YACHAY 19
19
Puka qocha
1Mana creejkunataqa jasut'iy sinch'itapuni wajtaykorqa. Qanqa yacharqankiña imatachus ruwanankuta.
2Paykunaqa nillarqanku aylluyki ripunanta, usqhayta ripullachunkuña, nispa. Chantapis, yuyasqankuta tijraspa, aylluykita mask'aj llojserqanku.
3Waqasharqankuraj wañusqasninkoj ñaupaqenkupi. Ujta unancharqanku aylluykej qhepampi riyta. Ripullachunku, niytawantaj, ayqejkunata jina taripaj rerqanku.
4Jasut'ichikusqankurayku, chaykama chayarqanku, pasasqanmanta qonqapuspa. Chayraykumari, jasut'ichikusqankumanqa waj jasut'iykunata yapachikorqanku.
5Ajinamanta, aylluyki sumajta purikushajtintaj paykunaqa wañorqanku llajtankumanta karunchasqas.
6Ruwasqasniykipis, chaypacha, wawasniyki mana ni ima nachikunankupaj, waj jinaman tukorqa.
7Uj phuyoqa llanthunwan jarakojkunata qhataykorqa. Maypichus ñaupajta yaku karqa, qhajpacha ch'aki jallp'alla rikhurimorqa. Puka qochaj chaupimpi, cheqanchana ñan rikhurimorqa, qhallallaj pampapis sinch'i yaku chaupipi.
8Chaynejta tukuy runasniyki pasallarqanku, makiykiwan yanapachikuspa, chay t'ukunapaj imasta ñawisninkuwan rikuspa.
9Imaynatachus caballosqa qhorasta mask'aj rinku, ajinallatataj paykunapis rillarqanku. Kusikuywan phinkiykachaj kanku, ovejas jina.
10Paykunaqa yuyarikullasharqankuraj imachus kasqanmanta chay llajtapi maypichus kasharqanku llajtankumanta karunchasqas. Yuyarikorqanku imaynamantachus jallp'a junt'asqa karqa mana uywaswanchu, manachayqa ch'uspiswan. Yuyarikorqankutaj, mana challwaschu rikhurisqanmanta mayupi, manachayqa k'aylankulislla.
11Chaymantataj rikoj kanku p'isqosta waj jinamanta rikhurimuyta, maypachachus yarqhaywan atipachikuspa sumaj mikhuyta mañakoj kanku.
12Codornizkunaqa qochamanta llojsimorqanku sajsachinankupaj.
Egipto llajtaqa Sodoma llajtamanta aswan juchayoj
13Castigo urmarqa chay juchasapa llajtayojkunaj patankuman. Ñaupajtaraj chayqa willasqaña karqa sinch'i qhon qhonkunanejta. Chay runasqa maychus kajllata jap'erqanku sajra sonqoyoj kasqankurayku. Paykunaqa karu llajtayoj runasta mana khuyakuspalla ñak'arichej kanku.
14Sodoma llajtayojkunaqa mana wajyarqankuchu llajtankuman mana rejsisqa runasta. Egipciosrí, wata runasman tukucherqanku karu llajtayojkunata, pikunachus llank'aspa paykunata yanapaj kanku.
15Sodoma llajtayojkunaqa jasut'isqas karqanku jawa runasta jap'isqankumanta contras jinata.
16Egipciosqa, ñaupajta tukuy sonqo israelitasta reciberqanku. Chantaqa, israelitas kikin derechosniyojña kajtinku, llakicherqanku manchay sinch'ita llank'achispa.
17Chayrayku ciegoyarqanku, imaynatachus Sodoma llajtayojkuna ciegosman tukorqanku kashajtinku cheqan sonqoyoj Lotpa wasi punkumpi, ajinata. Chaypachaqa, tukuy laqha laqhalla karqa. Runasqa tanteyaspalla wasi punkusninkuta mask'aj kanku.
Kay mundopi kajqa waj layaman tukun
18Kay mundopi kajqa waj layaman tukorqa. Imaynatachus pillapis charangonta waqachin uj takiyllata waj layamanta, ajinata. Chayta ninchejman imachus pasasqanta rikuspalla:
19Jallp'allapi kausakoj animalkunaqa yakunta purerqanku. Yakupi kausakoj animalkunapis jallp'aman llojsimorqanku.
20Ninaqa yaku ukhupi astawan larwarimorqa. Yakutaj mana thasnuyta aterqañachu.
21Ninaqa mana ruphaykucherqachu pisi kallpayoj animalkunata, nina chaupinta pasajkunata. Nitaj unuyacherqachu Maná nisqa mikhunata, janaj pachamanta uraykamoj chayta, unuyachinallapajña kajtimpis, anchata chhullunkaman rijch'akusqanrayku.
22Tukuy imapipuni, Señor, aylluykita jatunyacherqanki atiytataj qorqanki. Ni mayllapipis ni jayk'ajllapis yanapaymantaqa q'ellikorqankichu.
Currently Selected:
YACHAY 19: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.