Yibu 28
28
Maligumaaniba binyɛra
(Yibu 39.1-7)
1“Piim’ a mabia Aduna min’ o bidibisi Izraɛlnim’ ni, n-chɛ ka bɛ yi n ka a sanna ti leei m maligumaaniba, n-tumdi n tuma; Aduna min’ o bidibisi bɛn yuya booni Nadab mini Abihu ni Ɛliɛza ni Itama. 2Ka a ti she binyɛr’ shɛŋa din be kasi ti a mabia Aduna din ni nyɛ o jilima min’ o nachiinsi binyɛra. 3Ka a boli tuumbaŋdiba bɛn nyɛ ninvuɣ’ shɛb’ n ni zaŋ baŋsim ti na nti chɛ ka bɛ she binyɛra ti Aduna ka o leei m maligumaana. 4Bɛ ni yɛn she binyɛr’ shɛŋa maa n-nyɛ: Nyolɔrigu mini binyɛribil’ din yɛri pari zuɣusaa ni alichɛbba ni bɛ ni wuɣi zabba shɛli ni bantabiga ni shɛlɔrigu. Di simdi ka bɛ she binyɛra din be kasinim’ ŋɔ n-ti a mabia Aduna min’ o bidibisi ka bɛ leei maligumaaniba n-tumdi n tuma. 5Di simdi ka yi ti ti baŋdiba maa salima mini gali sabilifaa ni gali ʒiɛkpeein ni gali ʒiɛkpain ni tan’ piɛl’ viɛlli.
6“Ka bɛ ti zaŋ salima gali mini gali sabilifaa ni gali ʒiɛkpeein ni gali ʒiɛkpain ni tan’ piɛl’ viɛlli din ŋmɛliŋmɛli n-she binyɛribil’ din yɛri pari zuɣusaa. 7Di simdi ka di ti mali bɔɣusapima zuɣu tan’ tolima ayi din ni chɛ ka di mini binyɛribila maa nyɛ zaɣ’ yini, ka o ti mal’ li gar’ o bɔɣusapima zuɣu. 8Ka yi ti zaŋ neen’ yinsi din nyɛ salima kɔtomsi gali mini gali sabilifaa ni gali ʒiɛkpeein ni gali ʒiɛkpain ni tan’ piɛl’ viɛlli din ŋmɛliŋmɛli n-wuɣi shɛlɔrigu ka di mini binyɛribil’ din yɛri pari zuɣusaa la nyɛ zaɣ’ yini. 9Ka a ti zaŋ oniɣisi kuɣ’ ayi n-sabi Izraɛl bidibisi la yuya pa di zuɣu. 10Bɛ niriba ayɔbu yuya ni pa kuɣ’ yini zuɣu, ka niriba ayɔbu la mi yuya pa kuɣ’ din’ la zuɣu, ka a ti chɛ ka di ti doli bɛ kpamli ni nyɛ shɛm. 11Kaman kuɣikpɛra ni zaŋdi chiriga n-chirigiri binyɛra pari kuɣa zuɣu shɛm, lala ka a ti yɛn zaŋ chiriga n-chirigi Izraɛl bidibisi la yuya, ka zaŋ li taɣili di salima bintaɣindisi ni. 12Ka a ti zaŋ kuɣa maa niŋ binyɛribil’ din yɛri pari zuɣusaa maa bɔɣusapima zuɣu tan’ tolima la ni, ka di leei kuɣ’ shɛŋa yi ni yɛn mali teeri Izraɛl bidibisi maa yɛla. Ka bɛ yuya maa ti pa Aduna bɔɣusapima ayi zuɣu saha shɛl’ o yi ti be Yawɛ tooni, ka di nyɛ bɛ yɛla teebu shihirili. 13Zaŋm’ salima mali kuɣa maa ni yɛn taɣili binshɛŋa ni, 14ka zaŋ salima alali m-mali zoligɔnim’ ayi n-ŋmɛl’ li kaman gabisi la n-zaŋ li ga kuɣa maa ni yɛn taɣili binshɛŋa ni maa.”
