ECLESIÁSTICO 11
11
1Yachayniyoj runaqa, wajcha kaspapis, mana umanta k'umuykunchu. Tiyakullan payqa atiyniyoj runas chaupipi.
2Ama ni pitapis alabaychu k'acha uyanrayku, Amataj ni pitapis qhesachaychu fiero uyanrayku.
3Lachiwanaqa may juch'uysitu. Jinapis ruwasqanqa may misk'i.
4Ama asikuychu thantalla p'achayojmanta. Amataj asirikuychu llakisqa runamanta. Señorpa ruwasqasnin t'ukunapajmin. Runaspajtaj, chayqa pakasqa kashan.
5Ashkha kamachejkunaqa pampaman k'umuykuchisqas karqanku. Chantapis, uj mana rejsisqa runa reyman tukun.
6Patapi sayajkunaqa urmanqanku. Atiyniyoj kaspapis, kamachisman tukunku.
7Ama ni pipajpis parlaychu manaraj allinta tapuspa. Ñaupajtaraj unanchakuy, chaymantaraj tumpanki.
8Kutichikunaykipajtaj, ñaupajtaraj uyariy. Waj runa parlashajtin, ama sat'ikuychu.
9Mana qanwan discutinakojtinku, ama phiñakuychu. Juchasapaspa ch'ajwankumanqa ama yaykuychu.
10Wawáy, imapajtaj tratanakuwaj? Anchatapuni metekunki chayqa, juchachasqa rikhurinki. Maymanchus chayayta munanki, thaskispapis mana chayankichu. Ayqespapis, jap'ichikullankipuni.
11-12Wakin runasqa wajchas kanku, puriskiris, mana ni imayoj, may onqosqas. Señortaj paykunata qhawarin yanapantaj. Orqhontaj jallp'amanta, wajcha kaymantataj.
13Señorqa paykunata oqharin patamantaj churaykun. Chayta rikuspa, ashkha runas t'ukunku.
14Señormanta jamun allin kay sajra kaypis. Ajinallataj, kausaypis. Chantapis, wajcha kaypis qhapaj kaypis.
15Señorqa runaman qon yachayniyoj kayta, umayoj kayta, maychus kajta yuyayta, munakuyta, allin puriytapis.
16Sajra runaspajqa sonso kaytaj laqhayaytaj. Sajra runasqa, sajra kaywampuni purinku.
17Señorqa yanapampuni paywan purejkunata. Señorqa k'acha sonqonwan pusanqapuni paykunata.
18Empeñota churaspa ashkha runasqa qhapajyanku. Jinapis, mana ni imayoj rikhurinku.
19Chay runasqa ninku: Kunanqa samarisajña. Kapusqanwan kusikuyta tarisaj, nispa. Manataj yachankuchu mayk'ajchus wañupunankuta, tukuy kapuyninkuta wajkunaman saqespa.
20Wawáy, ruwanayki kajtaqa ruwallay. Ruwasqaykimanqa umaykita churay. Ruwaspallapuni machuyay.
21Ama alabaychu sajra runaspa ruwasqasninkuta. Señorman oqhariy sonqoykita. Paypa k'anchayninta suyakullay. Payqa atillan ujllapi wajchata qhapajman tukuchiyta.
22Diosninchej bendiciykonqa cheqan sonqoyojkunata. Suyakusqanku t'ikallanqa.
23Ama niychu: Imatachus munarqani kapuwanña. Mana ni ima pisiwanchu, nispa.
24Ama niychu: Necesitasqayqa kapullawan. Ni ima sajra kay jamuwanqachu, nispa.
25Runaqa kusisqa kaspa, mana allin kajmanta mana yuyarikunñachu. Ajinallataj, runaqa llakisqa kaspa, kusikuyninmanta mana yuyarikuñachu.
26Diosninchej runa wañupojtin, maychus kajta qollan kausakusqanman jina.
27Llakiypeqa runa kusikuyninmanta qonqapumpacha. Qhepantaraj yachakonqa imaynachus sapa uj kasqan.
28Ama ni pita niychu kusikuyniyoj kasqanta, manaraj wañupushajtin. Tukukuyninman chayajtin, yachakonqa imaynachus karqa.
Ama pillawampis puriychu
29Ama pillatapis wasiykiman wajyaychu. Ch'aukiyajqa yachampuni imaynatachus wajkunata urmachinanta.
30Wapu runaj sonqonqa rijch'akun jap'ichikusqa p'isqoman. Wateqaj atoj jina payqa.
31Tumpajqa allin kajta sajraman tukuchin. Imachus qampajqa may sumaj, paypaj millakunapaj.
32Uj ninallamanta jatun larway rikhurimun. Juchasapaqa suyallashan mayk'ajchus atinman pillatapis wañuchiyta.
33Sajra runamantaqa karunchakullay. Payqa sajra kajta ruwallanqa. Pajtataj wiñaypaj llakichisunkiman.
34Mana rejsisqayki runaqa ch'ajwata apamunman wasiykiman. Wasiykipitaj chejninakus kanman.
Currently Selected:
ECLESIÁSTICO 11: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.