Aizaia 24
24
Yawɛ ni darigi dunianim’ tibili
1Yawɛ mali shili ni o saɣim dunia ŋɔ
n-dahimdahim li sɔŋ.
O ni chɛ ka tiŋgbani dam
ka sokam gbaai zɔbu.
2Din ti yɛn niŋ niriba,
dina nti yɛn niŋ adiini karimba;
ka din ti yɛn niŋ dabili,
dina nti yɛn niŋ o duuma;
ka din ti yɛn niŋ dab’ paɣa,
dina nti yɛn niŋ paɣ’ so ŋun su o;
ka din ti yɛn niŋ ŋun da,
dina nti yɛn niŋ ŋun kɔhi;
ka din ti yɛn niŋ sandihira,
dina nti yɛn niŋ sandira;
ka din ti yɛn niŋ ŋun zaŋdi liɣiri paŋdi niriba,
dina n ti yɛn niŋ ŋun paŋdi liɣiri gba.
3Dunia shiri ni ti dahimdahim doya,
ka bɛ ʒe di zaa.
Yawɛ n-yɛli lala maa.
4Dunia ni ti zaɣi n-kuui zaa;
ka sagbana mini dunia zaa zaɣi.
5Daadamnim’ saɣim dunia,
dama bɛ birigi Naawuni zalikpana
min’ o zaligu shɛŋa din pahi,
ka saɣim o ni daa lo alikauli shɛli
ni di kul beni sahakam la.
6Dinzuɣu ka noli di dunia,
ka niriba bɛn be di ni di wahala bɛ taali zuɣu;
ka di chɛ ka daadamnim’ kul filinda
hal ka niriba biɛla nti kpalim.
7Wain tihi kuuya,
ka wain dii bi lan nyara,
ka ninvuɣ’ shɛb’ bɛn mali suhupiɛlli liɣi ʒini.
8Guŋgombihi din kumsi tiri suhupiɛlli
mini mɔɣilɔnim’ kumsi foya,
ka bɛn yɔri suhupiɛlli vuri gba fo.
9So bi lan nyuri wain ka yiini yila;
ka binnyuri kpɛma leei din to bɛn nyuri li sani.
10Barina ni paai tin’ shɛli maa lumi dahim,
ka yili kam zaa dunoya kpari,
ka so ku tooi kpe di ni.
11Wain kalinsi zuɣu chɛ ka niriba doli soya kumda,
ka suhupiɛlli kam naai,
ka dunia ŋɔ suhupiɛlli zo;
12ka tiŋ’ maa lu n-dahim,
ka di dunoya kabisikabisi.
13Lala n-yɛn niŋ zuliya kam zaa
bɛn be dunia ŋɔ ni.
Di ni ti ŋmanila bɛ ni yi wɔbi
olivi tiwala din bahindi nyaaŋa
ka yihiri wain tiwal’ yiha
bɛ ni yi wɔbi li naai saha shɛli la.
14Ninvuɣ’ shɛb’ bɛn kpalim
ni ti yili yila ni suhupiɛlli;
ka ninvuɣ’ shɛb’ bɛn be wulinluhili polo
ti yɛli Yawɛ ni galisi shɛm yɛla.
15Dinzuɣu wulimpuhili polo nim’
ni ti tibigi Yawɛ;
ka bɛn ʒi n-dolisi teeku tibigi
Yawɛ ŋun nyɛ Izraɛlnim’ Naawuni ŋɔ yuli.
16Ti ni ti wum wumpaɣibo yila
din tibigiri Wuntialan’ ŋɔ
dunia ŋɔ luɣ’ shɛlikam zaa.
Amaa ka n yɛli, “Mbusim paai ma.
N lan ka tahima,
dama bilikɔɣinim’ kul tumdila
bɛ bilikɔnsi tuma pahira.
17Dunianima, wummiya,
dabiɛm mini bɔɣ’ biɛri
ni zana n-ʒe n-gun ya.
18Ninvuɣ’ so ŋun ti wum dabiɛm maa yɛla
ka zɔri ni ti lu bɔɣili ni,
ka ŋun mi ti zo n-yi bɔɣili maa ni na,
zana ni gbaag’ o.
Dama sa’ kurili ni ti luna,
ka tiŋgbani zaa sɔhira.
19Tiŋgbani ni ti dam damdi biɛɣu
n-tahi bɔɣi n-chɛrisichɛrisi.
20Dunia ni ti laani kaman ninvuɣ’ so
ŋun nyu dam kuli,
ka viini kaman suɣili la.
Di tuumbiɛri tibisim
nti yɛn marigi li ka di lu,
ka ku lan yiɣisi yaha.
21Di saha Yawɛ ni ti darigi
yiko shɛŋa din be zuɣusaa tibili,
ka darigi dunia ŋɔ nanim’ tibili.
22Bɛ ni ti laɣim be vol’ ni sarika ni,
ka o yo ba niŋ di ni zali
gu bɛ tibidarigibo saha.
23Di saha goli ti ku piɛla,
ka wuntaŋ’ ti zibigi,
dama Yawɛ ŋun nyɛ Tɔbbihi Naa ŋɔ
ni ti di nam ʒini Ziɔn Zoli zuɣu ni Jɛrusalɛm,
ka o ti kahig’ o jilima wuh’ o niriba toondaannima.”
Currently Selected:
Aizaia 24: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