Nyolɔrigu
(Yibu 39.8-21)
15“Di simdi ka a ti mali sariakaribo nyolɔrigu viɛnyɛliŋga kaman yi ni yɛn she binyɛribil’ din yɛri pari zuɣusaa la shɛm, di simdi ka a ti zaŋ salima gali mini gali sabilifaa ni gali ʒiɛkpeein ni gali ʒiɛkpain ni tan’ piɛl’ viɛlli din ŋmɛliŋmɛli mal’ li. 16Di ni ti nyɛla zaɣ’ mɔɣu ka kpabi yim zuɣu, ka di wɔɣilim ti nyɛ sɛntimita pisinaayi, ka di yɛliŋ gba nyɛ sɛntimita pisinaayi. 17Ka yi ti zaŋ kuɣ’ viɛla pie taba kulis’ anahi zuɣu. Yi ni ti zaŋ kuɣ’ viɛl’ shɛŋa bɛ ni booni kanɛlian mini kirisolait ni ɛmɛrald m-pie taba kul’ shɛli din daŋ tooni, 18ka zaŋ tɛkɔisi mini safaya ni daimɔnd m-pie taba kul’ shɛli din pahir’ ayi, 19ka zaŋ jɛsint mini agɛt ni amɛtisit m-pie taba kul’ shɛli din pahir’ ata, 20ka lan zaŋ bɛril mini oniɣisi ni jasipa m-pie taba kul’ shɛli din pahir’ anahi la. Di simdi ka a ti zaŋ li niŋ salima bintabindisi la ni. 21Di ni ti nyɛla kuɣ pinaayi, ka a ti zaŋ chiriga chirigi Izraɛl bidibisi la yinoyino yuli pa kuɣili kam zuɣu. Niŋmi li kaman bɛ ni niŋdi dalinli shɛli bɛ ni mali dihiri binyɛra zuɣu shɛm la din ni chɛ ka zuliya pinaayi maa yuya be di ni. 22Ka yi ti zaŋ salima alali mali zoligɔnima ŋ-ŋmɛl’ li kaman gabisi la n-zaŋ li niŋ nyolɔrigu maa; 23ka mali salima bans’ ayi n-zaŋ gɔhi nyolɔrigu maa naŋgbambiya. 24Ka yi ti zaŋ salima din ŋmɛli kaman gabisi maa n-gɔhi bansi diba ayi din be nyolɔrigu maa naŋgbambiya maa. 25Ka a ti zaŋ salima gabis’ ayi maa noya gɔhi salima bintaɣindisi la, ka di be o binyɛribil’ din yɛri pari zuɣusaa la bɔɣusapima zuɣu tan’ tolima la tooni. 26Ka a ti lan mali salima bans’ ayi n-zaŋ li gɔhi nyolɔrigu maa puuni naŋgbambiya, ka di miri binyɛribil’ din yɛri pari zuɣusaa maa. 27Ka yi mali salima bans’ ayi n-zaŋ li gɔhi binyɛribil’ din yɛri pari zuɣusaa maa bɔɣusapima zuɣu tan’ tolima ayi la tiŋli di tooni polo miri di tuɣibu shee binyɛribil’ din yɛri pari zuɣusaa maa shɛlɔrigu la zuɣusaa polo. 28Ka bɛ ti zaŋ mi’ sabilifaa lo nyolɔrigu maa bansi la mini binyɛribil’ din yɛri pari zuɣusaa maa bansi la gɔhi taba din ni chɛ ka di pa bɛ ni wuɣi binyɛribil’ din yɛri pari zuɣusaa maa shɛlɔriti la zuɣu din ni chɛ ka nyolɔrigu maa ku be di ko ka chɛ binyɛribil’ din yɛri pari zuɣusaa maa.
29“Ka Aduna ti zaŋ Izraɛl bidibisi maa yuya din sabi pa sariakaribo nyolɔrigu zuɣu la n-ye m-pa o nyɔɣu zuɣu saha shɛl’ o yi ti kpe luɣ’ kasi shee la, ka di nyɛ bɛ yɛla teebu shihirili Yawɛ sani sahakam. 30#Kal 27.21; Zal 33.8; Ɛzra 2.63; Nɛh 7.65 Ka a ti zaŋ Urim mini Tumim#28.30 URIM mini TUMIM: Di nyɛla binyɛra ayi shɛŋa maligumaana ni daa mal’ lihiri baŋdi Naawuni yubu ni nyɛ shɛli. Amaa ti bi jɛndi mi o ni daa niŋdi li shɛm. niŋ sariakaribo nyolɔrigu maa ni, ka di ti pa Aduna nyɔɣu zuɣu saha shɛl’ o yi ti ka Yawɛ tooni na. Dina n-ni chɛ ka lzraɛlnim’ saria karibu yɛla kul be Aduna suhu ni Yawɛ tooni.”
