Aizaia 23

Fɔnisia#23.0 FƆNISIA: Tiŋ’ ŋɔ yu’ shɛli daa lan nyɛla Taai yɛla yɛtɔɣa

1Fɔnisia yɛla yɛtɔɣa m-bɔŋɔ:

Yinim’ Speen ŋarima din be teeku ni,

kummiya ni suhugarigu!

Dama Taai luya

ka lan ka yili bee kulinoli.

Niriba daa yila Saipurus na

nti wum di yɛla.

2Yinim’ teeku noli tinsinim’

mini Sidɔnnima, maamiya yi ni.

Yi daabihi bela teeku ni bɔri azichi tiri ya.

3Yi chɛ ka bɛ dolila teeku chani dari

Ijipti kawaan’ shɛli bɛ ni ŋahi Nail Mɔɣili duli la kɔhira.

Yi nyɛla zuliya kam kɔhigɔriba.

4Mbaye Sidɔn, a di vi,

dama teeku birini yɛliya,

“N na ʒi n-wolisi bee n-dɔɣi.

M mi na ʒi n-wumsi

nachimpola bee paɣipiɛlisi.”

5Hal Ijiptinim’ yi wum ni Taai wurimya,

di ni niŋ ba nandahima pam.

6Fɔnisia, kummiya ka chɛ ka nandahima mali ya.

Zomiya kuli Speen.

7Taainim’ kurimbuni ha suhupiɛlli tiŋ’ la m-bala?

Tiŋ’ maa ni ka niriba daa yi

n-du teeku duli ti ʒini la?

8 # Ɛzɛk 26.1—28.19; Joɛl 3.4-8; Amɔs 1.9-10; Zak 9.1-4; Mat 11.21-22; Luk 10.13-14 Ninvuɣ’ ŋuni n-lee bo yɛlli ti Taainim’ ŋɔ?

Taai din nyɛ tin’ shɛli din leeri nama,

ka di kɔhigɔriba nyɛ nabihi,

ka di daa bihi mi nyɛ

bɛn mali jilima pam dunia ŋɔ ni la?

9Yawɛ ŋun nyɛ Tɔbbihi Naa ŋɔ n-bo li ti ba.

Ŋuna n-niŋ lala ni o vuui

bɛ barinyubo shɛli bɛ ni nyuri

zaŋ chaŋ bɛ ni tum shɛli polo la,

ka dihi bɛ ni tibigi ninvuɣ’ shɛb’ zaa dunia ŋɔ ni vi.

10Yinim’ Speennima,#23.10 SPEENNIMA: Kurimbuni ha bɛ daa booni speennim’ la Tarishishinima. Speennim’ mini Tarishishinim’ nyɛla yim.

labimiya yimaŋmaŋ’ tiŋgban’ ni.

Kpe lan pala teeku kulinoli.

11Yawɛ n-teeg’ o nuu tiri teeku maa,

ka chɛ ka dabiɛm gbaai di nanima,

ka zali ni bɛ saɣimmi Keenan birininima.

12Sidɔnnima, yi ku lan mali suhupiɛlli,

ka yi niriba ni nya nahiŋgu.

Hal bɛ yi zo n-kuli Saipurus,

bɛ na kul bi yi.

13Babilɔnnima n-daa niŋ lala maa;

pa Asirianim’ n-daa zaŋ Taai leei mɔɣu ni biŋkɔbiri biɛhigu shee.

Babilɔnnim’ n-daa me bimbina

din du n-tabili bɛ goma,

ka daai Taai birini mini di nayiya luhi;

ka di lu n-dahim.

14Speen ŋariŋduhiriba,

kummiya ka chɛ ka nandahima mali ya,

dama bɛ saɣim yi birininima.

15Di saha maa bɛ ni ti tam Taai yɛla yuun’ pisopɔin

din nyɛ naa yuusim tariga la.

Yuun’ pisopɔin maa yi ti paai,

Taai ni ti ŋmanila bɛ ni zaŋ pagɔr’ so yɛla yili yilli.

16Nyin’ ŋun nyɛ bɛ ni tam pagɔr’ so yɛla ŋɔ,

kpuɣim’ a mɔɣilo chaŋ gili tiŋ’ puuni.

Ŋmɛm’ biŋkumda ka di nyaɣisa,

ka yili yila pam ka di chɛ

ka bɛ lan teeg’ a yɛla.

17Yuun’ pisopɔin maa saha yi ti paai, Yawɛ ni chɛ ka Taai tiŋgbɔŋ maa lan lab’ di tuun’ kura ni yaha n-lan zaŋ dimaŋ’ kɔhi dunia ŋɔ nanim’ zaa zuɣu kaman pagɔrili la. 18Bɛ ni ti zaŋ di kɔhigu nɛma mini di liɣiri ti Yawɛ. Bɛ ti ku zaŋ di shɛli sɔŋ, amaa ninvuɣ’ shɛb’ bɛn jɛmdi Yawɛ nti yɛn zaŋ di liɣiri maa da bindira pam ni situr’ shɛŋa di ni simdi ni bɛ mali.

Currently Selected:

Aizaia 23: RLDB

Highlight

Copy