APOCALIPSIS 18

Babilonia llajtaj urmaynin

1Kay imas qhepata waj angelta rikorqani janaj pachamanta uraykamushajta, jatun atiywan. Kay pachataj lliphiperqa angelpa k'anchayninwan. 2Paytaj kallpawan qhaparerqa: Urmanña, urmanña jatun Babiloniaqa. Supaykunaj wasinman tukun, tukuy millay espíritoj pakakunanman, tukuy millay chejnina p'isqospa thapanman, nispa. 3Tukuy llajtakuna ujyarqanku qhenchachakusqampa vinota. Kay pachapi reyestaj paywan qhenchachakorqanku. Kay pachapi qhatojkunapis kusiy kausaypa atiyninwan qhapajyarqanku.

4Janaj pachamanta wajpa parlamusqanta uyarerqani, nimojta: Llojsimuychej chay llajtamanta aylluymanta kajkuna. Ama paypa juchasninman chajrukuychejchu, ama paywan jasut'ita jap'inaykichejpaj. 5Juchasnenqa janaj pachakama chayanku, Diostaj sajra ruwasqasninkumanta yuyarikun. 6Payman kutichipuychej, imaynatachus qankunaman qorqasunkichej ajinata; ruwasqasninman jinataj iskay kutitawan kutichipuychej, ima copapichá qankunaman ujyachisorqachej, chayllapitaj iskay kutitawan ujyachiychej. 7Imaynatachus pay jatunchakorqa, kusiykunapi kausarqa, ajinallatataj payman ñak'ariyta, waqaytawan qoychej. Payqa sonqompi nin: Noqaqa reina jina tiyasqa kashani, manataj viudachu kani, nitaj waqaytapis rikusajchu. 8Chayrayku uj p'unchayllapi ñak'ariykunasnin jamonqanku: Wañuy, waqay, yarqhaytaj. Chantá ninwantaj ruphasqa kanqa. Atiyniyoj Dios Señorqa payta juchachan.

9Kay pachapi reyes paywan qhenchachakorqanku, paywantaj sajra puriykunapi kausarqanku. Chaykuna ruphakusqampa q'osñinta rikuspa, pay jawa qhaparispa waqanqanku. 10Paypa ñak'ariyninmanta manchaywan, karupi sayaykuspa, nenqanku: Way, way chay jatun Babilonia llajtamanta! Uj horallapi ñak'ariyniyki chayamusunki.

11Chaypacha qhatojkuna paymanta waqanku, manchaytataj qhaparinku. Manaña pipis qhatusninkuta rantej kanchu. 12Chay qhatusqa karqanku qorimanta, qolqemanta, qhapaj k'anchay rumismanta, walqasmanta, sumaj awasqa linomanta, kulli awasqamanta, sedamanta, puka awamanta, tukuy qhapaj k'aspismanta, marfilmanta, tukuy ima ruwasqas precioyoj k'ullumanta, tukuy ima ruwasqas broncemanta, fierromanta, marmolmanta ima. 13Chaymantataj karqa canela, q'apaykuna, incienso, mirra, q'apaj jawina, vino, aceite, suysusqa jak'u, trigo, wakas, ovejas, caballos, carrostaj, kamachistaj, runaspa almasnin ima. 14Almaykej munapayasqan poqoykuna qanmanta t'aqakapunkuña, chay k'acha sumaj imaspis chinkarinkuña, manataj jayk'ajpis tarinkiñachu chaykunataqa.

15Chay imasta qhatojkunataj, paynejta qhapajyarqanku chaykuna, ñak'ariyninmanta manchaywan karupi sayaykuspa, waqanqanku, llakikonqankutaj. 16Nenqankutaj: Ay, ay, chay jatun llajtamanta! Allin awasqa linomanta p'achallikoj, kulli, puka p'achamantapis qoriwantaj qhapaj, k'anchaj rumiswantaj, walqaswan ima p'achallikoj. 17Uj horallapi chay chhika qhapaj kaynin tukukaporqa.

Tukuy boteta purichejpis, tukuy botepi rejkunapis, botepi yanapajkunapis, mar qochapi llank'ajkunapis karupi sayaykorqanku. 18Ruphaykusqampa q'osñinta rikuspataj qhaparerqanku: Ima llajtataj kay jatun llajtaman rijch'akorqari?, nispa. 19Umasninkumantaj ñut'u jallp'ata jich'aykukuspa qhaparerqanku, jik'un jik'unta waqaspataj nerqanku: Way, way jatun llajtamanta! Mar qochapi tukuy botesniyoj paypa kapuyninwan qhapajyarqanku. Kunantaj uj horallapi ch'inyarparin.

20Chaymanta kusikuychej janaj pacha, qankuna ajllasqas, apóstoles, profetaspis. Diosqa qankunarayku payman maychus kajta kutichipun.

21Uj kallpasapa angeltaj uj rumita oqharispa, jatun molino rumita jina mar qochaman wijch'uykorqa, nispa: Ajinallatataj sinch'i kallpawan wijch'usqa kanqa chay jatun Babilonia llajta, manataj jayk'ajpis rikhurenqañachu. 22Manaña qampeqa arpata tocajkunaj vozninku uyarikonqañachu, nitaj musicospatapis, qenata, putututa phukojkunajtapis; manataj ni ima oficiopi llank'ajllapis qampi tarikonqañachu, molinoj sonasqampis manaña qampi uyarikonqañachu. 23Manataj qampi lámparaj k'anchaynin lliphipenqachu, nitaj qosaj parlasqan, nitaj warmimpatapis uyarikonqañachu; imaraykuchus qhatojkunasniykipis chaypacha atiyniyoj karqanku. Qampis layqeriosniykiwan tukuy llajtakunata ch'aukiyaspa pantacherqanki.

24Chay llajtapi tarikorqa profetasa, ajllasqaspa yawarnin, tukuy kay pachapi wañuchisqas karqanku chaykunajtawan.

Currently Selected:

APOCALIPSIS 18: QCHSB

Highlight

Copy

Compare