YACHAY 17
17
Wakinkuna laqhapi kanku, wakinkunataj k'anchaypi
1Qampa yuyakusqasniyki jatuchejpuni. Mana ni pi entiendenmanchu. Chayraykoqa, mana yachakuyta munaj runas pantanku.
2Rumi sonqo runas yuyarqanku atillasqankuta qampa ajllakusqayki aylluykita sarurpariyta. Paykunataj laqhawan jap'ichikuspa, mana kuyuriyta atispataj unay ch'isipi, wisq'asqas wasisninkupi qhepakorqanku. Manataj qoyta yachasqanki chay k'anchaypis paykunaman chayamorqachu.
3Yuyarqankutaj manapuniña yachakunanta pakayllapi juchallikusqankuta. Yuyarqanku juchasninkoqa qonqaypa llanthunwan qhatasqas qhepakunankuta. Ch'eqerachikorqankutaj kayman jaqayman maytapuni manchachikuspa. Rikusqankoqa paykunata mancharicherqa.
4Ni wasisninkupi pakakuspapis chay manchakuymanta ayqeyta aterqankuchu. Tukuynejpi qhon qhonkunata uyarej kanku, uyarispataj manchachikoj kanku. Rikoj kanku mayta manchachej fiero imasta.
5Ninapis mana kallpayojchu karqa k'anchanampaj. Nitaj ch'askaspa lliphipiyninkupis k'anchaykuyta atisqachu chay manchachikuna ch'isipi.
6Paykunaqa rikoj kanku uj ninallata sapallanmanta larwajta tukuyta manchachispa. Chay rikusqankoqa ripuytawantaj, astawanñataj manchachikoj kanku.
7Qhasillata layqachiyatapis munaj kanku. Yachakusqankupis p'enqayllapi rikhurin.
8Pikunachus nisharqanku atisqankuta onqosqa sonqomanta ayqechiyta chay manchachikuyta, chay phutiytataj, paykunapis manchachikuywan onqorqanku, asirinapaj jina.
9Mana ni ima manchachina kajtimpis kharkatitinankupajqa, manchachikoj kanku animalkunata puriyta uyarispa, kataristataj qhaparikuyta uyarispa. Manchachikuywan wañupoj kanku. Ni wayrallatapis rikuyta munaj kanku, mayqenmanta mana ni pi ayqenmanchu chayta.
10Cheqamantaqa, sajra runas q'ewas kanku. Paykunalla tumpakunku. Paykunaj kikin sonqosninku contrankupi sayanku. Chayrayku, tukuy imamanta aswan mana allin kajta suyashanku.
11Mana yuyayta munayqa, unanchaspa, chayqa manchachikuy.
12Aswan pisi kallpayoj kajtin runaqa sonqompi, astawantaj nanachikun mana yachaspa maymantachus ñak'ariynin chayamusqanta.
13Paykunaqa chay laqha chaupipi kasharqanku. Chay laqhaqa mana atiyniyojchu karqa. Jamorqa ukhumantapachapuni, maypichus wañoyqa kamachin mana atiyniyojlla. Paykunaqa puñukullasharqanku.
14Jinapis, millay imaswan qhatichikoj kanku. Chantapis, mana kuyuriyta aterqankuchu, mana kallpayoj rikhurispa, ujllata manchachikuspa. Mana suyaspalla chay manchachikuywan jap'iykuchikorqanku.
15Ajinamanta, tukuyninkupuni, mayllapipis kajtinku jap'iykuchikoj kanku, mana wisq'anayoj carcelman yaykuspa.
16Llank'aj runas, michejkuna, karu chajraspi kajkunapis, tukuyninku ujllata nanaykuchikoj kanku mana ayqeyta atispa, laqhaqa tukuyninkutapuni jap'eqasqanrayku.
17Uyarej kanku wayraj phukuyninta. Uyarillajtaj kanku p'isqosta takirikojta sach'as patapi. Chantaqa, yakutapis uyarej kanku sinch'ita thutumojta. Qaqastapis uyarillarqankutaj ch'allpajtinku.
18Ningrisninkuman chayarqa animalkunaj sarusqanku. Jinallataj, monte animalpa qhaparikuynimpis. Chaymantataj, qaqaj simimpis uyarikullarqataj kutichikushajtin. Tukuy chay uyarikusqankoqa kikimpachapi paykunata sayaykurichej kharkatitiywan.
19Waj runasrí, lliphipej k'anchaywan k'anchaykuchikuspa, kusisqalla ruwasqasninkuta ruwaj kanku.
20Chay egipcio runasllapaj manchay llasa ch'isi uraykamorqa. Chay laqhaqa niyta munarqa chay waj laqha maymanchus yaykunanku karqa. Paykunapajqa, kikin paykuna aswan llakichejkuna karqanku laqhamantaqa.
Currently Selected:
YACHAY 17: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.