ROMANOS 7

Leymanta t'aqasqasña kanchej

1Manachu yachankichej hermanos, leyta rejsejkunaman parlani, leyqa atiyniyoj kasqanta kamachinampaj runa kausanankamalla? 2Qosayoj warmeqa, qosan kausanankamalla, leynejta qosampa kamachiynimpi kanan tiyan. Qosan wañupojtinrí, leynejllatataj manaña qosampa kamachiynimpichu. 3Chayrayku sichus qosan kausashajtin waj qhariwantaj tantakun chayqa, chay warmeqa qhenchachakun. Qosan wañupojtinrí, leynejta manaña qosampa kamachiynimpichu. Chaynejta waj qhariwan casaraspaqa mana qhenchachakunchu.

4Ajinallatataj qankunapis, hermanosníy, leypaj wañorqankichej, Cristo wañusqannejta, wajpataña kanaykichejpaj, pichus wañusqakunamanta kausarichimorqa chaypata; Diospajtaj allin imasta ruwananchejpaj. 5Cheqamanta aychanchejpi kashaspaqa, juchaj munaynin leynejta ukhunchejpi karqa, chaytaj wañuyman apaj. 6Ñaupajta leypa kamachiynimpi karqanchej, kunanrí, leymanta t'aqasqasña kanchej, imaraykuchus leypajqa wañorqanchejña. Chayrayku Espiritunejta Diospa mosoj kamachinta kasuna, amaña ñaupa leypa nisqantaqa.

Leynejta juchata rejsinchej

7Chantá, ima nisuntajri? Leyqa juchachu? Chayqa mana juchachu. Noqaqa mana imaynamantapis juchata rejsiymanchu karqa mana ley kajtenqa; manallataj rejsiymanchu karqa imachus munapayay kasqantapis, manachus ley ninman karqa, ama munapayankichu, nispa chayqa. 8Jucharí leynejta noqapi churasqa, tukuy imaymana munapayaytaj, imaraykuchus ley mana kajtenqa juchaqa wañusqamin. 9Uj p'unchaypi kausarqani mana leyllawan; ley jamojtinrí, juchaqa kausarerqa, noqataj wañorqani. 10Chay kikin leytaj kausaypaj karqa, noqapajtajrí wañuyta apamorqa. 11Juchaqa leynejta ch'aukiyawarqa, chay leynejtataj wañuchiwarqa.

12Cheqamanta leyqa llimphu, kamachiypis llimphu, cheqan, k'achataj. 13Chantá, chay allin kaj leychu churasqa karqa noqa wañunaypaj? Chayqa mana jinachu; manachayqa jucha kasqanta rikuchinawampaj noqata wañuchiwarqa allin kajnejta. Jinamanta juchaqa leynejta manchay sajra juchallikojpuni kasqanta rikuchikorqa.

14Yachanchej, leyqa Espirituman jina churasqa kasqanta; noqarí aychamanta kaspa, juchaman qosqa kani. 15Imatachus ruwasqayta mana yachanichu; chayrayku mana ruwanichu imatachus munasqayta. Astawanqa imatachus chejnini, chayta ruwani. 16Imatachus mana munanichu chayta ruwani. Chayrayku yachani chay ley allin kasqanta. 17Jinamantaqa manaña noqachu chaykunata ruwani, astawanqa noqapi kashan chay jucha, chaytaqa ruwan. 18Yachani ari cheqa kaj mana noqapi kasqanta, chay niyta munan aychaypi. Cheqa kajta ruwayta munayqa noqapi kashan, manataj atinichu. 19Allin kajta ruwayta munasqaytaqa, mana ruwanichu, astawanqa sajra kajta mana munasqaytaraj ruwani. 20Imatachus mana munasqayta ruwani chayqa, manaña noqachu ruwani; astawanqa noqapi kashan chay jucha, chaytaqa ruwan.

21Ajinapeqa allin kajta ruwayta munaspa, kay leyta tarini, sajra kajqa noqapi kasqanta. 22Sonqoypeqa Diospa leynimpi kusikuni. 23Chantá waj leyta cuerpoypi rikuni, chaytaj sonqoypa contrampi kashan; presochasqatataj juchaj leyninman pusawan, mayqenchus ukhuypi kashan, chayman.

24-25Way, noqamanta! Pitaj kay wañoj cuerpoymanta kacharichiwanqari? Dioslla, pitachus graciasta qoni Señorninchej Jesucristonejta. Ajinamantaqa, yuyayniywan Diospa leyninta kasuni, aychaywantaj juchaj leyninta.

Currently Selected:

ROMANOS 7: QCHSB

Highlight

Copy

Compare