Aizaia 22

Jɛrusalɛm yɛla yɛtɔɣa

1Vinvamli din yuli booni Ʒii Nyabu Vinvamli yɛtɔɣa m-bɔŋɔ:

Bɔ n-niŋ?

Bɔzuɣu ka tiŋ’ ŋɔ niriba zaa

tam mɔpila zuɣu puhiri chuɣu?

2Tiŋ’ ŋɔ niriba zaa kul tahirimi.

Bɛ kul malila suhupiɛlli ka yɔri vuri.

Yi ninvuɣ’ shɛb’ bɛn kpi

pala bɛ ni zaŋ takɔb’ ku shɛba,

bɛ mi pala bɛn kpi tɔbu ni.

3Yi zuɣulaannim’ zaa daa laɣimmi guui.

Pa piɛma ka bɛ daa zaŋ to n-gbahi ba.

Bɛ daa gbahi bɛ ni daa nya yi ninvuɣ’ shɛb’ zaa

hal bɛ ni daa kul zo n-chaŋ katiŋ’ la zaa yoli.

4Dinzuɣu ka n yɛli,

“Zomiya ka chɛ ma

ka n kum pam m pubiɛ’ niriba kum zuɣu.

Di bɔriya ni yi maai n suhu.”

5Lubu din mali dabiɛm pam

mini chirachira be

Ʒii Nyabu Vinvamli ni,

ka bɛ daai ti tiŋ’ goma luhi,

ka ŋme sɔŋsim bɔbu kuŋ’ bahi zoya ni nima.

Yawɛ ŋun nyɛ Tɔbbihi Naa ŋɔ

n-niŋ lala maa.

6Ka Ɛlam tiŋgbɔŋ ni tɔbbihi

daa nyaɣi lɔɣiri

ba yuri n-zaŋ chɛchɛbunsi kana.

Ka Kɛɛr tiŋgbɔŋ ni tɔbbihi

mi daa gbibi nyɔtaɣirisi.

7Yi vinvam’ shɛŋa din mali kulim puuni

zaa daa palila chɛchɛbunsi,

ka wɔribariba ʒe dunɔdaya ni.

8O daa chɛ ka Judanim’ ku tooi zabi bɛmaŋ’ zuɣu.

Dindali maa, yi daa chaŋla tibɔŋ ni bidibbina duu la ni nti yihi bidibbina. 9Ka yi daa nya ka bɛ chibichibi Dauda tiŋ’ la gooni voya; ka yi daa taɣi kom sɔŋ di biaŋ din be tiŋli la ni. 10Yi daa kali Jɛrusalɛm yiya, ka wurim yiya maa n-zaŋ di bilichiisi me di gooni zali. 11Ka yi daa gbi kɔbɔɣili sɔŋ goma ayi sunsuuni ni beeŋ kurili la ni kom zɔrina ti luri di ni. Amaa ka bi lihi nya ŋun daa pun niŋ li bee n-chɛ ka yi baɣa be ŋun daa pun lo di nia zali ka di waɣ’ la ni.

12Ti Duuma Yawɛ ŋun nyɛ Tɔbbihi Naa ŋɔ

yɛliya ni yi kummi ka fabili,

ka pini zuɣukpina,

ka pili buri.

13 # 1 Kɔr 15.32 Amaa ka yi ti malila suhupiɛlli

ka puhiri chuɣu,

ka kɔri naɣilahi mini piɛri

ŋ-ŋubiri bɛ nimdi ka nyuri wain ka yɛra,

“Chɛliya ka ti di ka nyu,

dama biɛɣuni ti sa ni kpi.”

14Ka Yawɛ ŋun nyɛ Tɔbbihi Naa ŋɔ

maŋmaŋ’ daa yɛli ma,

“N ku chɛ bɛ tuumbiɛɣu ŋɔ taali

hal ka bɛ ti yi dunia yili.

Mani yi Duuma Yawɛ ŋun nyɛ Tɔbbihi Naa ŋɔ

n-yɛli lala maa.”

Bɛ kpahi Shɛbina zuɣu ni

15Yawɛ ŋun nyɛ Tɔbbihi Naa ŋɔ daa yɛli ma, “Cham’ Shɛbina ŋun nyɛ nayili tumtumdiba zuɣulan’ la sani nti bɔh’ o, 16‘Bɔ ka a su kpe? Ŋuni ka a lee mi kpe hal ka ti gbir’ amaŋmaŋ’ gballi kpe n-chibiri daboli zuɣu tampiŋ ni? 17Zɔri, Yawɛ ni to n-kpuɣ’ a ni suli n-zaŋ ti labi. O ni gbaag’ a kirikiri 18n-zaŋ a vilivili labi pal’ yaɣu ni kaman bolli la. Ka a kpi nimaani ka chɛ a chɛchɛbun’ shɛŋa a ni mali nyuri bara maa bahi nimaani. A nyɛla ŋun dih’ a dan’ yiŋ’ vi! 19N ni yih’ a a tuma ni, ka yih’ a a zaashee maa.’ ”

20Dindali maa, n ni boli Hilikia bia Ɛliakim ŋun nyɛ n dabili la na 21nti zaŋ a kparibu yɛl’ o, ka zaŋ shɛlɔrigu lo o; ka zaŋ a yiko niŋ o nuu ni, ka o leei Jɛrusalɛmnim’ mini Judanim’ ba. 22#Kah 3.7 Ka n lan zaŋ Dauda zuliya saafe ti o, ka o ti yooi, ka so ku tooi yo bee ka o ti yo, ka so ku tooi yooi. 23N ni zaŋ o kpa luɣ’ viɛlli shee viɛnyɛliŋga kaman kpaa la, ka o leeg’ o daŋ niriba jilima nam ʒiishee.

24Amaa bɛ ni ti zaŋ o daŋ niriba mini bɛ bihi ni bɛ yaansi zaa ʒili nyaɣil’ o m-pahi lahi balibu kam, din nyɛ pipihi zaŋ tabili lahi ni duɣ’ bihi zaa. 25Yawɛ ŋun nyɛ Tɔbbihi Naa ŋɔ yɛliya, “Di saha maa kpa’ shɛli din daa kpa luɣ’ viɛlli shee la ti ku lan beni, bɛ ni ti ŋma li luhi, ka ʒi’ shɛli din daa ʒi di zuɣu la kpalim yoli.” Yawɛ n-yɛli lala maa.

Currently Selected:

Aizaia 22: RLDB

Highlight

Copy