Aizaia 10
10
1Mbusim be yi zuɣu.
Yi zaani zaligu shɛŋa din bi tuhi ni yi nahim niriba.
2Yi mɔŋdi nandaamba yɛlimaŋli,
ka fari yɛlimaŋli n niriba bɛn nyari nahiŋgu la sani,
ka fari pakoya mini kpibisi nɛma.
3Yi tibidarigibo dali, wula ka yi lee ti yɛn niŋ,
ka zaɣ’ biɛɣu ni ti yɛn yi katiŋ’ na ti paai ya dahin’ shɛli, wula ka yi lee ti yɛn niŋ?
Ŋun’ sani ka yi lee ti yɛn zo n-chaŋ ti bo sɔŋsim
bee luɣ’ dini ka yi lee ti yɛn zaŋ yi daazichi sɔŋ?
4Bɛ ni ti kun ya tɔbu ni,
ka gbahi yi ni shɛba ti leei daba.
Amaa di zaa yoli, Yawɛ suhuyiɣisili maa na ku zan’ tariga.
O daa loya ni o darigi bɛ tibili.
Asiria naa ŋun nyɛ Naawuni fiɛbiga
5Inhii, n suhuyiɣisili fiɛbiga
bela Asirianim’ nuu ni.
6N tim ba la ninvuɣ’ shɛb’ bɛn bi mi Naawuni,
ka nyɛ bɛn chɛ ka n suhu yiɣisi pam sani.
N tim ba mi ni bɛ ti di bɛ nɛma,
ka du n-tam bɛ zuɣu n-no ba kaman soli zuɣu taŋkpaɣu la.
7Amaa dimbɔŋɔ pala o ni lo shɛm
bee di pun bela o suhu ni,
amaa o lola nia ni o saɣim
ka kpihim zuliya pam birili.
8Dama o yɛliya,
“N sapashinnim’ zaa nyɛla nanima.
9M pun nyaŋ Kalino mini Karikɛmish,
ka nyaŋ Hamat mini Aripad,
ka nyaŋ Samaria mini Damaskus.
10N ni darigi zuliya shɛb’ bɛn jɛmdi wuna,
ka wuna maa nyɛ din galisi gari wuna din be Jɛrusalɛm mini Samaria la tibili.
11M pun saɣim Samaria mini di wuna,
ka ni saɣim Jɛrusalɛm mini di binnana din be di ni gba lala.”
12Ti Duuma yɛliya, “N yi naai n ni niŋdi shɛlikam Ziɔn Zoli zuɣu mini Jɛrusalɛm, n ni darigi Asiria naa tibili o karimbaani min’ o barinyubo zuɣu.” 13Dama o yɛliya,
“Mmaŋmaŋ’ kpiɔŋ puuni ka n niŋ lala.
M mali yɛm, ka mali baŋsim.
N daai tiŋgbana tintarisi nahi taba,
ka va bɛ nɛma.
N niŋmi kaman naɣilaa la n-ʒe n-yiɣisi nanima bɛ nam ʒiishɛhi.
14Dunia niriba ŋmanila nooŋa tiɛɣu,
ka n laɣim bɛ daazichi n-vaai li
kaman nir’ ni vari gala shɛm la,
ka so bi zaŋ o kpiŋkpaŋ’ gahi ma
bee n-yaag’ o noli ni o chɛ n-kari ma.”
15Amaa lɛhu ni tooi wuhi ni di gari ŋun mal’ li tumdi tuma?
Sua gari ŋun mal’ li ŋmari binyara?
Jaaŋgbee bi kpuɣiri ninsal’ gbibi,
amaa ninsala n-kpuɣiri jaaŋgbee gbibi.
16Dinzuɣu ti Duuma Yawɛ ŋun nyɛ Tɔbbihi Naa ŋɔ
ni chɛ ka dɔro din nyuuri niriba lu bɛn di n-tiɣ’ la zuɣu.
Buɣim ni ti taai bɛ jilima n di li zaa.
17Naawuni ŋun nyɛ Izraɛl neesim
ni leei buɣim zilinli.
Izraɛlnim’ Naawuni ŋun be kasi ŋɔ
ni leei buɣim zilinli n-di
o gɔhi mini suligunyinyari dahin yini.
