛl’ la Ziɔnnima,
ka zaŋ di lahiba’ suŋ molo
m-moli Jɛrusalɛmnim’ sani.
28Amaa n lihiya nya
ka so kani.
So ka bɛ ni n-nyɛ yɛtɔɣ’ tɔɣisira,
ka n ni bɔh’ o bɔhigu ka o garigi.
29Aai, bɛ zaa pa shɛli,
bɛ tuma ka buchi;
bɛ binnana gba ka yiko.”
Currently Selected:
Aizaia 41: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
