Amɔs 6
6
1Mbusim be yinim’ bɛn be dahima biɛhigu Ziɔn zuɣu.
Mbusim be ninvuɣ’ shɛb’ bɛn be luɣ’ viɛlli shee Samaria Zoli zuɣu ŋɔ zuɣu.
Yinim’ bɛn nyɛ Izraɛl zuliya ninvuɣ’ kara
bɛn nyɛ Izraɛlnim’ ni kani shɛb’ sanna nti bɔri sɔŋsim ŋɔ.
2Chamiya Kaline nti nya;
ka chaŋ Hamat din nyɛ tin’ tital’ la ni
mini Gaat din nyɛ Filistianim’ tiŋ’ la ni nti nya.
Tinsi maa gari Juda mini Izraɛl tinsi?
Bee bɛ tiŋgbɔna galisimi gari yi tiŋgbɔŋ?
3Yi bi bɔri ni yi saɣi ni dabisi’ biɛɣu dali mirina,
amaa yi ni niŋdi shɛm lee chɛmi ka dindali maa mirina.
4Mbusim be yinim’ bɛn teei do wɔbinyina gariti zuɣu,
ka zaŋdi piɛla’ kara mini yi naɣikpahi ni naɣila’ kara
n-kɔriti puhiri churi ŋɔ zuɣu.
5Yi bo biŋkumda, ka ŋma yila
kaman Dauda ni daa ŋma yila shɛm la n-yiini li.
6Yi niŋdi wain paani pipihi n-nyura,
ka niŋdi tulaale viɛla n-niŋdi yimaŋa,
amaa ka yi baɣa ka zaɣ’ biɛ’ shɛli
din paai Yisifu zuliya ŋɔ ni.
7Dinzuɣu yinima n-nyɛ bɛ ni yɛn daŋ gbahi shɛb’ kuli tinduya ni,
ka yi churi puhibu mini yi suhuyubu maa zani tariga.
8Ti Duuma NAAWUNI ŋmaligi po omaŋa.
Yawɛ ŋun nyɛ binnamda zaa Naawuni ŋɔ yɛliya:
“N je Yaakubu karimbaani la.
N je bɛ ni me bɛ yiya suma shɛŋa la.
N ni zaŋ bɛ tin’ tital’ la
niŋ bɛ dimnim’ nuu ni.”
9Ninvuɣ’ pia n-yi kpalim be yili yin’ ni, bɛ ni kpi. 10Ka bɛn kpi maa dɔɣim yi kpuɣi kum maa yi yili maa ni, ka bɔhi ninvuɣ’ so ŋun na kpalim be yili maa puuni, “So na beni?” O ni yɛli, “Aai!” Ka lan yɛli, “Foma! Di bi simdi ni ti boli Yawɛ yuli.”
11Dama nyama, Yawɛ ni zali zaligu,
ka yiya kara ŋma n-lu,
ka yiya bihi mi lu m-burisiburisi.
12Nir’ ni tooi ba wɔhu n-kari kuɣa ni?
Ka nir’ ni tooi zaŋ naɣikɔra n-ko teeku ni?
Amaa yi zaŋ yɛlimaŋli leei ʒiri,
ka zaŋ din tuhi leei din bi tuhi.
13Yi nyuri bara yɛri ni yi fa Lɔdɛba.#6.13 LƆDƐBA: Tiŋ’ ŋɔ yuli bolibu ŋmanila Hiburuli ni bɛ ni yɛri “Pa shɛli” shɛm.
Ka lan nyuri bara yɛri ni yi kpiɔŋ ka yi zaŋ fa Karinaim.#6.13 KARINAIM: Hiburuli ni tiŋ’ ŋɔ yuli gbinni nyɛla, “Yiligu”. Kpiɔŋ shihirili m-bala.
14Dama nyama, Yawɛ ŋun nyɛ binnamda zaa Naawuni ŋɔ yɛliya,
“Izraɛlnima, n ni chɛ ka zuliya shɛb’ kana ti lu yi zuɣu.
Bɛ ni nahim ya Lɛbohamat dunol’ la shee
zaŋ hal ni Araba kulibɔŋ la ni.”
Currently Selected:
Amɔs 6: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
