Aizaia 31
31
Naawuni guli Jɛrusalɛm
1Mbusim be ninvuɣ’ shɛb’ bɛn chani Ijipti
ti bɔri sɔŋsim zuɣu.
Bɛ niŋla Ijipti tɔbbihi bɛn galisi pam la kpiɔŋ
mini bɛ wɔribariba ni bɛ chɛchɛbunsi yɛda;
amaa ka bi niŋ Yawɛ ŋun nyɛ Izraɛlnim’ Naawuni
ŋun be kasi ŋɔ yɛda
bee n-suh’ o ni o sɔŋ ba.
2Ka o mi chɛ ka zaɣ’ biɛɣu paai ba,
dama o nyɛla ŋun mi shɛlikam.
O bi yɛri ka labiri nyaaŋa.
O ni darigi tuumbiɛtumdiba
mini ninvuɣ’ shɛb’ bɛn sɔŋdi ba
ka bɛ tumdi tuumbiɛri maa tibili.
3Ijiptinim’ nyɛla ninsalinima ka pa Naawuni,
ka bɛ yuri nyɛ biŋkɔbiri
ka pa lahizibu binyara.
Yawɛ yi ti lu bɛ zuɣu,
bɛn nyɛ sɔŋdiba maa ni ti tuui,
ka bɛ ni sɔŋdi shɛb’ maa lu,
ka bɛ zaa laɣim bahi yoli.
4Ka Yawɛ daa yɛli ma,
“Gbuɣinli yi gbaai piɛɣu ku o,
ka piɛguliba kul tahiri pampam kabo,
o ku zo ka chɛ piɛɣu maa.
Lala n-nyɛ li;
binshɛli kani din ni chɛ
ka man’ Yawɛ ŋun nyɛ Tɔbbihi Naa ŋɔ
ku guli Ziɔn Zoli,
ka tuhi fa li.
5Nooŋa ni yiɣiri gind’ o tiɛɣu shɛm la,
lala ka Yawɛ ŋun nyɛ Tɔbbihi Naa ŋɔ
ni guli Jɛrusalɛm.
O ni fa li bahi,
ka gul’ li.”
6Yawɛ yɛliya, “Izraɛlnima, ŋmaligimiya lab’ yi ni yi man’ so nyaaŋa pam la sanna. 7Dindali maa yi zaa ni ti zaŋ yi daanzinfa buɣa mini salima buɣa din nyɛ yi nuhi ni tum alahichi m-malila labi.
8Di saha bɛ ni ti zaŋ takɔbi
din pa salinim’ bɛn kpiri ŋɔ takɔbi n-ku Asirianima.
Bɛ ni ti yi tɔbu ni n-zo ni bɛ tiligi.
Ka bɛ ti gbahi bɛ nachimba chaŋ ti leei daba.
9Dabiɛm ni ti gbaai bɛ naa ka o guui,
ka o kpamba gba ti zaŋ bɛ tuutanim’ bahi ka guui dabiɛm zuɣu.”
Yawɛ ŋun buɣim diri Ziɔn,
ka o sara maligu buɣim shee be Jɛrusalɛm la n-yɛli lala maa.
Currently Selected:
Aizaia 31: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
