Aizaia 13
13
Naawuni darigi Babilɔnnim’ tibili
1Amɔz bia Aizaia ni daa deei yɛtɔɣ’ shɛli zaŋ chaŋ Babilɔnnim’ polo m-bɔŋɔ:
2Duhimiya tuuta zuɣusaa daboli din nyɛ zaɣ’ nɛli zuɣu. Kuhimiya yɛli tɔbbihi, ka kpuɣi yi nuhi zuɣusaa wuhi ni yi cham’ ti liri tin’ shɛli din niriba mali karimbaani la. 3Man’ Yawɛ maŋmaŋ’ ni chɛ ka n ni niŋ n tɔbbi’ shɛb’ naani, ka mali ba nyuri bara la tuhi n suhu ni yiɣisi bahi ninvuɣ’ shɛb’ zuɣu.
4Wummiya zoya zuɣu vuri, salo vuri n-nyɛ li. Wummiya nama balibu mini zuliya balibu niriba tab’ laɣimbu vuri. Yawɛ ŋun nyɛ Tɔbbihi Naa ŋɔ n-laɣindi tɔbbihi ni o tuhi tɔbu. 5Bɛ yila dunia ŋɔ luɣ’ shɛlikam zaa na. Yawɛ zaŋ o suhuyiɣisili bidibbina na ni o ti saɣim dunia ŋɔ zaa.
6 #
Joɛl 1.15
Yawɛ dabisili dali miriya. Kpiɔŋlan’ Naa ni yɛn tahi saɣiŋgu na dabisi’ shɛli dali maa miriya. Fabilimiya! 7Dinzuɣu sokam bɔɣiri ni cheei kom, ka bɛ ku lan mali suhukpeeni. 8Bɛ ni ti nya biɛrim, ka dabiɛm kpe ba pam. Biɛrim maa ni ti ŋmanila paɣ’ ni yi wolisiri ni o dɔɣi ka biɛrim shɛli mal’ o la. Bɛ ni ti lihiri tab’ ninni ka dabiɛm mali ba. Bɛ nini ni ti mooi. 9Nyamiya, Yawɛ dabisili maa dali shiri kanna. Di ti yɛn nyɛla o sujee min’ o suhuyiɣisili ni o putɔɣu niŋbu dali. O ni ti chɛ ka dunia ŋɔ kpalimla tiŋgban’ nɛli, ka ku alahichinim’ bɛn be di ni zaa. 10#Ɛzɛk 32.7; Mat 24.29; Maak 13.24-25; Luk 21.25; Kah 6.12-13; 8.12 Saŋmarisi bɛn laɣim gbilligbilli be zuɣusaa ŋɔ ti ku ne; ka wuntaŋ’ ti ku ne o puhibu na saha, ka goli ti ku piɛla.
11N ni darigi dunia ŋɔ nim’ tibili bɛ tuumbiɛri zuɣu, ka darigi ninvuɣ’ biɛri tibili bɛ tuumbiɛri zuɣu. N ni siɣisi karimbaannim’ mini bɛnkam duhiri bɛmaŋa ni putɔɣunima. 12N ni chɛ ka daadamnim’ nyabu ti niŋ tom kaman salima din viɛla nyabu ni to shɛm la, ka chɛ ka ninsalinim’ nyabu niŋ tom kaman Ofiri salima nyabu ni to shɛm la. 13Dinzuɣu man’ Yawɛ sujee ni n suhuyiɣisili maa dali, n ni ti chɛ ka zuɣusaa dam, ka chɛ ka tiŋgbani dam pam di biɛhigu shee.
14Tinzunnim’ ni ti yiɣisi guui kaman tɔhinima n-kari doli ba la bee kaman piɛri bɛn ka gul’ la n-kuli bɛmaŋmaŋ’ tiŋgbana ni mini bɛ niriba sani. 15Bɛ yi ti nya so, bɛ ni zaŋ bini kuh’ o ka di pili yi, ka bɛ mi yi ti gbaai so, bɛ ni zaŋ takɔb’ ku o. 16Bɛ ni zaŋ bɛ biliɛri fiɛbi bina chɛrisichɛrisi bɛ ninni, ka ʒe bɛ yinsi nɛma, ka bili bɛ paɣiba.
17Nyama, n chɛ ka Miidianim’ maani shili ni bɛ liri ba. Bɛ je anzinfa, bɛ mi baɣa ka salima ni. 18Bɛ ni zaŋ bɛ tɔbiri mini bɛ piɛma n-to n-ku bipola. Bɛ ku zo biliɛri mini bibihi nambɔɣu. 19#Pil 19.24 Babilɔn nyɛla nam tiŋgban’ suŋ gari nam tiŋgbana zaa. Di nyɛla Kalidianim’ jilima ni bɛ ni mali shɛli nyuri bara. Man’ Naawuni ni wurim li kaman n ni daa wurim Sɔdom mini Gomɔra shɛm la. 20So ku lan be nimaani saha shɛlikam yaha. Laribunim’ ku lan ti bɛ suɣa zali nimaani. Piɛguliba mi ku lan chɛ ka bɛ piɛri dɔni nimaani. 21#Aiz 34.14; Zɛf 2.14; Kah 18.2 Amaa mɔɣu ni biŋkɔbiri n-ni be nimaani. Ka viri mini taatahi kpe m-be bɛ yinsi; ka mɔɣu ni buhi be nimaani n-yiɣiri jamda. 22Kunduna ni ti tam bɛ pihi zuɣu kumda, ka yɔbahi be bɛ nayili viɛla puuni kumda. Babilɔn saha miriya, ka di dabisili ku lan tirisi tooni.
Currently Selected:
Aizaia 13: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
