Aizaia 14
14
Bɛn be dabitim ni labbuna
1Amaa Yawɛ ni lan zo Yaakubu zuliya bɛn nyɛ Izraɛlnim’ ŋɔ nambɔɣu, ka lan pii ba n-zaŋ ba labisi bɛmaŋmaŋ’ tiŋgbɔŋ ni yaha; ka chɛ ka tinzunnim’ zaŋ bɛmaŋ’ pahi Yaakubu zuliya maa zuɣu n-doli ba labi. 2Niriba pam ni sɔŋ ba ka bɛ labi bɛ tiŋgbɔn’ shɛli Yawɛ ni daa zaŋ ti ba la ni. Niriba maa yɛn nyɛla dabidɔbba mini dabipaɣiba ka Izraɛlnim’ su ba, ka bɛ tumdi tuma tiri bɛn’ Izraɛlnim’ maa Yawɛ ni zaŋ tiŋgbɔn’ shɛli ti ba maa ni. Ninvuɣ’ shɛb’ bɛn daa zaŋ Izraɛlnim’ leei bɛ daba la ŋmaligi leei Izraɛlnim’ daba, ka Izraɛlnim’ maa su ninvuɣ’ shɛb’ bɛn daa nahindi ba maa.
Babilɔn naa ŋun be kpiimba biɛhigu shee
3Yawɛ ni yihi ya yi ni daa nyari biɛrim shɛli mini wahala shɛŋa ni, ka yihi ya tuun’ kpɛma mini bɛ ni daa muɣisiri ya ka yi tumdi tuun’ shɛŋa la tumbu ni. 4Di saha yi ni ti mali Babilɔn naa ansarisi yɛli,
“Na’ putɔɣulan’ la luya
ka ku lan tooi nahim so yaha!
5Yawɛ chɛ ka na’ biɛri
yiko zan’ tariga.
6Bɛ nyɛla bɛn doli suhuyiɣisili soli
n-nahindi bɛ ni su zuliya shɛba,
ka kul bi chɛri ba putɔɣu nahiŋgu maa.
7Pumpɔŋɔ dunianim’ zaa yipa vuhiya,
ka nya suhudoo,
ka sokam yiini yila ni suhupiɛlli.
8Lɛbanɔn sipirɛs mini sida tihi
malila suhupiɛlli naa maa lubu maa zuɣu, ka yɛra,
‘Pumpɔŋɔ a ni lu ŋɔ,
so ku lan ŋma ti luhi yaha.’ ”
9Kpiimba biɛhigu shee nim’ malila shili
ni bɛ deei Babilɔn naa.
Bɛnkam zaa daa nyɛ nanim’ dunia ŋɔ ni
yiɣisiya ni bɛ puh’ a.
Bɛn zaa daa nyɛ zuliya shɛb’ nanim’ ni yiɣisi
bɛ nam ʒiishɛhi puh’ a.
10Bɛ zaa ni ti yaai
bɛ noli yɛl’ a,
“A gba gbarigimi kaman ti ni gbarigi shɛm.
Ti min’ a zaa niŋla yim!”
11Bɛ daa yi ŋmɛrila mɔɣilɔnim’ jɛmd’ a,
amaa pumpɔŋɔ nyini m-be kpiimba biɛhigu shee ŋɔ.
Binneen’ yiɣira bɛn ŋmani zunzuya n-nyɛ a bindoo,
ka zunzuya nyɛ a chinchini ka a zaŋ pili.
12 #
Kah 8.10; 9.1 Nyin’ biɛŋmariga ŋun ne pam ŋɔ,
nyam’ a ni yi zuɣusaa lu tiŋ’ na shɛm!
Nyin’ ŋun daa dihi zuliya pam vi ŋɔ,
bɛ daag’ a luhi tiŋa.
13A daa lo a suhu ni
ni a ni du zuɣusaa ha
n-chaŋ ti yaɣi Naawuni saŋmarisi zuɣu
n-zaŋ a nam kuɣ’ zali nimaani.
A daa tɛhiya ni a ni chaŋ ti ʒini laɣiŋgu zoli din du pam
ka be nuzaa polo la zuɣu.
14A yɛliya ni a ni du nti tam sagbana zuɣu
n-zaŋ amaŋ’ leei kaman Zallakudura Naa.
15 #
Mat 11.23; Luk 10.15 Amaa bɛ zaŋ a na ti niŋ kpiimba biɛhigu shee bɔɣ’ zilinli ni.
16Ka bɛn ti nya a ni ti kpaai bɛ nina kpa a
ka di gari ba ka bɛ bɔhira,
“Pa doo ŋɔ n-daa dam dunia zaa,
ka chɛ ka dabiɛm kpe zuliya kam zaa la?
