ROMANOS 6

Juchapaj wañusqas, Cristopitaj kausayniyoj

1Kunan ima nisuntaj? Juchachakullasumpunichu Diospa khuyakuynin astawan ashkhayanampaj? 2Chayqa mana jinachu. Juchapajqa wañorqanchejña. Imaynatataj juchallapipuni kausasunri? 3Chayrí, manachu yachankichej Cristo Jesuspi tukuy bautizasqa kajkunaqa, wañuynimpi bautizasqas kasqanchejta? 4Bautismonejta Cristowan khuska wañuypi p'ampasqas karqanchej, imaynatachus Cristopis, wañusqamanta kausarimorqa, Dios Tata jatunchasqa kanampaj atiyninwan; ajinallatataj noqanchejpis mosoj kausaypi purinachej.

5Wañuynimpa rijch'aynimpichus paywan khuska churasqa karqanchej chayqa, ajinallataj kasunchej kausarimuynimpipis. 6Yachanchej mauk'a runanchejqa paywan khuska chakatasqa kasqanta, juchallikoj aychanchej wañunampaj, amañataj astawan juchata kasunanchejpaj. 7Pichus juchapaj wañojqa, juchamanta kacharisqaña. 8Cristowan wañunchej chayqa, creenchej paywan khuskallataj kausananchejta. 9Yachanchej Cristoqa wañusqamanta kausarimuspa, manaña wañunanta. Wañoyqa manaña payta taripanqachu. 10Juchapaj wañuspaqa, uj kutillata wañun wiñaypaj, kausaspataj Diosllapaj kausan. 11Ajinallatataj qankunapis yachaychej, juchapaj wañusqas kasqaykichejta, Diospajtaj kausasqaykichejta Cristo Jesús Señorninchejpi.

12Chayrayku juchaqa wañoj cuerpoykichejta ama atipachunchu, amaña sajra munayninta kasunaykichejpaj. 13Amallataj cuerpoykichejta juchaman qoychejchu, paynejta sajra imasta ruwanapajqa. Astawanqa qankuna kikiykichej wañusqasmanta kausarimusqas jina, Diosman qayllakuychej; cuerpoykichejtataj Diosman qoychej, cheqan kajta ruwanampaj. 14Chayrayku juchaqa manaña kamachisonqachejchu, imaraykuchus manaña leypa kamachimpichu kankichej, astawanqa Diospa khuyakuynimpi kankichej.

Cheqan kajpa kamachisnin

15Chantaqa, juchallikusunchu mana leypa kamachiynimpi kaspa, Diospa khuyakuynimpi kasqanchejrayku? Chayqa mana jinachu. 16Manachu yachankichej pillatapis wata runa jina kasuspa, chaypa kamachin kasqaykichejta? Ajina ari, juchata kasunkichej chayqa, wañuypaj kanqa; Diosta kasunkichej chayrí, cheqan kausaypaj kanqa. 17Ñaupajta juchaj kamachisnin karqankichej. Kunantajrí Diospa khuyakuyninrayku tukuy sonqowan kasunkichejña, chay yachachiy qosqaman jina, mayqempichus yachachisqas karqankichej. 18Juchamanta kacharisqas kaspataj, cheqan kajpa kamachisninman tukunkichej. 19Runa jina parlani, pisi kallpayoj kasqaykichejrayku. Ajinamanta qankunaqa ñaupajta cuerpoykichejta qorqankichej, millay kajman, sajra kajmampis. Ajinata kunanqa llimphuchasqas kanaykichejpaj, cuerpoykichejta Diosman qoychej, cheqan kajta kasunaykichejpaj.

20Juchaj kamachisnin kashaspaqa, cheqan kajta ruwanapaj, manaraj kamachisqaschu karqankichej. 21Chantá, chay imaspi ima allintataj tarerqankichej, mayqenmantachus kunan p'enqakushankichej chaykunamanta? Chaykunaj tukukuynenqa wañuymin. 22Juchaj kamachiyninmanta kacharisqas kaspaqa, Diospa kamachisninña kankichej. Chaynejtataj, llimphu kausayta poqoyta jina tarinkichej; chaypa tukukuynintaj wiñay kausay. 23Juchaj pagonqa wañuymin, Diospa regalonrí wiñay kausay, Cristo Jesús Señorninchejpi.

Currently Selected:

ROMANOS 6: QCHSB

Highlight

Copy

Compare