Aizaia 29
29
Yɛl’ biɛɣu din paai Jɛrusalɛm
1Wɛi, yɛl’ biɛɣu ni paai Jɛrusalɛm din nyɛ Naawuni sara maligu bimbini,
ka nyɛ Dauda ni daa be tin’ shɛli ni la.
Chɛ ka churi ŋɔ kul puhiri yuuni kam.
2Di saha ka Naawuni ni chɛ ka yɛl’ biɛɣu kana ti paai tin’ shɛli bɛ ni booni
“Naawuni sara maligu bimbini” la.
Ka niriba ni ti kumdi ka fabinda,
ka tiŋ’ maa zaa ni be kaman ʒim
ni ŋam sara maligu bimbin’ shɛli.
3Naawuni ni ti lu tiŋ’ maa zuɣu
m-me bindura tabili di gooni gili.
4Jɛrusalɛm, a ni ti bela tiŋgbani puuni ha tɔɣisiri yɛtɔɣa,
ka a yɛtɔɣa yiri tiŋgban’ ni na.
A kukoli ni ti ŋmanila kpim’ kukoli
n-yiri tiŋgban’ ni na.
A ti yɛn sɔɣirimi yɛri
ka di yiri tiŋgban’ ni na.
5Jɛrusalɛm, n ni pɔbisi tinzunnim’ bɛn lir’ a zaa bahi kaman taŋkpaɣu la,
ka chɛ ka bɛ tɔbbihi bɛn zɔr’ dabiɛm zo yomyom
kaman pɔhim n-ʒe wurigu chaŋ la.
Nini pɔbbu ni neebu
6ka Yawɛ ŋun nyɛ Tɔbbihi Naa ŋɔ
ni chɛ ka saa tahibu mini tiŋgbani dambu
ni pɔhim biɛɣu ni buɣim biɛɣu kana nti fa a bahi.
7Di saha maa tinzun’ tɔbbihi bɛn zaa kana ti liri tin’ shɛli din nyɛ Naawuni sara maligu bimbin’ la
mini bɛ bidibbina ni bɛ tɔbutuhiri’ nɛma
ni bɛ binshɛɣukam zaa ni ti yiɣi ka firi
kaman zahindi la
bee nir’ ni nya binshɛli ʒii yuŋ shɛm la.
8Tinzunnim’ bɛn zaa laɣim ni bɛ liri Ziɔn Zoli zuɣunima
ni ŋmanila kum ni mali ninvuɣ’ so,
ka o dɔni zahim zahindi ka o diri la bindirigu,
ka yirigi neei ka kum na kul mal’ o la
bee kaman kɔnyuri ni mali ninvuɣ’ so,
ka o dɔni zahim zahindi ka o nyurila kom,
ka yirigi neei ka kɔnyuri na kul mal’ o la.
Tipawumli soli
9Kul leemiya jɛra!
Kul leemiya zoomba!
Buɣimiya n-chani laana,
ka bi nyu wain bee binnyuri kpɛma!
10 #
Rom 11.8
Dama Yawɛ chɛ ka gom gbaai ya
ni yi gbihi gbihiri biɛɣu.
O pɔbi yi daanabinim’ nina,
ka zaŋ bini pili yi nyariba zuɣuri.
11Dimbɔŋɔ zaa ʒii nyabu ŋmanila bɛ ni zaŋ bini dihi litaafi shɛli noli tabili puuni yɛtɔɣa, ka so yi zaŋ li ti ninvuɣ’ shɛb’ bɛn mi karimbu ka yɛli ba, “Karimmiya litaafi ŋɔ,” bɛ ni yɛli, “Ti ku tooi karim li, bini ka bɛ zaŋ dihi di noli tabili.” 12Ka so yi zaŋ li ti ninvuɣ’ shɛb’ bɛn ʒi karimbu ka yɛli ba, “Karimmiya litaafi ŋɔ,” bɛ ni yɛli, “Ti ʒi karimbu.”
13 #
Mat 15.8-9; Maak 7.6-7 Ti Duuma yɛliya,
Niriba ŋɔ yɛri ni bɛ jɛmdila mani,
amaa ka bɛ ni yɛri shɛm ka gbinni,
dama bɛ suhuri bela katiŋ’ ka chɛ ma.
Ninsalinim’ zaligunim’ mini bɛ kaya soli ka bɛ doli jɛmdi ma.
14 #
1 Kɔr 1.19
Dinzuɣu n ni tum
alahiziba tuma niriba ŋɔ sani,
ka di gari ba ka niŋ ba alahiziba.
Ninvuɣ’ shɛb’ bɛn nyɛ yɛnnim’ ni leei jɛra,
ka bɛ yɛm maa leei din ka buchi.
Tahima din be tooni
15Mbusim be yinim’ bɛn zaŋ yi ni lo nia shɛŋa sɔɣi Yawɛ,
ka tumdi yi tuma zibisim ni ŋɔ zuɣu,
dama yi yɛra, “So bi nyari ti, So mi bi mi ti.”
16 #
Aiz 45.9; Rom 9.20 Bɛ lɛbila yɛla pili ma.
Yaɣimɛra mini yaɣiri pala yim.
Bɛ ni mali binshɛli ku tooi yɛli ŋun mal’ li,
“Pa nyini m-mali ma;”
bee bɛ ni nam bin’ so ku tooi yɛli ŋun nam’ o,
“A bi nam ma viɛnyɛliŋga.”
17Di ku yuui
ka nyɔŋ puuni leei kɔbu shee
kɔbu shee mi leei nyɔŋ.
18Dindali maa tikpiranim’ ni ti wum
bɛ ni karindi litaafi puuni yɛri shɛm,
ka zoomba bɛn be zibisim ni
ti neei bɛ nina lihi nya.
19Nandaamba mini faranima ni ti lan nya suhupiɛl’ shɛli
Yawɛ ŋun nyɛ Izraɛlnim’ Naawuni ŋun be kasi ŋɔ ni tiri la.
20Ninvuɣ’ shɛb’ bɛn nahindi bɛ taba,
ka maani ba ansarisi la ti ku lan beni.
Bɛ ni ti ku tuumbiɛtumdiba zaa.
21Naawuni ni ti ku ninvuɣ’ shɛb’ bɛn zuri bɛ tab’ nyaaŋa
mini bɛn fari tuumbiɛtumdiba bahira saria karibu ni
ni bɛn ŋmari ʒiri m-mɔŋdi bɛn ka taali yɛlimaŋli la.
22Dinzuɣu Yawɛ ŋun daa tiligi Ibrahimma o muɣisigu puuni la yɛli Yaakubu zuliya,
“ Yi ku lan di vi,
yi mi ninni biɛhigu ku lan taɣi.”
23Bɛ nini yi ti nya bi’ shɛba n ni yɛn ti ba,
di saha bɛ ni baŋ
ni mani ŋun nyɛ Yaakubu zuliya Naawuni ŋun be kasi ŋɔ
n-tum lala maa,
ka ti ma jilima ka lu man’ ŋun nyɛ Izraɛl Naawuni ŋɔ sizuura.
24Ninvuɣ’ shɛb’ bɛn nyɛ jɛra ni bɔhim baŋ,
ka ninvuɣ’ shɛb’ bɛn kul ŋumdi bɛ kparima ni waawaayil’ la ni bɔri ni bɛ nya wuhibu, ka bɛ suhuri paligi.
Currently Selected:
Aizaia 29: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
