Aizaia 16

Mɔabnim’ be yɛla ni

1Mɔabnim’ daa zaŋla piɛbila

n-yi Sɛla din be tiŋgban’ nɛli polo la

kana ti ti ŋun diri nam ʒi Jɛrusalɛm la.

2Bɛ daa bela Arinɔn Mɔɣili duli guhira,

ka ʒi bɛ ni kpari shɛli polo.

Bɛ daa ŋmanila noon’ shɛb’

bɛ ni kari bɛ tɛri ni bahi.

3Ka bɛ daa yɛli Judanima,

“Wuhimiya ti ni yɛn niŋ shɛm.

Benya kaman ti’ shɛli din chɛ

ka di mahim luri ti zuɣu wuntaŋ’ zuɣusaa saha.

Ti nyɛla bɛn zona ti kpɛn ya ni ti tiligi,

zaŋmiya ti sɔɣi.

4Chɛliya ka ti ʒini yi sani.

Guliya ti ka bɛn bɔri ni bɛ ku ti maa ku paai ti.”

Ŋun nahindi ti maa yi ti lan kani,

saɣiŋgu maa ni zani tariga;

ka ninvuɣ’ kuriba maa gba ku lan be tiŋgbani ŋɔ ni.

5Di saha Dauda zuliya ni so ni ti leei naa,

ka zaŋ ʒiɛyimtali mini yurilim su niriba.

O ni ti niŋ din tuhi yomyom.

Ka chɛ ka niriba doli din tuhi soli.

6Ti wum Mɔabnim’ karimbaani yɛla.

Bɛ nyɛla bɛn duhiri bɛmaŋa ni barinyuriba,

amaa bɛ barinyubo maa nyɛla yoli.

7Dinzuɣu Mɔabnima, kummiya!

Sokam kummi Mɔabnim’ zuɣu.

Bɛ ni ti kum

Kiriharɛsɛt bindira zuɣu.

8Puri din miri Hɛshibɔn

mini Sibima wain tihi puri saɣimya zaa.

Di nyɛla wain tihi din chɛ

ka nanim’ nyuri wain kuuna.

Shɛlini, wain tihi maa wula

mi n-teei hal ti paai Jaza,

ka yi nimaani teei kpa wulimpuhili polo

n-zaŋ hal ni tiŋgban’ nɛl’ la ni,

ka lan zaŋ kpa wulinluhili polo

hal ni Teeku Kpiŋ ni.

9Dinzuɣu n kumdila Sibima

mini Jaza wain tihi zuɣu.

N kumdila Hɛshibɔnnim’

mini Ɛlialɛnim’ zuɣu,

dama bɛ bi kpuɣi puu atam

din ni chɛ ka bɛ suhuri piɛla.

10So ka suhupiɛlli tiŋgban’ shɛli

din mali atam maa ni.

So bi tahiri bee n-yiini yila

wain tihi puri maa ni.

So mi bi nɔri wain tihi wala

ni o yihi wain,

ka so bi wumdi suhupiɛlli tahigu damli.

11Dinzuɣu n suhu zaa saɣimla Mɔabnim’

mini Kirihɛrɛsinim’ zuɣu

kaman bɛ ni zaŋ mɔɣilo ŋmɛri nandahima yil’ shɛli.

12Mɔabnim’ dula bɛ buɣa zoya, ka chaŋ ti kpe bɛ buɣa jɛmbu duri ni n-fabili niŋ ba je, ka di bi sɔŋ ba.

13Yawɛ ni daa pun yɛli shɛm zaŋ chaŋ Mɔabnim’ polo m-bala. 14#Aiz 25.10-12; Jɛr 48.1-47; Ɛzɛk 25.8-11; Amɔs 2.1-3; Zɛf 2.8-11 Amaa pumpɔŋɔ Yawɛ yɛliya, “Yuma ata puuni, Mɔabnim’ ni ti kɔŋ bɛ ni mali shɛli saha biɛla puuni kaman padiriba saha ni bi galisi shɛm la. Bɛ ni kul galisi maa zaa yoli, bɛ ni ninvuɣ’ shɛb’ bɛn yɛn kpalim ni nyɛla biɛla, ka bɛ mi ku mali yaa.”

Currently Selected:

Aizaia 16: RLDB

Highlight

Copy