Yibu 27
27
Sara maligu bimbini
(Yibu 38.1-7)
1“Zaŋmiya gɔpiɛliga dari mali sara maligu bimbini, ka di wɔɣilim nyɛ mita ayi ni biɛla, ka di yɛliŋ nyɛ mita ayi ni biɛla, ka di dubu nyɛ mita yini ni biɛla. Malimiya li zaɣ’ mɔɣu, 2ka mali binyila tam di tarisi bunahi zuɣu, ka di mini di binyila maa zaa nyɛ zaɣ’ yini, ka yi ti niŋ daanya pa di zuɣu. 3Mɛmiya duɣuri n-zaŋdi tampiligim niŋdi di puuni, ka mali soobuya mini taha ni dirijaba ni lahi din ni niŋdi buɣim. Di simdi ka yi ti zaŋ daanya mali di lahi mini duɣuri zaa. 4Zaŋmiya daanya mali kurupooti, ka zaŋ daanya mali bans’ anahi niŋ di tarisi bunahi zuɣu. 5Ka yi ti zaŋ li zali sara maligu bimbini naŋgbaŋkuɣila la lɔŋni, ka di du m-paai sara maligu bimbini maa pirigili tariga zaŋ siɣi tiŋ’ polo. 6Ka yi mali gɔpiɛliga dapuhi, ka niŋ daanya pa di zuɣu, 7ka zaŋ li tu bansi maa ni din ni chɛ ka dapuhi maa be sara maligu bimbini maa yaɣ’ ayi polo saha shɛli yi yi ti ʒiri li chana. 8Zaŋmiya dari mali sara maligu bimbini maa, ka di puuni nyɛ zaɣ’ yɔɣu. Malimiya li kaman n ni daa wuh’ a shɛm zoli zuɣu la.”
Binshɛli din yɛn gili Yawɛ biɛhigu shee suɣili
(Yibu 38.9-20)
9“Di simdi ka yi mali m biɛhigu shee dundɔŋ ka zaŋ tan’ piɛl’ viɛlli din ŋmɛliŋmɛli n-she pateesanim’ din wɔɣilim nyɛ mita pihinahinaanahi n-yil’ li zaŋ labi nudirigu polo. 10Di simdi ka di mali daanya daantalisi pisi mini di ni yɛn tam binshɛŋa zuɣu pisi, amaa ban’ shɛŋa din yɛn yili daantalisi maa mini di dapuhi dina, zaŋmiya anzinfa mal’ li. 11Ka di nuzaa polo gba ni ti mali pateesanim’ din wɔɣilim nyɛ mita pihinahinaanahi ka di daantalisi pisi mini di ni yɛn tamdi binshɛŋa zuɣu pisi la ti nyɛ daanya, amaa ban’ shɛŋa din yɛn yili daantalisi maa mini yi ni yɛn zaŋ binshɛŋa lɔri li la dina, zaŋmiya anzinfa mal’ li. 12Dundɔŋ maa yɛliŋ zaŋ labi wulinluhili polo, di simdi ka di ti mali pateesanim’ din wɔɣilim nyɛ mita pisinaayi yil’ li, ka di mali daantalisi pia mini di ni yɛn tamdi binshɛŋa zuɣu. 13Dundɔŋ maa yɛliŋ zaŋ labi wulimpuhili polo gba, di simdi ka di nyɛla mita pisinaayi. 14Ka pateesa’ shɛŋa din yɛn yili dunɔdali yaɣ’ yini polo wɔɣilim ti pooi mita ayopɔin biɛla, ka di ti mali daantalis’ ata mini di ni yɛn tamdi binshɛŋa zuɣu diba ata. 15Ka yaɣ’ din’ la gba mali pateesa’ shɛŋa din wɔɣilim nyɛ mita ayɔbu ni pirigili, ka mali daantalis’ ata mini di ni yɛn tamdi binshɛŋa zuɣu diba ata. 16Di simdi ka dundɔŋ maa dunɔdali ti mali pateesa’ shɛli din nyɛ tan’ piɛl’ viɛlli din ŋmɛliŋmɛli ka di wɔɣilim nyɛ mita awɛi, ka yi zaŋ gali sabilifaa mini gali ʒiɛkpeein ni gali ʒiɛkpain ni tan’ piɛli viɛlli din ŋmɛliŋmɛli n-zaŋ shɛriga wuɣi binyɛra pa di zuɣu ka di ti mali daantalis’ anahi mini di ni yɛn tamdi binshɛŋa zuɣu diba anahi. 17Di simdi ka yi ni yɛn zaŋ binshɛŋa lo daantalisi din gili dundɔŋ maa zaa ti nyɛla anzinfa ka di bansi ti nyɛ anzinfa, ka di ni yɛn tamdi binshɛŋa zuɣu ti nyɛ daanya. 18Dundɔŋ maa wɔɣilim ni ti nyɛla mita pihinahinaanahi, ka di yɛliŋ nyɛ mita pisinaayi, ka di dubu mi nyɛ mita ayi ni biɛla, ka yi ti zaŋ tan’ piɛl’ viɛlli din ŋmɛliŋmɛli pateesa yil’ li, ka di ni yɛn tamdi binshɛŋa zuɣu ti nyɛ daanya. 19Ka m biɛhigu shee maa duɣuri mini di lahi zaa zaŋ tabili di kpahi mini dundɔŋ maa kpahi zaa ti nyɛ daanya binyɛra.”
Bɛn su firila lihibu
(Lɛvinima 24.1-4)
20“Zalim’ Izraɛlnim’ ka bɛ bɔri olivi kpa’ viɛlli na nti niŋdi firila ni din ni chɛ ka firila maa kul ne n-ʒiɛya sahakam. 21Aduna min’ o bidibisi nti yɛn nyɔri firila maa zaani Yawɛ tooni Yawɛ chirigibu shee suɣili maa puuni pateesa din be Alikauli Adaka tooni polo la kpaŋa zaawuni hal ni asiba. Di ni ti nyɛla zaligu shɛli din kul ni beni sahakam, ka di simdi ni Izraɛlnim’ ti dol’ li ʒiɛmani kam ni.”
Currently Selected:
Yibu 27: RLDB
Highlight
Copy
Compare
Share
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