18Tihi nyɔŋ mini tiŋgbani din mal’ atam,
Yawɛ ni ti saɣim li, o ni ti saɣim niŋgbuŋ min’ o shia,
ka di ni be kaman dɔr’ biɛɣu ni saɣindi ninsal’ niŋgbuŋ shɛm la.
19O tihi nyɔŋ maa ni tihi din kpalim ni nyɛla biɛla, hal ka bia ni tooi kal’ li.
Niriba biɛla n-ni ti labina
20Di saha, Izraɛlnim’ bɛn kpalim ka nyɛ Yaakubu zuliya la ti ku lan zaŋ bɛmaŋ’ dalim zuliya shɛb’ bɛn bahiri ba yol’ la, amaa bɛ ni ti zaŋ bɛmaŋ’ dalimla Yawɛ ŋun nyɛ Izraɛlnim’ Naawuni ŋun be kasi ŋɔ ka biɛhiŋ kani. 21Niriba biɛla bɛn kpalim ka nyɛ Yaakubu zuliya maa ni ti lab’ bɛ Naawuni ŋun nyɛ kpiɔŋlan’ ŋɔ sanna. 22Hal a niriba Izraɛlnim’ ni kul galisi kaman teeku noli bihigu maa, kulla bɛ ni niriba biɛla kɔŋko n-ni ti labina. Bahiyoli din simdi ba kul ʒiɛmi guli ba. 23#Rom 9.27 Dama Yawɛ ŋun nyɛ ti Duuma ni Tɔbbihi Naa ŋɔ ni chɛ ka di shiri niŋ kaman o ni zal’ li shɛm dunia ŋɔ zaa ni.
24Dinzuɣu Yawɛ ŋun nyɛ ti Duuma ni Tɔbbihi Naa ŋɔ yɛliya: N niriba bɛn be Ziɔn, di zɔriya Asirianim’ dabiɛm saha shɛli bɛ yi ti zaŋ fiɛbisi fiɛbiri ya, ka kpuɣi jaaŋgbɛbihi fiɛbiri ya kaman Ijiptinim’ ni daa niŋ shɛm la. 25Dama di ku lan yuui, ka n ni yɛn darigi yi tibili zali shɛm tariga paai, di nyaaŋa ka n chɛ ka n suhu yiɣisi bahi bɛ zuɣu m-bahi ba yoli. 26Man’ Yawɛ ŋun nyɛ Tɔbbihi Naa ŋɔ ni zaŋ fiɛbiga fiɛb’ ba kaman n ni daa fiɛbi Midiannim’ Orɛb tampiŋ gbini shɛm la. N ni ti kpuɣi n fiɛbiga maa teeku kom puuni n-fiɛb’ ba kaman n ni daa niŋ Ijiptinim’ shɛm la. 27Dindali maa Siria naa maa ʒi’ tibisa ti ku lan tam yi bɔɣusapima zuɣu; n ni ti kab’ o naɣikɔra dapuhi din be yi nyiŋgoya ni la.
Niriba liribu
28O yila Rimmon
n-kana Aiyat.
O chaŋ ti kpe Migirɔn gari.
O chɛ o nɛma sɔŋla Mikimash.
29O pun baai du mɔɣili
n-chaŋ ti gbe Gɛba;
ka dabiɛm gbaai Ramanima;
ka Sool ya Gibianim’ yi n-zo.
30Gallimnima, tahimiya!
Laishanima, Wummiya!
Anatɔtnima, garigimiya!
31Madimɛnanim’ mini Gɛbimnim’ zɔrimi
ni bɛ tiligi.
32Zuŋɔ yi dim’ maa be Nɔb;
o ni kpilim o nuu
gahi Ziɔn Zoli
din nyɛ Jɛrusalɛm zol’ la gbini.
33Ti Duuma Yawɛ ŋun nyɛ Tɔbbihi Naa ŋɔ
ni daai ba luhi kaman
bɛ ni yi ŋma tia wula ka di lu shɛm la.
O ni luhi karimbaannim’ mini wɔɣira bɛn be bɛ ni n-dihi ba vi.
34 #
Aiz 14.24-27; Nah 1.1—3.19; Zɛf 2.13-15 O ni ŋma ba luhi kaman bɛ ni zaŋdi kpaŋa ŋ-ŋmari tibɔŋ ni tihi luhiri shɛm la,
ka di lu kaman Lɛbanɔn ti’ suma ni luri shɛm la.
Currently Selected:
Aizaia 10: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