17Nyin’ ŋun daa chɛ ka dunia ŋɔ leei tiŋgban’ nɛli doya,
ka wurim di tin’ kara,
ka bi bahiri a ni gbahi ninvuɣ’ shɛb’ ka bɛ kuni la m-bala?
18Zuliya kam nanim’ kpiya dola
bɛmaŋmaŋ’ gbala ni ni jilima;
19amaa ka bɛ zaŋ nyini bahila katiŋ’
kaman bimpɔŋ la ka chɛ a gballi;
ka bɛ ni daa zaŋ takɔb’ ku ninvuɣ’ shɛb’ pa a zuɣu,
ka bɛ zaŋ ba bahi kuɣa bɔɣili ni
kaman niriba ni nɔri kpiin’ shɛb’ garita.
20Bɛ ku zaŋ a pahi bɛ zuɣu sɔɣi, dama a daa saɣim a tiŋgbɔŋ, ka ku a niriba.
So ku teei a zuliya bɛn nyɛ tuumbiɛtumdiba la ni so yɛla.
21Kumiya o bihi bɛ ba taali zuɣu.
Di chɛliya ka bɛ so ti yiɣisina ti su tiŋgbɔŋ ŋɔ
bee m-me tinsi zali dunia ŋɔ ni yaha.”
Naawuni ni saɣim Babilɔn
22Yawɛ ŋun nyɛ Tɔbbihi Naa ŋɔ yɛliya, “N ni lu Babilɔn zuɣu n-wurim li, ka ku bɛn kpalim be di ni mini bɛ bihi ni bɛ zuliya; man’ Yawɛ n-yɛli lala maa. 23#Aiz 47.1-15; Jɛr 50.1—51.64 N ni chɛ ka Babilɔn leei yuɣimpina biɛhigu shee ni ko’ dooshee, ka zaŋ sɔɣu din ni saɣim li n-kol’ li bahi. Man’ Yawɛ ŋun nyɛ Tɔbbihi Naa ŋɔ n-yɛli lala maa.”
Naawuni ni ku Asirianima
24Yawɛ ŋun nyɛ Tɔbbihi Naa ŋɔ poya yɛli:
“Biɛhiŋ kani,
n ni lo shɛm ni niŋ,
ka n ni zali shɛm
ni niŋ pali.
25N ni ku Asirianim’ bɛn be n tiŋgbɔŋ ŋɔ ni,
ka du n-tam bɛ zuɣu no ba n zoya la zuɣu,
ka tiligi n niriba
Asirianim’ maa ʒi’ tibisa ʒibu ni.
26N ni lo ni n niŋ dunia ŋɔ zaa shɛm m-bɔŋɔ:
N teegi n nuu ni n-darigi niriba tibili.”
27 #
Aiz 10.5-34; Nah 1.1—3.19; Zɛf 2.13-15 Yawɛ ŋun nyɛ Tɔbbihi Naa ŋɔ loya
ni o niŋ dimbɔŋɔ,
ka so mi ku tooi yiɣisi li.
O pun teeg’ o nuu,
ka so mi ku tooi pɔri li.
Naawuni ni ku Filistianima
28 #
2 Nan 16.20; 2 Yɛl 28.27 Naa Ahaz kum yuuni ka yɛtɔɣili ŋɔ daa kana:
29Filistianima, yi zaa di maliya suhupiɛlli,
jaaŋgbe’ shɛli din yi fiɛbiri ya la ni kabigi la zuɣu.
Waɣ’ yino yi kpi, so n-yirina zan’ o zaashee.
Ka o galli waɣiri waɣ’ biɛɣu.
30Faralan’ bi’ tuuli ni di,
ka nandan’ dɔni ni alaafee,
amaa n ni chɛ ka kum ku yi bihi,
ka ku yi puuni bɛn kpalim.
31 #
Jɛr 47.1-7; Ɛzɛk 25.15-17; Joɛl 3.4-8; Amɔs 1.6-8; Zɛf 2.4-7; Zak 9.5-7 Yinim’ Filistianim’ zaa,
chɛliya ka dabiɛm mali ya pam.
Yi tiŋ’ mini di dunoya kuhima!
Dama taŋkpagbiligu ni yi nuzaa polo na,
di nyɛla tɔbbihi bɛn kanna
ka dabiɛmlana ka bɛ ni.
32Wula ka nir’ lee yɛn garigi yɛli Filistianim’ tuumba?
Yawɛ m-me Ziɔn zali,
ka o niriba bɛn nyɛ nandaamba
ni nya biɛhigu shee nimaani.
Currently Selected:
Aizaia 14: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
