Yibu 26
26
Yawɛ biɛhigu shee suɣili
(Yibu 36.8-38)
1“Zaŋmiya tampiɛl’ viɛlli din ŋmɛliŋmɛli tan’ tolima pia m-mali m biɛhigu shee, ka zaŋ gali sabilifaa mini gali ʒiɛkpeein ni gali ʒiɛkpain, n-chɛ ka tuumbaŋda zaŋ li wuɣi chɛrubinim’ pa di zuɣu. 2Di simdi ka tan’ tolinli kam wɔɣilim ti nyɛ mita pinaayi, ka di yɛliŋ mi nyɛ mita ayi, di simdi ka tan’ tolima maa zaa buɣisibu nyɛ yim. 3Di simdi ka yi ti zaŋ tan’ tolima anu she n-tuɣi taba, ka lan zaŋ diba anu din’ la gba she n-tuɣi taba. 4Zaŋmiya gali sabilifaa n-she biŋgolinsi niŋ tuuli pateesa la naŋgbambili, ka lan niŋ pateesa shɛli din pah’ ayi naŋgbambili gba lala. 5Di simdi ka yi niŋ biŋgolinsi pihinu niŋ pateesa tuuli la naŋgbambili, ka lan niŋ biŋgolinsi pihinu niŋ pateesa shɛli din pah’ ayi la gba naŋgbambili, ka di zaa doya tuhi taba. 6Zaŋmiya salima mali bansi pihinu n-zaŋ gɔhi pateesanim’ maa tuɣ’ taba din ni chɛ ka m biɛhigu shee maa ti nyɛ zaɣ’ muni yini.
7“Di simdi ka yi ti zaŋ bukɔbiri wuɣi tani n-zaŋ pili m biɛhigu shee maa. Wuɣimiya li tan’ tolima piniyini. 8Di simdi ni tan’ tolinli kam wɔɣilim ti nyɛ mita pinaata, ka di yɛliŋ mi nyɛ mita ayi. Di simdi ka tan’ tolima maa zaa buɣisibu ti nyɛ yim. 9Ka yi ti zaŋ tana anu she n-tuɣi taba di ko, ka she tana ayɔbu la gba tuɣi taba ka kpabi tan’ shɛli din pah’ ayɔbu la ka di niŋ diba ayi, ka yi zaŋ li pa m biɛhigu shee maa tooni polo. 10Zaŋmiya biŋgolinsi pihinu niŋ pateesa yini naŋgbambili, ka lan zaŋ biŋgolinsi pihinu niŋ pateesa shɛli din pahi ayi la gba naŋgbambili. 11Di simdi ka yi ti zaŋ daanya mali bansi pihinu n-zaŋ gɔhigɔhi biŋgolinsi maa tabili taba, ka di niŋ tanti yini. 12Ka yi ti zaŋ tan’ shɛli din guui, ka nyɛ tani maa pirigili la n-yili m biɛhigu shee maa nyaaŋa polo. 13Ka tani maa buɣisibu sɛntimita pihinu ti yili m biɛhigu shee maa yaɣ’ yini polo, ka di buɣisibu sɛntimita pihinu ti yili yaɣ’ din’ la polo, ka tani maa wɔɣilim shɛli din kpalim la mi ti yili m biɛhigu shee maa zuɣusaa luɣa zuɣu, luɣili ŋɔ zuɣu ni luɣ’ dini ŋɔ mi zuɣu. 14Zaŋmiya piɛlahi gbana din niŋ moonsi mini teeku ni biŋkɔb’ bal’ shɛb’ gbana pili pa di zuɣu.
