Aizaia 28
28
Bɛ kpahi nuzaa polo naa zuɣu ni
1Izraɛl zuliya nam be barina ni.
Di tipum zuɣupiligu din mali jilima,
ka pili bɛ zuɣulaannim’ bɛn yu nam pam zuɣuri ni la nyɛla din kpaara.
Bɛ zuɣuri zaa nyola tulaale,
amaa ka bɛ lee nyu wain buɣi do nimaani.
2Nyama, ti Duuma mali ninvuɣ’ so ŋun mali kpiɔŋ ni yiko din ni tooi lu bɛ zuɣu.
O ni kana kaman sakuɣa saa
bee sa’ kurili ni kopaliga nti di tiŋgbani maa.
3Zuɣulaannim’ bɛn nyɛ karimbaannim’ ni bɛn nyu wain buɣi la,
bɛ ni ti no n-taai ba.
4Zuɣulaannim’ bɛn nyɛ karimbaannim’ maa jilima la ni ti kpaai
kaman fiig tihi walibu saha tiwal’ shɛŋa din daŋ moobu ni yi luna ka bɛ pihi li,
ka di nuu ni paabu n-to ka bɛ pun di li la.
5Dahin shɛli kanna, ka Yawɛ ŋun nyɛ Tɔbbihi Naa ŋɔ
ni ti ŋmanila tipum zuɣupiligu din mali jilima o niriba bɛn tiligi sani.
6O ni ti chɛ ka bɛn nyɛ sariakaritiba doli yɛlimaŋli soli,
ka ti bɛn ʒe dunɔdali gbini kariti bɛn kanna ni bɛ ti liri ba la suhukpeeni.
Aizaia mini Juda anabinim’ bɛn nyuri wain buɣira
7Hal maligumaaniba mini anabinim’ gba
nyurila wain n-chani laana.
Bɛ nyula wain maa mini binnyur’ kpɛma
n-chani laani ka birim.
Bɛ bi lan baŋdi ʒii nyabu gbinni,
bɛ mi bi lan kariti saria din tuhi.
8Bɛ teebuya zuɣu zaa nyɛla tiri,
ka di luɣ’ shɛli ka nyam.
9Ka niriba bɔhira,
“Bɔ ka o lee yɛn zaŋ wuhi ti?
Ka yɛtɔɣ’ bɔ ka o lee yɛn zaŋ yɛl’ ti?
Bihi bɛn ŋmaai bihili kɔŋko ka o yɛligu ni sɔŋ?
10Dama o kul wuhirila zaligu yiniyini
mini wuhibu yiniyini ni kuligakuliga
ni biɛlifu kpe, biɛlifu kpe.”
11Yɛlimaŋli yi yi ku wum n ni yɛli shɛm, Naawuni ni chɛ ka tinzunnim’ zaŋ tinzun’ yɛtɔɣa wuhi ya.
12 #
1 Kɔr 14.21
Yinima ninvuɣ’ shɛb’ o ni pun yɛli,
“N tin ya vuhim mini suhudoo,
amaa ka yi zaɣisi ni yi ku wum ti ma.”
13Dina n-chɛ ka Yawɛ wuhiri ya la
zaligu yiniyini mini wuhibu yiniyini
ni kuligakuliga ni biɛlifu kpe ni biɛlifu kpe.
O niŋla lala ni di chɛ ka yi lɛb’ lu yi kpaya zuɣu
n-nya dansi, ka zana gbahi ya,
ka bɛ zaŋ ya chaŋ ti leei daba.
Bɛ pii kuɣili sɔŋ Ziɔn
14Pumpɔŋɔ, yinim’ bɛn nyɛ ansarisimaaniba,
ka di nam ʒini Jɛrusalɛm n-su n niriba ŋɔ,
wummiya man’ Yawɛ ni yɛn’ yɛli shɛm.
15“Yi nyuri bara yɛri ni yinim’ laɣila kum zɔri,
ka yi mini kpiimba biɛhigu shee lo tab’ alikauli.
Yi niŋ yɛda ni alɔbo yi lu,
di ku din ya,
dama yi tɛhiya ni ʒiri
mini yɔhiŋgu ni tiligi ya.”
