Aizaia 30
30
Ijiptinim’ zɔri laɣibu din ka buchi
1Yawɛ yɛliya, “Wɛi, n niriba bɛn mali tipawumli,
ka lɔri nia shɛli din pa n dini,
ka lan laɣiri niriba zɔri ka di pa n ni yu’ shɛli.
Bɛ kul tumdila alahichi pahira.
2Bɛ chaŋ Ijipti nti bɔri sɔŋsim,
ka bi niŋ ma saawara.
Bɛ daa chaŋ ti kpɛla Firawuna yuli
ni bɛ nya sɔɣibu shee Ijipti.
3Dinzuɣu bɛ ni ti nya filiŋ Ijipti zo n-kuli maa ni,
ka Firawuna ti chɛ ka bɛ di vi bɛ ni bɔri sɔŋsim shɛli maa puuni.
4Hal bɛ sapashinnim’ mini bɛ tuumba ni pun paai Ijipti tin’ shɛŋa din nyɛ Zɔan
mini Hanɛs la zaa yoli,
5Judanim’ ni ti niŋ ayɛi,
niriba maa ni daa bi tooi sɔŋ ba la zuɣu.
Bɛ ni chɛ ka Judanim’ maa di vi.”
6Naawuni ni yɛli shɛm zaŋ chaŋ nudirigu polo tiŋgban’ nɛl’ ni biŋkɔbiri polo m-bɔŋɔ:
Bɛ tuumba dolila tiŋgbɔŋ maa ni so’ shɛŋa din mali barina.
Di nyɛla luɣ’ shɛli gbuɣima
mini garinsi ni ʒiɛrisi ni be.
Bɛ zaŋdi pin’ suma ʒi’ tibisa n-ʒiini bɛ bunsi
mini bɛ laakumnima
nti tiri zuliya shɛb’ bɛn ku tooi sɔŋ ba.
7Ijiptinim’ ni tiri niriba sɔŋsim shɛli ka buchi,
dinzuɣu man’ ni pa Ijipti yupaa
m-bol’ li la “Rahab#30.7 RAHAB: O nyɛla kurimbuni ha teeku ni binneen’ titali ŋun ʒe damli mini zaɣ’ biɛɣu zaani. ŋun nyɛ ʒinahigulana.”
Tipawumlinima
8Cham’ ti sab’ niŋ litaafi ni zali
wuhi niriba maa ni nyɛ ninvuɣ’ biɛri shɛm;
ka di ti di ba shɛhira sahakam.
9Dama bɛ nyɛla tipawumlinima
ni bɛn ka yɛda
ni bɛn bi deeri Yawɛ wuhibu.
10Bɛ daa yɛli nyariba, “Di lan nyan ya”,
ka yɛli anabinima, “Di yɛliya ti din tuhi;
naɣ’ yɛlimiya ti la ti suhu ni yu shɛli
ni binshɛŋa din bi tuhi yɛla.
11Zomiya ti soli zuɣu, ka di guriya ti soli.
Di lan tɔɣisiriya ti Izraɛlnim’ Naawuni ŋun be kasi maa yɛla.”
12Dinzuɣu Izraɛlnim’ Naawuni ŋun be kasi maa ni yɛli shɛm m-bɔŋɔ:
“Yi zaɣisi n yɛligu
ka dolila kiŋkansi mini yɔhiŋ soli,
ka niŋ li naani.
13Dinzuɣu yi mali taali.
Yi ŋmanila goon’ wɔɣinli din tahi bɔɣi,
di ku yuui ka di lu n-libigi niriba.
14Yi ni ŋma n-wurisiwurisi kaman yaɣiri duɣu la,
hal ka salichee din ni mooi buɣim
bee n-tooi kom kɔduɣu ni ku lan beni.”
15Yawɛ ŋun nyɛ Izraɛlnim’ Naawuni ŋun be kasi ŋɔ ni yɛli shɛm m-bɔŋɔ:
“Niŋmiya ma naani ka labina
nti nya kpiɔŋ ka tiligi.”
Amaa ka yi zaɣisi
16ka yɛli,
“Aai, ti ni ba yuri bɛn zɔri pam n-zo n-tiligi,”
dindina zomiya tiligi.
Yi tɛhiya ni yi yuri zɔri pam,
amaa bɛn kariti doli ya maa yuri zɔri gari yi yuri.
17Yi dimnim’ tɔbbi’ yino ni ti kari yi ninvuɣ’ tuhili ka yi ŋmaligi guui,
ka bɛ tɔbbih’ anu ni tooi kari ya ka yi zaa ŋmaligi guui,
ka yi tɔbbi’ yino gba ti ku kpalim zani
naɣila binshɛli din nyɛ shihirili din be zoli zuɣu la
n-ni ti kpalim beni.