15“Zaŋmiya gɔpiɛliga dari m-mali dapaɣa niŋ m biɛhigu shee maa. 16Di simdi ni dapaɣ’ yini kam wɔɣilim nyɛla mita anahi, ka di yɛliŋ mi nyɛ sɛntimita pihiyɔbunaayɔbu. 17Di simdi ni yi chɛ ka dapaɣili kam mali dashɛbira ayi din ni chɛ ka yi zaŋ dapaɣa maa tuɣi taba. Niŋmiya m biɛhigu shee dapaɣa maa zaa lala. 18Malimiya dapaɣa niŋ m biɛhigu shee maa nudirigu polo dapaɣa pisi, 19ka zaŋ anzinfa mali di ni yɛn tamdi binshɛŋa zuɣu pihinahi. Ka dapaɣ’ yini ni ti mali di ni yɛn tamdi binshɛŋa zuɣu diba ayi, ka dapaɣili kam ti mali diba ayi, ka di dashɛbir’ ayi shɛb’ di ni. 20Ka m biɛhigu shee maa yaɣ’ shɛli din pahir’ ayi m-be nuzaa polo la gba simdi ka di mali dapaɣa pisi 21mini di ni yɛn tamdi anzinfa binshɛŋa zuɣu pihinahi, dapaɣili kam diba ayi. 22M biɛhigu shee suɣili maa nyaaŋa zaŋ lab’ wulinluhili polo, di simdi ka yi mali dapaɣa ayɔbu niŋ li, 23ka mali dapaɣa ayi niŋ di nyaaŋa lɔrisi la ni. 24Di simdi ka yi zaŋ ban’ yini gɔhi li tabili taba zuɣusaa polo, amaa ka chɛ ka di zaŋ siɣi tiŋ’ na woligi taba; lala ka yi ni ti niŋ diba ayi maa zaa, ka di niŋ lɔrisi ayi maa. 25Di zaa ni ti nyɛla dapaɣa anii mini di ni yɛn tamdi anzinfa binshɛŋa zuɣu pinaayɔbu; ka dapaɣili kam tam diba ayi zuɣu.
26“Ka yi ti zaŋ gɔpiɛliga dari mali dapuhi n-zaŋ dapuh’ anu niŋ m biɛhigu shee maa luɣ’ yini polo dapaɣa, 27ka zaŋ diba anu n-niŋ luɣ’ din’ la mi polo dapaɣa, ka zaŋ diba anu niŋ m biɛhigu shee maa nyaaŋa wulinluhili polo dapaɣa. 28Ka sunsuuni dapua din be dapaɣa maa pirigili zuɣusaa polo la ni zaŋ yaɣ’ yini tariga hal ti paai yaɣ’ din’ la tariga. 29Di simdi ka yi ti dooi salima pa dapaɣa maa zuɣu, ka mali salima bansi niŋ li ka di ti gbibi dapuhi maa, ka niŋ salima pa dapaɣa maa zuɣu, ka mali salima bansi niŋ li, ka di ti gbibi dapuhi maa, ka niŋ salima pa dapuhi maa zuɣu. 30Ka yi ti zaŋ m biɛhigu shee maa zali kaman n ni daa pun wuh’ a shɛm zoli zuɣu la.
31“Di simdi ka yi ti zaŋ tan’ piɛl’ viɛlli din ŋmɛliŋmɛli n-she pateesa, ka bo gali sabilifaa mini gali ʒiɛkpeein ni gali ʒiɛkpain n-chɛ ka tuumbaŋda zaŋ li wuɣi chɛrubinim’ pa di zuɣu. 32Ka a zaŋ li yili gɔpiɛliga daantalis’ anahi shɛŋa zuɣu yi ni niŋ salima pa, ka di mali salima bansi ka tam anzinfa bintamdisi zuɣu la. 33#Hib 6.19; 9.3-5 Ka yi ti zaŋ pateesa maa yili bansi maa, ka zaŋ Alikauli Adaka la na ti zali di puuni, ka pateesa maa woligi luɣ’ kasi shee ka chɛ luɣ’ kasi zaa luɣ’ kasi shee la. 34Ka yi ti zaŋ Alikauli Adaka maa yɔrigu yo n-zaŋ li zali luɣ’ kasi zaa luɣ’ kasi shee maa. 35Ka yi ti zaŋ teebul’ la zali pateesa maa nyaaŋa, ka zaŋ firilatamdigu la zali tuhi teebuli maa zaŋ labi nudirigu polo, ka zaŋ teebuli maa zali nuzaa polo.
36“Di simdi ka yi ti zaŋ tan’ piɛl’ viɛlli din ŋmɛliŋmɛli n-she pateesa, ka bo gali sabilifaa mini gali ʒiɛkpeein ni gali ʒiɛkpain n-chɛ ka bɛ zaŋ shɛriga wuɣi binyɛra pa di zuɣu, ka yi zaŋ li yili suɣili maa dunoli. 37Ŋmahimiya gɔpiɛliga daantalis’ anu n-niŋ salima pa di zuɣu, ka mali salima bansi n-gɔhigɔhi pateesa maa n-zaŋ li yili daantalisi maa, ka zaŋ daanya mali daantalisi maa ni yɛn tamdi binshɛŋa zuɣu diba anu.”
Currently Selected:
Yibu 26: RLDB
Highlight
Copy
Compare
Share
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