16 #
Yila 118.22-23; Rom 9.33; 10.11; 1 Pita 2.6 Dinzuɣu yi Duuma ŋun nyɛ Yawɛ ŋɔ yɛliya,
“Nyamiya, n zaŋla duu tanzaa kuɣili sɔŋ Ziɔn.
Di nyɛla kuɣ’ shɛli din viɛli
ka mali kpiɔŋ; ka ni chɛ ka duu tanzaa mali yaa.
‘Ka ŋunkam niŋ o yɛda
ku zo dabiɛm.’
17Din tuhi niŋbu n-yɛn nyɛ di buɣisibu vulo,
ka yɛlimaŋli nyɛ di bimbuɣisirigu.”
Sanʒiɛɣu ni ʒe yi ni niŋ ʒiri shɛli yɛda la bahi,
ka kokpɛɣu mi ʒi yi ni niŋ yɛda
ni binshɛli ni tiligi ya la chaŋ.
18Di saha ka yi mini kum zɔri la saɣim,
ka yi mini kpiimba biɛhigu shee alikauli la yiɣisi.
Di nyaaŋa alɔbo yi ti lu,
di ni din ya.
19Di ni lu yi zuɣu n-din ya;
di ni lu yi zuɣu asiba n-gari yim,
ka lu yi zuɣu wuntaŋ’ ni ni yuŋ.
Ka yɛl’ biɛɣu kam ni chɛ
ka yi baŋ Naawuni yɛligu gbinni!
20Dinzuɣu yi ni ti ŋmanila ŋahili shɛli din wuhi:
Bindoo bi waɣa ka nir’ ni tooi teeg’ omaŋ’ dɔni di zuɣu,
ka chinchini gba bi yɛlima,
ka nir’ ni tooi zaŋ li pil’ omaŋa.
21 #
Jɔsh 10.10-12; 2 Sam 5.20; 1 Yɛl 14.11 Yawɛ ni yiɣisi tuhi kaman o ni daa niŋ shɛm Pɛrazim Zoli zuɣu
mini Gibiɔn vinvamli ni la
din ni chɛ ka o tum
o ni lo ni o tum shɛm.
O ni yɛn tum shɛli maa yi kul nyɛ yɛl’ saani kabo,
o ni bahi tum o tuma din nyɛ alahiziba tuma maa naai.
22Dinzuɣu pumpɔŋɔ di chɛliya
ka n ni zaŋ yɛtɔɣ’ shɛŋa kpahiri yi zuɣu ni ŋɔ kun ya lari.
Yi yi niŋ lala,
di ni chɛ ka yi tiligibu niŋ tom.
Dama n wum ti Duuma Yawɛ ŋun nyɛ Tɔbbihi Naa ŋɔ ni zali
ka wuhi ni o ni saɣim tiŋgbɔŋ ŋɔ zaa shɛm.
Naawuni yɛm
23Wummiya n ni yɛri ya shɛm.
Chɛliya ka yi baɣa be n yɛligu ni.
24Pukpar’ so n-na ʒi n-kɔr’ o puu
n-kul kɔri li yɛrigira.
25O yi kul ko o kɔbu,
o biritila o bimbira din nyɛ nili mini buŋgu,
ka biri alikama doli vuɣisi,
ka biri chi di biribu shee,
ka biri binshɛŋa din pahi dolisi putarisi.
26O mi o tuma ni nyɛ shɛli,
dama Naawuni n-nyɛ ŋun wuh’ o.
27O bi zaŋdi kaburi jaambɔn’ titali buri buŋgu
bee n-zaŋdi naɣikɔra tɔroko nɔri nili,
amaa kaburi jaambɔn’ bila
ka o zaŋdi buri buŋgu,
ka zaŋdi li ŋmari nili.
28O bi zaŋdi bini din ni saɣim siŋkaafa buri li.
O mi o ni yɛn niŋ shɛm zaŋ naɣikɔra tɔroko kpe di ni
no li ka di biɛlim ku bɔɣi.
29Dimbɔŋɔ gba nyɛla din yi Yawɛ ŋun nyɛ Tɔbbihi Naa ŋɔ sanna.
O saɣisiri niriba viɛnyɛliŋga,
ka nyɛ yɛm zaalana.
Currently Selected:
Aizaia 28: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
