ROMANOS 5

Diospa cheqan runapaj rejsisqasnimpa rikuchiynin

1Fenejta salvasqas kaspa, Dioswan allinyachisqas kanchej, Señorninchej Jesucristonejta. 2Paynejta yaykuyta atinchej chay salvacionman creesqanchejrayku, chaypitaj sinch'ita sayanchej, kusikunchejtaj, Diospa janaj pacha k'anchayninta suyaspa. 3Mana chayllachu, astawanqa kusikullanchejtaj llakiykunapi yachaspa llakiykunaqa pacienciata qowasqanchejta. 4Pacienciaqa allin kasqanchejta yachachiwanchej, chaytajrí suyakuyta qowanchej. 5Suyakoyqa mana p'enqachikunchu, imaraykuchus Diospa munakuynenqa sonqonchejpi churasqa kashan, Santo Espiritunejta, mayqentachus Dios qowarqanchej.

6Pisi kallpayojllaraj kashajtinchej, maychus tiempompi Cristo wañorqa juchasapasrayku. 7Cheqamanta mana pipis wañunmanchu pi runaraykullapis; ichapis atinman wañuyta uj allin runarayku. 8Chay tukuywampis Dios munakuyninta rikuchiwanchej, juchasapasllaraj kashajtinchej, Cristoqa wañorqaña noqanchejrayku. 9Kunanqa astawanraj qowasun, yawarninrayku Dioswan allinyasqaña kajtinchej, paynejtataj k'ajaj phiñakuymanta salvasqas kasunchej. 10Diospa contrampi kashaspa, Dioswan allinyakorqanchej, Churimpa wañuyninnejta. Astawanraj ari allinyasqaña kaspaqa, salvasqas kasunchej kausasqanrayku. 11Mana kayllachu, astawanqa Diospi kusikullanchejtaj, Señorninchej Jesucristonejta, pay Dioswan allinyachiwasqanchejrayku.

Adannejta jucha jamorqa, Cristonejtataj salvación

12Uj runanejta jucha kay pachaman yaykumorqa, jucharaykutaj wañuypis tiyan. Ajinamanta wañoyqa tukuy runakunapaj karqa, tukuyninku juchallikusqankurayku. 13Manaraj ley kashajtin, ñapis jucha kay pachapi karqaña; maypichus ley mana kanchu chayqa, juchaqa, manaña juchachu. 14Chaywampis wañoyqa atiyniyoj karqa Adanmanta Moiseskama. Ajinallataj wañoyqa karqa, mana Adán jina juchallikojkunapajpis. Adanqa chay jamojpa rijch'aynillan karqa.

15Diospa qowasqanchej regaloqa mana jucha jinachu. Sichus uj runaj juchanrayku, ashkhas wañorqanku chayqa, astawanraj ashkhaspaj Diospa khuyakuynenqa, regalontaj yapakorqa, uj runaj khuyakuyninrayku. Chaytaj Jesucristo karqa, qhasilla, tukuypajtaj. 16Diospa qowasqanchej regaloqa, mana chay uj runaj juchallikusqan jinachu. Cheqamanta juicioqa jamun, uj k'ata jucharayku wañuypaj, salvaciontajrí, ashkha juchasrayku jamorqa mana juchayoj kanapaj. 17Sichus uj runaj juchanrayku wañuy atiyniyoj karqa chayqa, aswan atiyniyojraj kanqanku mosoj kausaypi Jesucristonejta, pikunachus qhasimanta jatun salvacionta jap'inku, cheqan kaypa regalontawan.

18Ajinata Adanraykulla jucha jamorqa, tukuy runa juchachasqa kanampaj. Ajinallataj Jesucristonejta cheqan kasqanrayku tukuy runapaj cheqan kausay jamorqa. 19Uj runa mana kasukusqanrayku tukuy runakuna juchallikorqanku. Ajinallatataj uj runa kasukusqanrayku, ashkhas cheqan runaspaj qhawasqas karqanku.

20Leyqa churasqa karqa, astawan jucha yapakunampaj. Juchastawan yapakojtinrí, Diospa khuyakuynimpis astawanraj yapakorqa. 21Chayqa karqa imaynatachus jucha atiyniyoj karqa wañuy kanampaj, ajinallatataj Diospa khuyakuynimpis atiyniyoj kanqa, cheqan kajnejta wiñay kausaypaj Señorninchej Jesucristonejta.

Currently Selected:

ROMANOS 5: QCHSB

Highlight

Copy

Compare