YACHAY 18
18
1Ajllakusqasniykipajrí chaypachaqa jatun k'anchaymin karqa. Egipciosqa, paykunata mana rikushajtinkupis, nisqankuta uyarej kanku. Uyarispataj, kusikuyniyojmin kasqankuta nej kanku, mana paykunapis ñak'arisqankumanta.
2Agradecekorqankutaj mana chejnikuywan kutichikusqankumanta.
3Qanqa, aylluykiman mana laqhata chayachimorqankichu, manachayqa, sayashaj ninata chayachimorqanki. Chay ninaqa, mana ruphaykuchej inti jina aylluykipaj karqa. Aylluyki mana yachashajtin maymanchus rishasqanta, chay ninaqa ñanta rikucherqa, pusaspa chay kusikunapaj jatun puriypi.
4Mana allintachu kausakusqankurayku egipciosqa k'anchayta mana jap'ikuyta aterqankuchu. Laqha ukhupi watasqas jina qhepakorqanku, jap'iykusqankurayku wawasniykita, mayqenkunanejta kamachikusqasniykej mana tukukoj k'anchaynin tukuy kay pachaman chayamunan karqa.
Wañuy
5Egipciosqa wañuchiyta munaj kanku tukuy wawasta, ajllasqa aylluykimanta kajkuna chaykunata. Wijch'usqa wawasmantaqa ujsitulla mana wañuchisqachu karqa. Qantaj, chay ruwasqankumanta castigarqanki ashkha wawasninkuta qhechuspa. Tukuyninkutataj ujllapi p'ultiykucherqanki k'ajaj phiña yakupi.
6Ñaupa tatasniyku yacharqankuña imatachus chay ch'isipi kananta. Ajinamanta, sonqochasqas kasharqanku, rikuspa junt'akusqanta paykunaman nisqankuta.
7Aylluykimanta kajkunaqa suyasharqanku cheqan sonqoyoj runas kacharichisqas kanankuta. Suyasharqankutaj paykunata chejnikojkuna chinkachisqas kanankuta.
8Contrasniykuta castigachishajtiyki, kikimpacha noqaykuta k'anchaywan pilluchawarqayku, qanman qayllanaykuta nispa.
9Chay jawa, cheqan sonqoyojkunaj wawasninku, pakayllamanta rikuchikusta jaywaj kanku. Paykunapurataj ninakorqanku Diospa kamachisqanta junt'anankuta. Uj tratota ruwaspa, nerqanku ujllachasqas kanankuta kusiypipis llakiypipis. Chantaqa, chay kikimpacha ñaupa tatasninkoj takiykunasninkuta takiyta qallarerqanku.
10Paykuna sonqochakuspa takikushajtinku, contrasninku fierota qhaparikoj kanku, sonqo nanaytataj waqaj kanku wawasninku wañupusqankumanta.
11Ujllapitaj ñak'arej kanku wiraqochispis wata runaspis. Kikillantataj ñak'arej kanku tukuy runaspis, kamachejkunapis.
12Sapa ayllu ukhupi wañusqas karqanku mana yupayta atina. Tukuyninku kikillantataj tukuchisqas karqanku. Kausakojkunaqa pisilla karqanku ayasta p'ampanankupaj. Pachampi chinkachisqas kasqankoqa llajtankumanta aswan sumachaj kaj runas.
13Ajinamanta, pikunachus layqasninkupi sonqonkuta churarqanku, mana creeyta munaspa paykunaman willasqa kasqanta, yacharqankuña, wawasninkuta wañusqasta rikuytawankama, ayllunchejpa runasnin Diospa wawasnin kasqankuta.
14Chaupi tuta, tukuynejpi allin kaytaj, ch'in kaytaj karqa.
15Chaypacha, tukuy atiyniyoj parlasqaykeqa uraykamorqa janaj pachamanta, maypichus qan kamachej jina sayarinki chaymanta. Imaynatachus kachaykukun mana atipachikoj maqanakoj runa, ajinallatataj nisqaykeqa kachaykukorqa chay jallp'a chaupipi, chinkayman wajyasqa chaypi. Chay nisqayki uraykamorqa khuchunawampis kanman jina, imatachus kananta rikuchispa.
16Chaymantataj, tukuy imata wañuywan junt'aykucherqa. Nisqaykej umanqa janaj pachaman chayarqa, chakintaj pampapi karqa.
17Chayllapi, chay runasqa mosqoyninkupi rikusqankuwan manchachikoj kanku. Qharkatitiyta qallarerqankutaj, imaynatachus ni jayk'ajpis yuyarqanku, ajinata.
18Mayllapipis urmashajtinkutaj wañuywan atipachikuspa, sut'ita yachakorqa imajtinchus wañusqankoqa.
19Mosqoyninkupi chaytaqa yachasqankuña, ama wañunankupaj mana yachaspalla imajtinchus wañusqankuta.
20Cheqan sonqoyojkunapis wañorqanku. Paykunamantaqa ashkha runas ch'in pampapi wañorqankoqa. Chaywampis, phiñakuyniykeqa mana unaypajchu karqa.
21Rikhurimorqa ari uj mana juchayoj runa, pichus sayarqa aylluykita jark'anampaj. Chaypajqa, sacerdote kasqanmanta yuyarikuspa, qanmanta mañakorqa, q'osñichipusorqataj. Ajinamanta, aylluykita perdonacherqa. Phiñakuyniykitataj thañicherqa. Chay jawa, llakiy tukorqa. Chayta ruwaspa rikucherqa kamachiyki kasqanta.
22Payqa chay nanayta atiparqa mana kallpanwanchu nitaj maqanaswanchu. Parlakusqanwan castigachejpa phiñakuyninta thasnorqa, yuyarichispa ñaupa tatasman nisqa kasqanta, yuyarichispataj paykunawan ruwasqa tratomanta.
23Ayasqa patampi patampi tauqasqa kasqankumantaña, pay sayarerqa. Phiñakuytaqa karuncharqa, jark'arqataj kausakojkunaman pusaj ñampi.
24Qhoysu p'achampi mundontin churasqa karqa. Rumimanta ruwasqa tawa sinrupi qelqasqa karqa ñaupa tatasniykoj lliphipej sutisninku.
25Chayta rikuspa, wañuchejqa manchachikuywan karunchakorqa. Phiñakuyniykita rikuspalla wanarqankuña.
Currently Selected:
YACHAY 18: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.