Sara maligumaana binyɛr’ shɛŋa din pahi
(Yibu 39.22-31)
31“Ka a ti zaŋ tan’ sabilifaa n-she alichɛbba shɛli zuɣu o ni yɛn yɛri binyɛribila la para. 32Di simdi ka a chibi di nyiŋgoli ka o zuɣu ni tooi kpe di ni, ka a ti niŋ tani kɔɣili di nyiŋgoli maa zaa gili kaman bɛ ni niŋdi kur’ tolinli niŋdi gbaɣino nyiŋgoli shɛm la ni kaman teela ni niŋdi shɛm la din ni chɛ ka di ku cheei. 33Ka a ti zaŋ gali sabilifaa ni gali ʒiɛkpeein ni gali ʒiɛkpain mali pumpɔrinchihi kɔtomsi niŋ di tiŋli ti tuui ka mali salima buɣilimbuɣilimbihi n-zaŋ li yiliyili di sunsuuni gili. 34A yi zaŋ salima buɣilimbuɣilimbila yili, ka a zaŋ pumpɔrinchihi kɔtomsi yili pa di zuɣu; ka zaŋ salima kɔtomsi ni pumpɔrinchiya m-mali lala hal ti gili alichɛbba maa tiŋli zaa. 35Ka Aduna ti zaŋ li yɛri saha shɛl’ o yi ti yɛn tum tuma, ka o yi ti kpɛri luɣ’ kasi shee Yawɛ tooni bee o yi ti yirina, di ni chaɣisiri ka bɛ wumdi di vuri din ni chɛ ka o ku kpi.
36“Zaŋmi salima alali mali bimparilani, ka zaŋ chiriga chirigi pa di zuɣu yɛli, ‘O nyɛla ŋun be kasi Yawɛ sani.’ Chɛ ka di be kaman bɛ ni chirigiri nintu’ shɛli bɛ ni mali dihiri binyɛra zuɣu la. 37Ka a ti zaŋ mi’ sabilifaa n-lo li tabili bantabiga la, ka di ti be bantabiga maa tooni polo. 38Ka di ti pa Aduna gbɛɣu zuɣu, ka di chɛ ka Aduna ti deei taali shɛli din ni be Izraɛlnim’ ni zaŋ bɛ pin’ kasi shɛŋa zaa na ni bɛ ti mali sara kasi maa ni ʒi. Di simdi ka di kul pa o gbɛɣu zuɣu sahakam din ni chɛ ka Yawɛ niŋ ba nirilim.
39“Ka a ti zaŋ tan’ piɛl’ viɛlli n-she zabba ka niŋ bimbomaboma niŋ di ni, ka zaŋ tan’ piɛl’ viɛlli n-she bantabiga ka she shɛlɔrigu n-zaŋ shɛriga wuɣi binyɛra pa di zuɣu.
40“Ka a ti she zabbanim’ mini shɛlɔriti ni zuɣupila n-ti Aduna bidibisi. Di simdi ka a mal’ li ka di nyɛla bɛ jilima mini bɛ nachiinsi situra. 41Ka a ti zaŋ li yɛl’ a mabia Aduna min’ o bidibisi maa, ka booi kpam bahi bɛ zuɣuri ni n-zaŋ ba leei maligumaaniba, ka chɛ ka bɛ be kasi din ni chɛ ka bɛ leei maligumaaniba n-tumdi n tuma. 42Ka a ti she jinjɛŋŋmahi ti ba ka di limsi bɛ zaɣim, ka di wɔɣilim ti zaŋ bɛ shɛhi ni hal ti paai bɛ gbalipina ni. 43Ka Aduna min’ o bidibisi ti sɔr’ li kpɛri Yawɛ chirigibu shee suɣili ni saha shɛlikam bee bɛ yi ti ka sara maligu bimbini gbinna ni bɛ ti tum tuma luɣ’ kasi shee la din ni chɛ ka bɛ ku kpe taali ni ka kpi. Dimbɔŋɔ ni ti nyɛla zaligu Aduna min’ o zuliya bɛn ti yɛn zan’ o zaani o kalinsi nyaaŋa ʒiɛmani kam ni la sani.”
Currently Selected:
Yibu 28: RLDB
Highlight
Copy
Compare
Share
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
