ECLESIÁSTICO 36
36
Diosmanta mañakuy Israelpaj
1Tukuy mundoj Diosnin, khuyakuwayku. Tukuy runas qanmanta manchachikuchunku.
2Makiykita oqhariy karu runaspa patankuman, yachanankupaj qanqa kallpayoj kasqaykita.
3Qan llakichiwarqayku, paykuna yachanankupaj santo kasqaykita. Paykunatapis llakichiy. Ajinamanta, ñaupaqeykupi rikuchinki jatun kayniykita.
4Ajinamanta, paykunaqa yachanqanku qan sapallayki Dios kasqaykita, imaynachus noqayku yachayku, ajinata.
5Watejmanta ruwapuwayku milagrosta, t'ukuna imastapis. Rikuchiy jatun kayniykita atiyniykitawan.
6Phiñakuyniyki rikhurimuchun. Contrasniykupaj phiñakuy. Paykunata k'umuykuchiy, ch'eqerachiytaj.
7Imatachus ruwanayki tiyan, ruwallayña. Ni pi cuentata mañasonqachu ruwasqaykimanta.
8Chay runaspa kamachejnin nishan: Mana ni pi noqa jinachu, nispa. Payta t'unarparichiy.
9Tukuy Jacob ayllusta tantaykuy, llajtankupi tiyakunankupaj ñaupa tiempospi jina.
10Khuyakuy ari sutiykita apaj ayllumanta, Israelmanta, pitachus ajllakorqanki kuraj aylluykipaj.
11Khuyakuy ajllasqa llajtaykimanta, Jerusalenmanta, maypichus tiyakunki chaymanta.
12Jatun kayniykiwan junt'aykuy Sionta. Kusikuyniykiwantaj junt'aykuy temploykita.
13Junt'ay imatachus ruwanaykita nerqanki ñaupa wawasniykiman. Junt'aytaj imatachus profetas sutiykipi willarqanku chayta.
14T'inkata qoy qampi suyajkunaman. Rikuchiy profetas cheqan kajta parlasqankuta.
15Kamachisniyki mañakusqankuta uyariy, aylluykita munakusqaykiman jina.
16Mayllapipis yachakuchun qan Señor kasqaykita, wiñay Dios.
Ajllana imatachus aswan sumaj
17Ima mikhunallapis tonqorinejta yaykullan. Jinapis, wakin mikhunaqa wajkunamanta aswan sumaj.
18Simi yachallan ima layachus mikhuna. Ajinamanta, sonqoqa yachallan imachus llulla.
19Sajra sonqoqa runasta llakichin. Runa, kallpayoj kajtenqa, sinch'ita sayallan.
20Mayqen qharillawampis warmi casarakunman. Qharipajqa, wakin warmis aswan sumachej kanku wakinkunamanta.
21K'acha warmita rikojqa anchata kusikun. Mana ni ima kanchu aswan sumaj.
22Sichus warmeqa k'acha sonqoyoj misk'i simiyojtaj kanman chayqa, qosanqa tukuy qharismanta aswan kusikuyniyoj.
23Warmiyoj runaqa qallarishanña qhapaj kayta. Warmenqa yanapanqataj sayarichenqataj.
24Mana perqachasqa chajramanqa pillapis yaykun suwakoj. Mana warmiyoj runaqa puriykachallan kayman jaqayman, mana yachaspa maymanchus rishasqanta.
25Pitaj confianzanta churanman saltea runaman, llajtamanta llajta purejman?
26Jinallataj, mana thapayoj runa, pichus tutayajtin mayllapipis puñukullan.
Currently Selected:
ECLESIÁSTICO 36: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.