Aizaia 25

Wumpaɣibo yilli

1Yawɛ, nyini n-nyɛ n Naawuni;

n ni duh’ a ka paɣ’ a yuli.

A ʒiɛyimtali puuni,

a pal’ a ni daa pun lo nia shɛŋa

kurimbuni ha, ka di mali alahiziba la.

2A chɛ ka tiŋ’ kara zani dabari;

ka saɣim bɛ ni me bin’

shɛŋa taɣi bɛmaŋa.

Tinzunnim’ ni me nayiya

shɛŋa luya, ka so ku lan

lab’ me li zali yaha.

3Zuliya shɛb’ bɛn mali yaa

ni ti a jilima.

Zuliya shɛb’ bɛn nyɛ putɔɣunim’

ni lu a sizuura.

4Dama a nyɛla tarimba

ni sɔɣiri so sani;

ka nyɛ nandaamba bɛn

be nandahima ni

ni sɔɣiri so sani.

A sani ka bɛ ni be

ka sanʒiɛɣu pɔhim

ku tooi niŋ ba shɛli,

ka wuntaŋ’ tulim gba ku paai ba.

Putɔɣunim’ ni daa liriti niriba

kaman kikaa saha sanʒiɛɣu la,

5ka tinzunnim’ vuri ŋmani

tiŋgban’ kuŋ ni tulim la,

a daa chɛ ka sagbana limsi li

n-ku di tulim maa,

ka putɔɣunim’ maa chɛ yila yilibu.

Naawuni mali chuɣu puhibu shili ti o niriba

6Yawɛ ŋun nyɛ Tɔbbihi Naa ŋɔ ni chɛ ka bɛ duɣi chuɣu bindir’ suma, ka bo wain kura mini bindir’ suma din mali kpam ni wain shɛli bɛ ni te viɛnyɛliŋga n-ti zuliya kam zaa zoli ŋɔ zuɣu. 7O ni vuui suhugarigu sagban’ shɛli din sirigina ti pili zuliya kam zaa maa zoli ŋɔ zuɣu. 8#1 Kɔr 15.54; Kah 7.17; 21.4 Di saha Yawɛ ŋun nyɛ ti Duuma ŋɔ ni ti kpihim kum birili, ka nyahi sokam zaa nintam, ka vuui o niriba ni nyari filiŋ shɛl’ la dunia ŋɔ ni zaa. Man’ Yawɛ n-yɛli lala maa.

9Dindali maa, niriba ni ti yɛli, “Ti Naawuni m-bɔŋɔ! Ti pun guhir’ o mi ni o tiligi ti. Yawɛ ŋun nyɛ ti ni pun guhiri so la m-bala. Chɛliya ka ti mali suhupiɛlli o ni tiligi ti maa zuɣu.”

Naawuni ni darigi Mɔabnim’ tibili

10Yawɛ ni guli Ziɔn Zoli, amaa niriba ni no n-taai Mɔabnima kaman bɛ ni nɔri mɔri niŋdi kulim bɔɣili ni shɛm la. 11Bɛ ni teei bɛ nuhi kaman kɔduɣiriba ni teeri bɛ nuhi ni bɛ duɣi kom shɛm la. Amaa bɛ ni yɛn zaŋ bɛ nuhi niŋ shɛm zaa yoli, bɛ ni bahi di vi. 12#Aiz 15.1—16.14; Jɛr 48.1-47; Ɛzɛk 25.8-11; Amɔs 2.1-3; Zɛf 2.8-11 Bɛ ni me goon’ shɛŋa din du ka mali yaa taɣi bɛmaŋ’ la zaa ni kab’ lu tiŋ’ dahim zaa.

Currently Selected:

Aizaia 25: RLDB

Highlight

Copy