Aizaia 26

Naawuni ni ti o niriba nasara

1Dindali maa, niriba ni ti yili yilli ŋɔ Juda tiŋgbɔŋ ni yɛli,

“ Ti tiŋ’ ŋɔ mali yaa!

Naawuni n-nyɛ ŋun guli di goma!

2Yoomiya tiŋ’ maa dunoya,

ka chɛ ka zuliya shɛli din

niriba nyɛ wuntizɔriba

ka ʒe yim ŋɔ gari kpe.

3A ni ti ninvuɣ’ shɛb’ bɛn ʒe yim,

ka lihir’ a ninni la suhudo’ maŋli,

bɛ ni niŋ a naani zuɣu.

4Niŋmiya Yawɛ naani sahakam,

dama Yawɛ ŋun nyɛ Naawuni maa

n-taɣiri ti ka chɛri zaɣ’ biɛɣu sahakam.

5O filim karimbaannima;

ka saɣim bɛ tiŋ’ din mali yaa;

ka daai di goma luhi tiŋa.

6Bɛn nyari nahiŋgu mini

nandaamba ni be di ni chani gindi

ka mali bɛ naba nɔri li.

7Nyin’ ŋun be tibi ŋɔ

m-mali soli din be

polipoli ti wuntizɔriba.

Bɛ ni doli so’ shɛli nyɛla

so’ viɛlli.

8Yawɛ, ti dolila

a yubu ni nyɛ shɛli,

ka niŋ a ni doli so’ shɛŋa

kariti saria naani.

A kɔŋko ka ti kul bɔra.

9N suhu zaa kul yɛla

a zuɣu yuŋ.

Nyini ka n suhu zaa kul bɔra.

Dama a yi kari dunia

mini niriba bɛn be di ni saria,

di chɛmi ka bɛ baŋdi din tuhi.

10A yi niŋ ninvuɣ’ biɛri nirilim,

bɛ bi bɔhindi din tuhi niŋbu.

Hal bɛ ni kul be

wuntizɔriba tiŋgbɔŋ ni la zaa yoli,

bɛ bi niŋdi din tuhi.

Bɛ bi saɣi ni Yawɛ

nyɛla ŋun galisi.

11 # Hib 10.27 Yawɛ, a kpuɣ’ a nuu zuɣusaa,

amaa bɛ bi nya li.

Chɛ ka bɛ baŋ a ni

yur’ a niriba shɛm,

ka chɛ ka bɛ di vi.

Zaŋm’ a ni yɛn zaŋ

buɣim shɛli wɔb’ a

dimnim’ la wɔb’ ba.

12Yawɛ, a ni ti ti suhudoo;

dama yɛlimaŋli,

nyini n-chɛ ka ti niŋ

ti ni niŋ shɛlikam zaa.

13Yawɛ ŋun nyɛ ti Naawuni ŋɔ,

duumanim’ shɛba n-yi su ti,

amaa a kɔŋko ka ti mi.

14Bɛ kpiya ka ku lan be yaha.

Bɛ shihi ku lan yiɣisi,

dama a darigi bɛ tibili

ka chɛ ka bɛ kpi;

so ku lan teei bɛ yɛla yaha.

15Amaa Yawɛ, a chɛ ka ti yɛligi,

ka chɛ ka ti tiŋgbɔŋ

tintarisi yɛligi pahi,

ka ti ti a jilima di zuɣu.

16Yawɛ, a ni daa darig’ a

niriba maa tibili la,

bɛ nandahima puuni,

bɛ daa suh’ a pam.

17Yawɛ, a chɛ ka ti kuhimi

kaman paɣa ni wolisiri

ni o dɔɣi ka kuhiri

biɛrim zuɣu shɛm la.

18Ti daa wolisirimi ka kuhiri biɛrim zuɣu,

amaa ka ti lee bi dɔɣi shɛli.

Ti bi di nasara; ti mi bi dɔɣi so

ni o zani ti zaani dunia ŋɔ ni.

19Yi ninvuɣ’ shɛb’ bɛn kpi

ni ti neei kum ni.

Yinim’ bɛn zaa kpi

m-be gbala ni,

yiɣisimiya yili suhupiɛlli yila.

Maligim ni luri mahigiri

tiŋgbani shɛm la,

lala ka tiŋgbani yɛn chɛ

ka ninvuɣ’ shɛb’

bɛn pun kpi la neei.”

Saria karibu mini niriba labisibu na

20N niriba, kpɛmiya yi duri ka yo yi dunoya. Sɔɣimiya ka di tooi biɛla ha, ka Naawuni suhuyiɣisili maa saha gari. 21Dama Yawɛ ni yi o biɛhigu shee alizanda ni kana ti darigi dunianim’ tibili bɛ tuumbiɛri zuɣu. Bɛ ni daa ku ninvuɣ’ shɛb’ ashilɔni zaa yɛla ni ti yi palo, ka tiŋgbani ti ku lan sɔɣi bɛ ni daa ku ninvuɣ’ shɛb’ maa.

Currently Selected:

Aizaia 26: RLDB

Highlight

Copy