APOCALIPSIS 6

Qanchis sellos

1Rikorqanitaj Cordero kicharishajta ujnin sellota, uyarerqanitaj tawa kajkunamanta ujnin animalta nejta, qhon qhompis sonanman jina: Jamuy, rikuytaj, nispa. 2Rikorqanitaj: Chaypi karqa uj yuraj caballo. Patampitaj lloq'asqaqa uj arcota flechanampaj jap'isharqa. Paymantaj uj pilluta qorqanku. Atipaspa llojserqa, atipanallampajtaj.

3Iskay kaj sellota kicharejtintaj, iskay kaj animalta uyarerqani nejta: Jamuy, rikuytaj. 4Uj puka caballotaj llojsimorqa. Chaypa patampi lloq'asqa kajmantaj atiyta qorqanku, sonqo tiyakuyta jallp'a patamanta qhechunampaj, ujkuna ujkunataj wañuchinakunankupaj, uj jatun espadatataj payman qorqanku.

5Kinsa kaj sellota kicharejtintaj, kinsa kaj animalta uyarerqani nejta: Jamuy, rikuytaj. Rikorqanitaj uj yana caballota. Chay patampi lloq'asqa kajtaj pesasta makimpi jap'isharqa. 6Tawa animalespa chaupimpitaj uj parlajta jina uyarerqani nejta: Iskay libra trigo uj denario qolqepaj, sojta libra cebadataj uj denario qolqepaj. Amataj aceiteta, vinotapis usuchiychejchu.

7Tawa kaj sellota kicharejtintaj, tawa kaj animalpa parlamusqanta uyarerqani nejta: Jamuy, rikuytaj. 8Rikullarqanitaj uj q'ellu caballota. Patampi lloq'asqa kajpatataj sutenqa wañuy karqa. Wañuy nisqataj payta qhatisharqa. Payman tukuynin jallp'amanta tawan kaj suyuta qorqanku wañuchinampaj espadawan, yarqhaywan, onqoykunawan, jallp'api monte animaleswan ima.

9Phishqa kaj sellota kicharejtintaj, altar urapi almasta rikorqani, pikunachus wañorqanku Diospa palabranrayku, payta rejsichisqankuraykutaj. 10Sinch'itataj qhaparisharqanku nispa: Jayk'ajkamataj Señor, santo, cheqa kaj, jallp'a patapi tiyakojkunata mana juzgankichu, nitaj yawarniykumanta cuentata mañankichu? 11Yuraj p'achasta sapa ujninkuman qorqanku, nerqankutaj uj pisitawan samarinankuta, kamachi masisninku, hermanosninku ima junt'amunankukama. Paykunapis wañuchisqasllataj kananku tiyan.

12Sojta kaj sellota kicharejtintaj, rikorqani manchay jallp'a ikhakuyta; intitaj yanayarqa uj qhashqa yana p'acha jina, killataj yawarman tukorqa. 13Cielo qoyllurkunataj jallp'a pataman urmaramorqanku, imaynatachus higo sach'ata wayra thalaspa, higosta urmarachin, ajinata. 14Cielotaj ithirikaporqa, imaynatachus uj escribisqa papel k'uyuykukun ajinata. Tukuy orqotaj, yaku pata churu jallp'aspis, kasqankumanta kuyurerqanku. 15Jallp'api reyes kajkuna, kurajkuna, soldadosta kamachejkuna, qhapajkuna, atiyniyojkuna, tukuy kamachis, mana kamachis kajkunapis, qaqa jusk'uspi, orqo jusk'uspi ima pakaykukorqanku. 16Orqosman, qaqasmantaj nerqanku: Pataykuman urmaykamuwayku. Pakaykuwaykutaj jaqay trono patapi tiyajpa uyanmanta, Corderoj k'ajaj phiñakuyninmantawan. 17Paypa k'ajaj phiñakuynimpa jatun p'unchaynin chayamunña. Pitaj atenqa sayaytari?

Currently Selected:

APOCALIPSIS 6: QCHSB

Highlight

Copy

Compare