ECLESIÁSTICO 1
1
Imachus yachay
1Tukuy ima laya yachayqa Señormanta jamun, paywantaj qhepakapun wiñaypaj.
2Pitaj yupayta atinman qocha cantopi t'iyuta, paraj sut'uyninta, wiñay kajtapis?
3Pitaj chayayta atinman janaj pachaj aysakuyninman, kay pachaj tukukuyninman, kay pachaj ukhunmantaj? Chantaqa, yachaymampis?
4Manaraj ni ima ruwasqa kashajtin, yachayqa ruwasqaña karqa ñaupamantapacha. Ajinallataj, unanchaypis, umachakuypis.
5Pimantaj yachaypa saphin rejsichisqa karqari? Pitaj yachaypa sonqompi pakasqa kajman chayarqari?
6Ujlla yachayniyojqa, manchachikunapaj jina. Pichus tiyanampi tiyasqa kashan, chaymin.
7Paymin yachaytaqa ruwarqa. Payqa yachayta qhawarqa, tanteyarqataj imaynachus kasqanta.
8Paymin yachayta t'akaykorqa tukuy ima ruwasqasninman. Munasqanman jina yachaymantaqa qorqa tukuy kausakojman. Payta munakojkunamantaj mana mich'akuspalla qorqa.
Señorta yupaychana
9Señorta yupaychajqa kusikuyniyoj kanqa. Llakiyta mana rejsenqachu. Kusikuywantaj pilluchasqa kanqa.
10Señorta yupaychaspa, runaqa sonqonta kusichin. Kusikuywan junt'a kaspataj, unayta kausakonqa.
11Señorta yupaychajqa allillanta wañuyman chayanqa. Wañupojtintaj tukuy runas sumajta parlanqanku paymanta.
12Runaqa yachayta jap'ikuyta qallarin Diosta may respetowan qhawaspa. Cheqan sonqoyoj runaqa yachayta jap'ikunña mamampa wijsanmantapacha.
13Runas chaupipi pay tiyakorqa, wiñaymantpacha. Paykunawan kakullanqapunitaj mana sayk'uspalla.
14Yachaywan junt'asqamin pichus Señorta respetowan qhawan. Yachayqa poqoyninwan runasta sajsachin.
15Paykunaj wasisninkuta munasqankuwan junt'achenqa. Pirwasninkupis tipiywan junt'a kanqa.
16Señorta respetakojqa yachaywan umanta pilluchakun. Yachayqa allin kayta, sano kaytataj t'ikarichin.
17Yachayqa runa pataman parata jina chayachimun tukuy imata rejsinapaj atiyta, umayoj kajtataj. Yachayqa payman k'askakoj runataqa may pataman oqharin.
18Yachaypa saphinmin Diosta respetay. Ramasnintaj unay kausay.
19Juchayojpuni pichus qhasimanta phiñakun. Phiñakoyqa runata chinkayman urmachin.
20Llamp'u sonqoyoj runaqa pacienciakullan unaytapis. Chantaqa kusikuy payman chayamun.
21Payqa yachallan, mayk'ajchus parlanan tiyan. Chaykamataj ch'inlla kakun. Chaymanta ashkha runas tukuyman nenqanku umayoj kasqanta.
22Yachaypa ukhunmanta, runa atinman orqhoyta unanchakuyta. Juchasapataj manapuni munanchu Diosta yupaychaytaqa.
23Yachayniyoj kayta munanki chayqa, Diospa kamachisqasninta junt'ay. Señortaj yachayta ashkhata qollasonqa.
24Señorta yupaychajqa, umayojtaj yachayniyojtaj. Señorqa munakun payman k'askakoj llamp'u sonqoyoj runata.
25Ama q'ellikuychu Señorta yupaychakuymanta. Ama payman qayllaychu puraj uyawan.
26Amataj puraj uya kaychu runaspa ñaupaqenkupi. Imallatapis ninaykipaj, ñaupajta umachakuyraj.
27Ama qan kikiykita jatunyachikuychu. Urmawajtaj, p'enqaytataj umaykiman apachimuwaj.
28Señorpis pakasqasniykita rikuchinman, tukuy rikushajtinkutaj pampaman wijch'usunkiman.
29Mana qayllarqankichu ari payman, payta yupaychaj. Sonqoykitaj llullakuywan junt'a kasharqa.
Currently Selected:
ECLESIÁSTICO 1: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.