18Amaa Yawɛ guhirimi ni o zɔn ya nambɔɣu.
O bɔri ni o zɔn ya nambɔɣu,
dama o nyɛla ŋun kul niŋdi din tuhi.
Ninvuɣ’ shɛb’ bɛn niŋ Yawɛ naani mal’ alibarika.
Naawuni ni niŋ alibarika niŋ o niriba ni
19Yɛlimaŋli, yinima ninvuɣ’ shɛb’ bɛn be Jɛrusalɛm ku lan kum. Yi Duuma nyɛla nambɔzɔra, ka yi yi kum niŋ o, o ni wum ka garigi ya. 20Yi Duuma ni chɛ ka yi nya wahala ni nahiŋgu, amaa ŋuna ŋun maŋmaŋ’ nyɛ yi karimba maa ku lan sɔɣi ka chɛn ya, amaa o ni chɛ ka yi nini nya o, ka o wuhi ya. 21Yi yi ti birigi kpa nudirigu polo bee nuzaa polo ka chɛ soli, yi ni ti wum o kukoli yi nyaaŋa polo ka di yɛra, “Soli maa m-bɔŋɔ, doliya li.” 22Di saha yi ni ti saɣim yi wuna mini di binnan’ shɛŋa zuɣu bɛ ni dooi salima mini anzinfa pa, ka va li labi kaman binchɛr’ biɛr’ la ka yɛli, “Wari ya.” 23Yi yi ti biri yi bimbira, o ni chɛ ka saa mi n-niŋ li ka di zooi niŋ, ka yi kpuɣi atam pam, ka yi biŋkɔbiri nya mɔri pam ŋubira. 24Hal yi naɣikɔra mini bunsi bɛn kɔri yi puri ni ti ŋubi bɛ ni zaŋ soobul’ mini soobul’ jɛba yɛli bindir’ shɛli. 25Yi yi ti daai yi dimnim’ pihi luhi ka ku ba dahin’ shɛli, kom ni ti zɔri yiri zoya din du pam mini kuŋkuna din du pam zaa ni na. 26Goli ni ti nɛmi kaman wuntaŋ’ la, ka wuntaŋ’ neesim mi ti laɣim ʒii buyopɔin zuɣu n-nyɛ kaman daba ayopɔin neesim din leei dahin yini dini. Dimbɔŋɔnim’ zaa ni ti niŋla dahin’ shɛli Yawɛ yi ti tib’ o ni ti o niriba dan’ shɛl’ la.
Naawuni ni darigi Asirianim’ tibili
27Nyamiya, Yawɛ yiko min’ o jilima nyɛla din yi katiŋ’ kanna.
O suhuyiɣisili shihirili nyɛla nyɔhi ni buɣim;
ka o nol’ ni yɛtɔɣa ŋmani buɣim din dira.
28O vuhibu pɔhim din be kaman kokpɛɣu
din ʒiri binshɛɣukam chani la
be o tooni n-kuri zuliya shɛba,
ka chɛ ka bɛ ni lo nia biɛ’ shɛŋa zaani tariga.
29Amaa yinim’ ni ti mali suhupiɛlli ka yili yila kaman Naawuni chuɣu puhibu dali yuŋ. Yi ni ti mali suhupiɛlli kaman ninvuɣ’ shɛb’ bɛn piɛbiri yuhi yiini yila chani Yawɛ ŋun nyɛ Izraɛlnim’ tampiŋ ŋɔ zoli zuɣu.
30Yawɛ ni chɛ ka niriba wum o kukoli din galisi la, ka chɛ ka sokam nya o suhuyiɣisili tuma. O ni ti chɛ ka buɣim dira, ka sagbana bɔɣi, ka sanʒiɛɣu ʒiɛra, ka sakuɣa luri na. 31Asirianim’ yi ti wum Yawɛ kukoli, ka nya o ni darigi bɛ tibili shɛm, bɛ ni tarigi. 32Yawɛ ni ti yɛn darigiri bɛ tibili saha shɛli maa ti yɛn nyɛla o niriba ni yɛn ŋmɛri guŋgɔna mini mɔɣilɔnim’ saha shɛli. Naawuni maŋmaŋ’ ni tuhi Asirianim’ maa. 33Yɛlimaŋli, o mali buɣim shɛli din yɛn di Asiria naa sɔŋ ka di waɣa. Buɣim maa dari kul pumi, ka doya yɛlim’ ka zilim’ pam. Yawɛ ni vuhi o vuhim din ŋmani chilibi bahi di zuɣu, ka di taai buɣim.
Currently Selected:
Aizaia 30: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
