Amɔs 7
7
Toli nyabu
1Nyama, n Duuma NAAWUNI daa wuhi ma, ka n nya ka o namla toli ka bɛ galisi pam, bɛ ni daa chɛ nayili wɔrimɔri, ka mɔri maa lan piligi puhirina saha shɛli. 2Toli maa ni daa ŋubi mɔri maa zaa naai saha shɛli, ka n yɛli,
“Yaa n Duuma NAAWUNI, n suhir’ a,
chɛli bɛ taali!
Yaakubu ku be.
O pɔri pam.”
3Ka Yawɛ daa taɣ’ o tɛha ka yɛli,
“N ku chɛ ka lala niŋ.”
Buɣim ʒii nyabu
4N Duuma NAAWUNI daa lan chɛ ka n nya binshɛli ʒii. Nyama ŋuna n Duuma NAAWUNI daa zaŋla buɣim ni o darig’ o niriba tibili. Buɣim maa daa dila teeku, ka lan diri tiŋgbani gba. 5Di saha ka n kuhi yɛli,
“N Duuma NAAWUNI,
n suhir’ a, dim’ suɣilo.
Yaakubu ku be.
O pɔri pam!”
6Ka Yawɛ daa taɣ’ o tɛha ka yɛli,
“N ku chɛ ka lala niŋ.”
Bimbuɣisirigu ʒii nyabu
7O daa lan wuhi ma shɛli. Nyama, n daa nyami ka n Duuma ʒe bɛ ni zaŋ bimbuɣisirigu buɣisi m-me goon’ shɛli gbini; ka bimbuɣisirigu maa be o nuu ni. 8Ka Yawɛ bɔhi ma, “Amɔs, bɔ ka a lee nya?”
Ka n yɛl’ o, “Bimbuɣisirigu.” Di saha ka n Duuma yɛli ma,
“Nyama, n zaŋla bimbuɣisirigu
sɔŋ n niriba Izraɛlnim’ sunsuuni;
n ku lan ka bɛ sanna yaha.
9N ni chɛ ka Yisahaku zuliya jɛmbu shee saɣim;
ka chɛ ka Izraɛlnim’ sara maligu bimbin’ la shee saɣim;
chɛ ka bɛ zaŋ takɔbi ku Naa Jɛrɔbɔam zuliya zaa.”
Amɔs mini Amazia
10Di saha ka Bɛtɛl maligumaana Amazia daa tim ti yɛli Izraɛl Naa Jɛrɔbɔam, “Amɔs yila a nyaaŋa Izraɛlnim’ sani. O yɛtɔɣa muɣila tiŋgbani maa. 11O ni yɛli shɛm m-bɔŋɔ:
‘Bɛ ni ti zaŋ takɔbi ku Naa Jɛrɔbɔam tɔbu ni,
ka gbahi Izraɛlnim’
kuli tinshee katiŋ’ ha.’ ”
12Di saha ka Amazia daa yɛli Amɔs, “Anabi, zom’ kuli Juda tiŋgban’ ni nti tɔɣisiri anabitali yɛtɔɣa, ka nyari diri nimaani. 13Amaa miri ka a lan tɔɣisi anabitali yɛtɔɣa Bɛtɛl ŋɔ, dama di nyɛla naa sara maligu bimbini shee, ka nyɛ o nam sulinsi jɛmbu shee.”
14Di saha ka Amɔs daa garigi yɛli Amazia, “M pala anabi, m mi pala anabi bia; amaa n nyɛla biŋkɔbigula ni ŋun sari fiig tihi. 15Ka Yawɛ daa yihi ma biŋkɔbigulibo maa ni ka yɛli ma, ‘Cham’ ti tɔɣisi anabitali yɛtɔɣa ti n niriba Izraɛlnima.’
16Dinzuɣu pumpɔŋɔ, Wummiya Yawɛ yɛtɔɣa.
A yɛli ma ni m miri ka n lan tɔɣisi anabitali yɛtɔɣa dalim Izraɛlnima;
ka lan yɛli ma ni m miri ka n lan tɔɣisi anabitali yɛtɔɣa dalim Yisahaku zuliya.
17Dinzuɣu Yawɛ ni yɛli shɛm m-bɔŋɔ:
‘A paɣ’ ni ti leei pagɔrili be ya ŋɔ,
ka bɛ ti zaŋ takɔbi ku a bidibisi min’ a bipuɣinsi,
ka pirigi a tiŋgbani ŋɔ ti taba;
ka amaŋmaŋ’ ni ti kpi chɛfirinim’ tiŋgban’ ni,
ka bɛ ti gbahi Izraɛlnim’ kuli tiŋgbɔn shɛl’ ni.’ ”
Currently Selected:
Amɔs 7: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
