YACHAY 16
16
Imapitaj Israel ayllu mana rijch'akunchu Egipto aylluman
1Chayrayku paykunaqa maychus kajta castigasqas karqanku chay kikin animalkunanejta. Juch'uy animalkunapis paykunata nanaykucherqanku.
2Aylluykitarí qanqa mana castigarqankichu. Manachayqa, allin ñawiwan qhawaykorqanki. Aylluyki yarqhachikushajtintaj, manaraj rejsisqan mikhunata qorqanki, codornizkunata.
3Chaykuna, yarqhachikushajtinkupis, manaña mikhuyta munarqankuchu, rikuspa chay animalkunata, qan paykunaman kachaykorqanki chaykunata. Kaykunarí, pisillata yarqhachikuspa, mosoj mikhunawan sajsasqas karqanku.
4Aylluykita sarojkunaqa sinch'i yarqhaywan atipachikunankupuni karqa. Aylluykirí llamirinallan karqa contrasninkoj ñak'ariykunasninta.
Bronce kataritaj langostataj
5Maypachachus wañuchina jampiyoj phiña animalkuna runasniykej patankuman uramarqanku, paykunawan phiñakusqaykeqa mana qhepakorqachu wiñaypaj. Jinallatataj, maypachachus qhatatakoj kataris qhaniyninkuwan runasniykita wañuracherqanku, wawasniykiwan phiñakusqaykeqa mana wiñaypajchu kakorqa.
6Wananankupajlla tumpata mancharikorqanku. Chaypachaqa, salvakunankutapuni willaykorqanki, qampa kamachikusqaykimanta yuyarikunankupaj.
7Pichus chay señalman kutirikorqa, salvasqa kanan karqa. Mana salvananqachu karqa chay rikusqan, manachayqa, qampuni, tukuykunata salvaj, paykunata salvanayki karqa.
8Chay jinamanta, noqaykuta chejnejkunaman rikucherqanki qampuni ima laya nanaymanta runasta kacharichisqaykita.
9Paykunata langostaspis ch'uspis wañuracherqa. Paykunataj manapuni aterqankupischu wañuymanta ayqeyta. Chay jina castigowan castigasqaspuni kananku karqa.
10Wawasniykitarí ni katarispis wañuchina jampiyoj kirusninkuwan atipayta aterqankuchu. Qanqa ari, khuyakuyniykiwan qayllarqanki thañichinaykipaj.
11Wach'iykuchikorqanku nisqasniykimanta yuyarikunankupaj. Chaywampis, qhajpachalla salvakorqanku, ama qanmanta qonqakunankupaj. Chaymantataj, ama sonqosninkuta rumiyachinankupajtaj, manaña qosqasniykita jap'ikuyta atispa.
12Mana thañisqaschu karqanku mayqen qhorallanejtachus, mayqen jawiykunasnejtachus. Simi nisqayki thañicherqa, Señor, tukuy imata thañichin chaylla.
13Qanqa atiyniyoj kanki kausay patapi wañuy patapipis. Qanqa wañuyman yaykuchiwayku. Qanllataj wañuymanta orqhoykuwayku.
14Runaqa, sajra kaywan atipachikuspa, wañuchiyta atin. Manaña atinchu kausarichiyta. Manataj atinchu almata kutirichiyta wañupusqanmantaña.
Chijchi chayamorqa. Maná nisqa mikhuna chayamorqa
15Mana ni pi atinmanchu makiykimanta ayqekuyta.
16Mana rejsisuyta munajkunata, qanqa sinch'i makiykiwan castigaykorqanki. Manaraj rikusqanku parapis, patankuman urmarqa. Jinallataj, chijchipis, qhon qhonkuna yakuspis. Chantaqa, ninawampis oqoykuchikorqanku.
17Chaymantataj, t'ukunapaj chay ruwasqaykeqa, maypachachus tukuy imata tukuykuchej yakoqa, mana ninata thasnuyta aterqachu. Manachayqa, nina astawan jatunyarqa. Mundontimpi kajqa jark'an ari cheqan sonqoyoj runasta.
18Kutispi larway pisiyarqa mana animalkunata tukuchinanrayku, mana creejkunaj contrampi kachamusqas chaykunata. Chaymin ruwakorqa mana creejkuna runas yachanankupaj Diospa cheqanchakuynin paykunata qhatisqanta.
19Kutispitaj, yaku chaupipis chay larway mayqen ninamantapis aswan sinch'itapuni larwarimorqa, chay mana sonqoyoj runaspa tipiykunasninkuta chinkachinampaj.
20Aylluykimanrí ángel mikhunata chayachimorqanki. Mana ni imata aylluykimanta kajkuna ruwananku kajtillan, paykunamantaqa janaj pachamantapacha kachamorqanki mikhunallapajña wakichisqa t'antata. Chay t'antaqa, runaj simimpiña kaspa, ima laya mikhunallamampis tukusqanta ninchejman. Sapa ujpaj misk'ipuni karqa.
21Chay mikhunata qospataj rikucherqanki wawasniykita munakusqaykita. Sapa ujpa gustonman jina ima laya mikhunallamampis tukorqa, imaynamantachus sapa uj munarqa, ajinata.
22Chaymantaqa, rit'i jina, qhasa jina kajtimpis, mana ni imata nakorqachu nina ukhupi. Chay jinamanta ari, wawasniyki yacharqankuña imaynatachus contrasninkoj tipiykunasninku tukukaporqanku, nina para urmamojtin chijchiwan khuska, lliphipejtintaj para chaupipi.
23Chantaqa, cheqan sonqoyoj runas mikhunankupajri, chay kikin ninaqa mana kallpayojñachu rikhurerqa.
24Qanqa ruwasqayki, qanta tukuy imata ruwajta sirvisuspa, sinch'itapuni oqharikun sajra runasta nanachiykunampaj. Thañikuntaj qayllajtin qampi suyajkunaman.
25Ajina ari, chay kutipipis, ujta tijrakuspa, khuyakuyniykej kamachinman tukorqa. Chay khuyakuyniykeqa tukuyman mikhunata qon. Chay jinamanta, ninaqa pisichikojman yanaparqa munasqankuman jina.
26Chayta ruwarqanki, Señor, munasqa wawasniyki yachanankupaj mana jallp'aj poqoynin runata kausachisqanta, manachayqa nisqayki kausachisqanta qampi suyakojkunata.
27Imachus ninawanqa mana tukukorqachu, qhajpacha unuyarqa intej k'anchaynillanwan.
28Chay jinamanta, aylluyki yacharqa runa chhapu chhapullataraj sayarinan kasqanta agradecesunampaj, yachanampajtaj qanmanta mañakunan kasqanta sut'iyaytapuni.
29Mana agradecekoj runaj suyakuynenqa unuyampacha, imaynatachus chhullunka chiripi unuyan ajinata. Mana sirvej yaku jina ririkapun.
Currently Selected:
YACHAY 16: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.