Aizaia 3
3
Saɣiŋgu din niŋ Jɛrusalɛm
1Yawɛ ŋun nyɛ ti Duuma,
ka nyɛ Tɔbbihi Naa ŋɔ
ni yihi Jɛrusalɛm mini Juda puuni
sɔŋsim mini niriba
ni niŋ binshɛŋa naani
ni bindira sɔŋsim zaa
ni kom sɔŋsim zaa
2ni zuɣulaannim’ mini tɔbbihi
ni sariakaritiba ni anabinima
ni baɣisi ni kpamba
3ni sapashinnim’ bɛn su tɔbbihi pihinunu fukumsi
ni zuɣulaannima
ni bɛn wuhiri niriba din niŋ kamaata
ni alahiziba tumtumsa tumdiba ni bukpahinima.
4O ni chɛ ka bidibbihi nyɛ bɛ nanima,
ka biliɛri su ba.
5Niriba maa ni ti nahindi taba,
ka sokam ti nahind’ o kpee;
ka bipala ku tiri bɛ kpamba jilima,
ka tarimba ku tiri bɛ zuɣulaannim’ jilima.
6So ni ti gbaag’ o daŋ puuni
ninvuɣ’ so n-yɛl’ o,
“A mali binyɛrigu,
leemi ti zuɣulana
n-su binshɛɣukam
din wurim doya ŋɔ.”
7Amaa ka o daŋ ni nir’ maa ni ti kuhi yɛli dindali maa,
“N ku tooi leei yi tibira.
N ka bindirigu bee binyɛrigu n yiŋa;
yi ku zaŋ ma
leei niriba zuɣulana.”
8Jɛrusalɛm tuuya,
ka Juda lu,
dama bɛ yɛtɔɣa mini bɛ tuma bi viɛli Yawɛ sani;
bɛ turila Naawuni maŋmaŋa.
9Bɛ nina ni lihibu di ba shɛhira;
bɛ tum alahichi palɔni
ka bi sɔɣiri li kaman Sɔdomnima.
Mbusim be bɛ zuɣu!
Dama bɛ bo yɛl’ biɛɣu ti bɛmaŋa.
10Wuntizɔriba nyɛla zuɣusuŋnima,
dama bɛ ni di bɛ tuma nyɔri.
11Amaa mbusim be ninvuɣ’ biɛri zuɣu! Bɛ pala zuɣusuŋnima,
dama bɛ ni niŋ niriba shɛm, lala ka bɛ yɛn niŋ bɛ gba.
12Bihi n-nahindi n niriba,
ka paɣiba su ba.
N niriba, yi zuɣulaannima m-birigi ya,
ka chɛ ka yi tum yi soya.
Yawɛ kar’ o niriba saria
13Yawɛ yiɣisiya ni o tɔɣisi zab’ omaŋ’ zuɣu.
O zaniya ni o kari o niriba saria.
14Yawɛ kpe o niriba kpamba
mini bɛ nanim’ saria karibu ni.
O yɛliya, “Yinima n-ʒe tihi puri,
ka di tarimba nɛma ti niŋ yi yinsi.
15Bɔzuɣu ka yi nahindi n niriba
ka diri tarimba zuɣu nyɔri?”
Yawɛ ŋun nyɛ yi Duuma ni Tɔbbihi Naa ŋɔ n yɛli lala maa.
Bɛ kpahi Jɛrusalɛm paɣiba zuɣu ni
16Yawɛ yɛliya,
“Ziɔn paɣiba nyɛla karimbaannima,
bɛ duhila bɛ zuɣuri zuɣusaa
chani lihiri kɔre lihigu.
Bɛ yaarila bɛ naba
n-nɔri nyamnyam sarisiri chana.”
17Ti Duuma ni ti Ziɔn paɣiba zuɣutalisi ni dansi
ka di niŋ yukaɣima.
Yawɛ ni chɛ ka bɛ chaŋ bɛ zaɣim.
18Dindali maa ti Duuma ni ti yihi bɛ napɔnchahi ni nachintɛri mini bɔbisi ni dolibinima 19ni tibikpara ni bansi ni sarisi 20ni zuɣu nachintɛri ni bɔɣugbina bansi ni shɛlɔriti ni tulaale adakanima ni gurima 21ni nintuhi ni nyee nintuhi 22ni chuɣu dali binyɛra ni binyɛr’ shɛŋa din yɛri pari zuɣusaa ni binyɛr’ kara ni nuhi ni kolibihi 23ni tanvoya binyɛra ni tan’ piɛl’ viɛlli binyɛra ni bantabisi ni sarisi.
24Tulaale viɛlli nyom ku be bɛ sani, naɣila nyom biɛɣu.
Bɛ ku mali shɛlɔri’ viɛla lɔra, naɣila gabisi,
bɛ ku mali zab’ viɛla, naɣila zuɣukpina,
bɛ ku mali binyɛr’ viɛla yɛra, naɣila buri.
Bɛ viɛlim ni ŋmaligi leei vi.
25Bɛ ni ti zaŋ takɔbi ku yi dɔbba,
ka ku yi tɔbutuhiriba tɔbu ni.
26Ka tiŋ’ maa dunɔdaya ni ti kum ka fabili.
Di ni ti ŋmanila paɣ’ so ŋun pirig’ o zaɣim ka ʒi tiŋa.
Currently Selected:
Aizaia 3: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
