Amɔs 8
8
1Ti Duuma NAAWUNI daa lan wuhi ma binshɛli. Nyama, o daa wuhi ma la tiwal’ moma ni pali piɛ’ shɛli. 2O daa bɔhi ma, “Amɔs, bɔ ka a lee nya?” Ka n garigi yɛl’ o, “N nyala tiwal’ moma ni be piɛ’ shɛl’ ni.” Di saha ka Yawɛ daa yɛli ma,
“Izraɛlnim’ biɛɣu yipa neeya.
N ku lan chɛ ba.”
3Ti Duuma NAAWUNI yɛliya,
“Dindali maa, nayili yila ni ti leei fabila kuhigu.
Niriba ni ti kpi n-do luɣ’ shɛlikam.
Bɛ ni ti zaŋ ba labi ka fo baalim.”
Izraɛlnim’ barina nyabu
4Yinim’ bɛn no n-taai nandaamba,
ka nahindi tiŋgbani ŋɔ tarimba ŋɔ, wummiya,
5yi yɛra, “Bɔ saha ka goli palli dabisili lee yɛn gari,
ka chɛ ka ti kɔhi ti kawana,
ka bɔ saha ka Vuhim Dabisili lee yɛn gari
ka chɛ ka ti kɔhi ti alikama?
Ti ni doli ŋarili soli n-filim kaŋmɛri ŋmani,
ka lee kpaŋsi di daa.
6Ti ni zaŋ alikama din bi viɛli kɔhi shaara,
ka zaŋ liɣiri da tarimba,
ka zaŋ namda diba ayiyi n-taɣi nandaamba.”
7Yawɛ po Yaakubu zuɣu n-yɛli,
“N kul ku tam bɛ tuumbiɛri maa yɛla.
8Di simdi ni tiŋgbani dam dimbɔŋɔ zuɣu,
ka ŋunkam be di ni fabili.
Di simdi ni di kpuɣi du zuɣusaa
kaman Nail Mɔɣili la n-lalilali gili nti lab’ ti fim;
ka lan kpuɣi zuɣusaa n-lab’ lu tiŋa
kaman Ijipti mɔɣili la.”
9Ti Duuma NAAWUNI yɛliya,
“Dindali maa, n ni ti chɛ ka wuntaŋ’ lu wuntaŋ’ ni,
ka chɛ ka yuŋ zibi wuntaŋ’ maa ni.
10N ni chɛ ka yi churi puhibu leei fabila kumsi saha,
ka chɛ ka yi yila yilibu zaa leei fabila.
N ni chɛ ka yi so buri,
ka pini zuɣukpina.
N ni chɛ ka di be kaman nir’ bidib’ gaŋ’ ni yi kpi ka o fabind’ o zuɣu shɛm la,
ka lan chɛ ka di bahigu ŋmanila dabisi’ biɛɣu dali.”
11Ti Duuma NAAWUNI yɛliya,
“Dahin shɛli kanna,
ka n ni ti chɛ ka kum lu tiŋgbani ŋɔ ni,
ka di mi pala bindirigu kum bee kɔnyuri,
amaa di ti yɛn nyɛla Yawɛ yɛligu wumbu kum.
12Niriba ni ti yi wulimpuhili polo
n-zaŋ kpa wulinluhili polo,
ka shɛb’ yi nuzaa polo
n-zaŋ kpa nudirigu polo
n-zɔri gindi bɔri Yawɛ yɛligu,
amaa ka ti ku nya li.
13Dindali maa, kɔnyuri ni ti wum gbarigi nachimbihi kpɛma
mini paɣisaribihi kpɛma,
ka bɛ tarigi.
14Ninvuɣ’ shɛb’ bɛn pɔri Samaria buɣili Ashima yɛra,
“Dan, a buɣili din be ŋɔ zuɣu,”
bee n-yɛra,
“Bɛrishiiba buɣili din be ŋɔ zuɣu;”
bɛ ni lu ka ku lan yiɣisi yaha.
Currently Selected:
Amɔs 8: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
