APOCALIPSIS 7

Israelpa ayllusninmanta sellasqas

1Kay imas qhepata rikorqani tawa angelesta, jallp'aj tawantin cantompi sayashajta. Paykunataj jallp'aj tawantin wayrasta jark'asharqanku, ama ima wayra jallp'a pataman wayramunampaj, nitaj mar qocha pataman, nitaj ima sach'a patamampis. 2Rikullarqanitaj waj angelta inti llojsimuynejmanta wicharimojta, kausaj Diospa sellon oqharisqata. Qhaparerqataj sinch'ita chay tawa angelesta, paykunamantaj atiy qosqa karqa, mar qochata, jallp'atawan nanachinankupaj. 3Nerqataj: Ama imanaychejchu jallp'ata, nitaj mar qochata, nitaj sach'astapis, Diosninchejpa kamachisninta frentesninkupi sellanaykukama.

4Sellasqakunaj yupaynintaj uyarerqani: Israelpa churisnin tukuynin ayllusmanta, pachaj tawa chunka tawayoj waranqa sellasqas karqanku. 5Judajpa ayllunmanta chunka iskayniyoj waranqa. Rubempa ayllunmanta chunka iskayniyoj waranqa. Gadpa ayllunmanta chunka iskayniyoj waranqa. 6Aserpa ayllunmanta chunka iskayniyoj waranqa. Neftalejpa ayllunmanta chunka iskayniyoj waranqa. Manasespa ayllunmanta chunka iskayniyoj waranqa. 7Simeompa ayllunmanta chunka iskayniyoj waranqa. Levejpa ayllunmanta chunka iskayniyoj waranqa. Isacarpa ayllunmanta chunka iskayniyoj waranqa. 8Zabulompa ayllunmanta chunka iskayniyoj waranqa. Josejpa ayllunmanta chunka iskayniyoj waranqa. Benjamimpa ayllunmantapis chunka iskayniyoj waranqa sellasqas.

Ashkha runa yuraj p'achasniyoj

9Kay imaspa qhepanta, ancha ashkha runata rikorqani, mana yupay atinata tukuy llajtamanta, ayllumanta, runasmanta, tukuy parlaykunamantawan. Paykunaqa tronoj ñaupaqempi, Corderoj ñaupaqempi kasharqanku, yuraj p'achaswan p'achallisqas. Palmastataj makisninkupi jap'isharqanku. 10Paykunataj sinch'ita qhaparispa nerqanku: Salvacionqa Diosninchejpata, pichus tronopi tiyasqa kashan chaypata, Corderojpatawan. 11Tukuy angelestaj, tronoj, kurajkunaj, tawa animalespa muyuynimpi sayasharqanku. Qonqoriykukuspataj k'umuykukorqanku Diosta yupaychanankupaj. 12Nerqankutaj: Amén. Khuyakuy, yupaychay, yachay, graciasta kutichiy, jatunchay, atiy, kallpachay, Diosninchejman wiñay wiñaypaj kachun. Amén.

13Chay kuraj runasmanta ujnin tapuwaspa, niwarqa: Chay yuraj p'achaswan p'achallisqas, pikunataj kanku, maymantataj jamorqankuri? 14Noqataj payman kuticherqani: Wiraqochi, chaytaqa qan yachanki, nispa. Paytaj niwarqa: Kaykunaqa jatun llakiymanta jamojkuna kanku. P'achasninkuta t'ajsarqanku, Corderoj yawarnimpitaj yurajyacherqanku.

15Chayrayku Diospa tronompa ñaupaqempi kashanku, tuta p'unchaytaj templopi yupaychanku; tronopi tiyajtaj wasi toldonta paykunaman qhataykonqa. 16Manaña astawan yarqhachikonqankuchu, nitaj ch'akichikonqankuchu, nitaj intipis paykunaj patanman k'ajaykamonqachu, nitaj ni ima q'oñipis. 17Trono chaupipi kashaj Corderoqa paykunata michenqa, kausaj yaku pujyusninmantaj pusanqa. Diostaj paykunaj ñawisninkumanta tukuy waqayta pichanqa.

Currently Selected:

APOCALIPSIS 7: QCHSB

Highlight

Copy

Compare