Aizaia 17
17
Naawuni ni darigi Sirianim’ mini Izraɛlnim’ tibili
1Damaskus yɛla yɛtɔɣa m-bɔŋɔ:
Nyama, Damaskus ku lan nyɛla tiŋa.
Di ni kabi lu n-duhi doya.
2Siria tinsi ni zani dabari zaa.
Mɔri ni be nimaani,
ka niɣi mini biŋkɔbbaligu ŋubira,
ka so ku kari ba.
3 #
Jɛr 49.23-27; Amɔs 1.3-5; Zak 9.1 Ifriim tiŋgbɔŋ ku lan mali birini,
ka Damaskusnim’ kɔŋ nam.
Ka Aramnim’ bɛn kpalim ni kɔŋ jilima
kaman Izraɛlnim’ ni kɔŋ shɛm la.
Yawɛ ŋun nyɛ Tɔbbihi Naa ŋɔ
n-yɛli lala maa.
4“Dindali maa, Izraɛlnim’ ni ti nya filiŋ,
ka kɔɣisi yi fini zaa.
5Izraɛlnim’ ni ti ŋmanila bɛ ni kpuɣi pu’ shɛli atam,
ka be kaman bɛ ni yihi binyiha pu’ shɛli din be Rɛfaim Vinvamli ni.
6Bɛ puuni niriba biɛla kɔŋko n-ni kpalim,
ka Izraɛlnim’ ni bemi kaman bɛ ni wɔbi Olivi ti’ shɛli wala zaa
ka chɛla diba ayi bee ata
niŋ di wula din be zuɣusaa ha zuɣu
bee diba anahi bee anu
niŋ di tiŋli wula zuɣu.”
Yawɛ ŋun nyɛ Izraɛlnim’ Naawuni ŋɔ
n-yɛli lala maa.
7Dindali maa, niriba ni ti ŋmaligi chaŋ bɛ namda ŋun nyɛ Izraɛlnim’ Naawuni ŋun be kasi ŋɔ sani. 8Bɛ ti ku lan niŋ bɛ ni zaŋ bɛmaŋmaŋ’ nuhi me bimbin’ shɛŋa la yɛda. Bɛ mi ti ku lihi bɛ ni zaŋ bɛ nuhi mali binshɛŋa din nyɛ dari mini bɛ ni tuɣindi tulaale zim Ashɛrim bimbin’ shɛŋa zuɣu la ka di nyɛ shɛli.
9Dindali maa bɛ tin’ shɛŋa din mali kpiɔŋ ni ti bemi kaman Hivinim’ mini Amɔrinim’ ni daa zo ka chɛ tin’ shɛŋa bahi Izraɛlnim’ zuɣu, ka di zani dabari la.
10Dama yi tam yi Naawuni ŋun tiligi ya,
ka nyɛ ŋun ʒe n-taɣi ya kaman tampiŋ din mali kpiɔŋ la yɛla.
Dinzuɣu ka yi sa tihi
ni yi jɛmdi tinzun’ wuna.
11Amaa hal yi ni sari li ka di daari pum dindali,
ka neeri biɛɣu zoori la zaa yoli,
di ku wali ka yi pɔhi li;
di kul yɛn tin ya la nandahima ni biɛrim.
Izraɛlnim’ nyaŋ bɛ dimnima
12Ninvuɣ’ shɛb’ bɛn mali kpiɔŋ taaya n-yɔri vuri,
ka di vuri kaman teeku vubu la.
Aa, niriba maa yɔrila vuri,
ka di vuri kaman kom pam vubu la.
13Niriba maa kanimina, ka bɛ chandi vuri ŋmani kom pam vuri,
amaa o ni tahi bɛ zuɣu, ka bɛ zo n-chaŋ katiŋa.
Bɛ ni zo kaman zoya zuɣu wurigu
ni taŋkpa’ shɛli pɔhim mini sanʒiɛɣu ni ʒe m-bahi.
14Di malila dabiɛm yuŋ,
amaa zaŋ chaŋ biɛɣ’ asiba, ka di zo.
Lala n-yɛn niŋ bɛnkam kana
ni bɛ ti ʒe ti tiŋgbɔŋ ŋɔ.
Currently Selected:
Aizaia 17: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
