ECLESIÁSTICO 37
37
Amigosmanta
1Tukuy amigosqa nej kanku: Amigoyki kani, nispa. Jinapis, wakinkunaqa amigos kanku simillawan.
2Sinch'i llakiy runapajqa maypachachus kausaqen chejnikojman tukuy.
3Sajra yuyay, imapajtaj kankiri? Kay pachata llullakusqasniykiwan junt'achinaykipajchu?
4Simillamanta amigoqa mikhunaykita qhawan. Llakiyniyoj kajtiykitaj karullapi sayan.
5Cheqamanta amigoqa chejnikusojwan maqanakun. Pillapis jamusunkiman nanaykuchej, payqa jark'aykun.
6Qhapaj kajtiyki, ama qonqapuychu amigoykimanta. Ama saqerpayaychu.
7Consejota qojkunaqa ñanta rikuchinku. Jinapis, paykunallapi piensanku.
8Sonqoykita karunchay consejota qojmanta. Ñaupajtaraj yachaykuy imatachus mask'asqanta. Ichapis payllapi piensashan, munashantaj qolqechakuyta.
9Chaypacha nisunku: Allinta purishanki, nispa. Chantaqa, ririkapun qhawaj imaynamantachus chinkayman purishanki.
10Chejnikusojkunamanta ama consejota mañakuychu. Amataj pakasqa yuyayniykita envidiakojkunaman willakuychu.
11Iskay warmis uj qharillata munakushajtinku, ama uj warmita tapuychu chay waj warmimanta. Q'ewakoj qharimanta ama consejota mañakuychu maqanakuymanta. Amataj qhaterosmanta consejota mañakuychu vendenamantachus rantinamantachus. Envidiakojkunataqa ama tapuychu imachus agradecekuy. Sajra runataqa ama tapuychu imachus k'acha sonqo kay. Qhellamantaqa ama consejota mañakuychu llank'anamanta. Jark'asirita ama tapuychu tipiymanta.
12Diosta respetakojmanta consejota mañakuy. Yachallayraj sichus Diospa kamachisqasninta junt'anchus manachus. Tapukuyraj sonqon sonqoyki jinachu manachu. Sonqon sonqoyki jina kajtenqa llakipayaysisonqa.
13Uyariytaj imatachus kikin sonqoyki nisunki chayta. Confiakunaykipajqa mana ni pi kanchu aswan sumaj sonqoykimanta nisqaqa.
14Runaj sonqonqa runata willakun qanchis jark'asirismanta aswan sumajta.
15Chantaqa, Diosmanta mañakuy cheqan ñanninta pusasunantapuni.
Imataj cheqamanta yachay
16Imallatapis ruwanayki kajtin, ñaupajta unanchakullayraj.
17Runaj ruwananqa munayninmanta jamun. Runaj munayninmantataj, kaykuna llojsimunku tawa maki jina:
18Sumajwan sajrawan. Kausaywan wañuywan. Tawantinkutaj simipi kashan.
19Wakinkuna wajkunallapaj yachayniyoj kanku. Kikin paykunapajtaj mana umayojchu kanku.
20Tiyan yachayniyojkuna pikunachus chejnichikunku nisqasninkurayku. Chaykunataqa mana ni pi wajyanchu mikhunasman.
21Tiyan pikunachus kikin paykunapaj yachayniyoj kanku. Yachakusqankoqa paykunallapaj.
22Tiyan pikunachus kikin paykunapaj yachayniyoj kanku. Yachakusqankoqa wajkunallapajtaj.
23Pichus pay kikimpaj yachayniyoj, kusisqa kausakonqa. Tukuy payta rikojkunaqa kusirikunku.
24Pichus runaspaj yachayniyoj, may respetasqa kanqa. Sutin wiñaypaj rejsisqa kanqa. Runaqa pisillata kausan. Israeltaj wiñaypaj kausan.
Mikhunamanta
25Wawáy, unanchakuy imachus allin qampaj. Mana allin kajmantaqa karunchakuy.
26Imallapis mana allinchu tukuy runaspaj. Ima mikhunallapis mana allinchu tukuypaj.
27Ama phawaychu oqoj. Amataj anchatapuni mikhuychu.
28Wakinkuna onqonku anchata mikhusqankumanta.
29Wakinkunataj wañunkupis. Pichus maychus kajta mikhun unayta kausan.
Currently Selected:
ECLESIÁSTICO 37: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.