Aizaia 18

Naawuni ni darigi Itiɔpianim’ tibili

1Itiɔpia mɔɣa duya ha

ka ti wum binyiɣira kpiŋkpama vubu damli.

2Nimaani ka tuumba yi

n-kpe gbiŋgbaŋ ŋariŋ ka Nail Mɔɣili ni na.

Yinim’ tuumba bɛn chani yomyom ŋɔ, labimiya.

Zaŋmiya zilinli ŋɔ lab’ mɔɣa ni pirigi yi tiŋgbɔn’ shɛli maa ni

nti yɛli yi niriba bɛn mali kpiɔŋ,

ka wɔɣawɔɣa, ka bɛ niŋgbuna nyɛlisira,

ka niriba bɛn be yoma

ni katiŋ’ zaa zɔri ba maa.

3Yinim’ bɛn zaa be dunia ŋɔ ni,

bɛ yi ti kpuɣi binshɛli din nyɛ shihirili bin’ la zuɣusaa zoya zuɣu, yin’ lihimiya!

Bɛ yi ti piɛb’ kikaa, yin’ gbilisimiya tibili wum.

4Dama Yawɛ daa yɛli ma,

“N ni be m biɛhigu shee ka lihina baalim

kaman maligim ni lurina yuŋ kachɛɣu saha shɛm

ni kaman biisim ni be wuntaŋ’ ni shɛm la.”

5Zaŋ chaŋ wain tihi pum ti yɛn kpahi lu

ka di wala moori saha shɛli,

Itiɔpianim’ dimnim’ ni kana ti ku ba ka di bi to.

Bɛ ni ti niŋ ba kaman bɛ ni zaŋdi sua

ŋ-ŋmahiri wain tiwula din teei shɛm la.

6Bɛ ni ti chɛ bɛ tɔbbihi bɛn kpi sɔŋ palo ni,

ka zoya zuɣu noonsi mini mɔɣu ni biŋkɔbiri di ba, ka ŋub’ ba.

Noonsi ni ti di ba shɛɣu ni,

ka mɔɣu ni biŋkɔbiri mi ŋub’ ba kikaa saha.

7 # Zɛf 2.12 Di saha maa ninvuɣ’ shɛb’ bɛn wɔɣawɔɣa, ka bɛ niŋgbuna nyɛlisira, ka niriba bɛn be yoma ni katiŋ’ zaa zɔri ba, ka bɛ nyɛ bɛn mali kpiɔŋ, ka nyandi sokam, ka mɔɣa pirigi bɛ tiŋgbɔŋ la ni ti zaŋ pina na ti ti Yawɛ ŋun nyɛ Tɔbbihi Naa ŋɔ. Ziɔn Zoli zuɣu luɣ’ shɛli din nyɛ Yawɛ ŋun nyɛ Tɔbbihi Naa ŋɔ jɛmbu shee la ka bɛ ti yɛn zaŋ li du.

Currently Selected:

Aizaia 18: RLDB

Highlight

Copy