APOCALIPSIS 12

Warmimanta sierpemantawan

1Uj jatun señaltaj janaj pachapi rikhurerqa. Intiwan p'achallisqa warmi, killataj chakisnin urapi, uman patapitaj uj pillu chunka iskayniyoj qoyllurkunayoj. 2Wijsallisqa kaspataj, wachakuy nanaykunawan qhaparispa, nacichikunampaj ñak'arisharqa. 3Waj señaltaj janaj pachapi rikukorqa: Uj jatun puka sierpe, qanchis umayoj, chunka wajrayoj, umasnimpitaj qanchis pilluyoj. 4Chupantaj janaj pachapi qoyllurkunaj kinsa kaj t'aqanta phiskurparerqa, jallp'amantaj wijch'uykamorqa. Chay sierpeqa wachakunayashaj warmej ñaupaqempi sayaykorqa, wachakojtinkama wawanta oqoykunampaj. 5Warmitaj uj qhari wawata nacichikorqa, paytaj tukuy llajtasta fierro varawan kamachenqa. Wawantaj oqharisqa karqa Diospaj, tronompajtaj. 6Chay warmitaj ch'inman ayqerqa, maypichus uj cheqata Dios paypaj wakicherqa chayman. Chaypitaj waranqa iskay pachaj sojta chunkayoj p'unchayta payman mikhucherqanku.

7Jatun maqanakutaj janaj pachapi karqa. Miguel, angelesnin ima sierpewan maqanakorqanku. 8Manataj Miguelta atiparqankuchu, paykunapajtaj janaj pachapi manaña astawan tiyananku atikorqachu. 9Jawamantaj chay jatun sierpeta wijch'orqanku, chay unay ñaupa katarita, pichus sutichasqa Supay, Satanastaj. Payqa llullakuspa mundontinta pantachin. Payta angelesnintawan jallp'aman wijch'umorqanku.

10Janaj pachamanta uj sinch'ita parlamojta uyarerqani, nimojta: Kunanqa Diosninchejpa salvacionnin, atiynin, reinompis chayamunña, Cristompa atiynimpis. Hermanosninchejta ch'atajqa, wijch'usqa kashan, pichus tuta p'unchay Diosninchejpa ñaupaqempi paykunata ch'ataykoj, chay. 11Paykunaqa atiparqanku Corderoj yawarninrayku, Diospa palabranta willasqankurayku, pisipitaj kausayninkuta jap'isqankurayku wañunankukama. 12Chayrayku kusikuychej janaj pachakuna, chaypi tiyakojkunapis. Ay, jallp'a patapi, qocha patapipis tiyakojkunamanta!, imaraykuchus supayqa manchay phiñasqa qankunaman uraykamun, yachaspa paypaj pisi tiempollaña kasqanta.

13Sierpetaj jallp'aman wijch'usqa kasqanta rikukuspa, qhari wawata wachakoj warmita qhatiykacherqa. 14Warmimantaj jatun ankajpa iskaynin lijrasninta qorqanku, phawanampaj katarej qayllanmanta ch'innejman, maypichus tiyakun chayman, maypitajchus mikhuchinku uj tiempopaj, tiempospaj, khuskan tiempopaj ima. 15Kataritaj warmej qhepanta siminmanta yakuta ajtumorqa mayuta jina, chay warmita yaku apanampaj. 16Jallp'ataj warmita yanaparqa; jallp'aqa siminta kicharispa chay mayu yakuta ch'onqaykorqa, mayqentachus sierpeqa siminmanta ajtumorqa, chayta. 17Chaypachataj sierpeqa warmipaj mayta phiñakorqa; rerqataj warmej mirayninmanta kajkunawan maqanakoj, Diospa kamachisqasninta waqaychanku, Jesuspa willasqasnintataj jap'inku chaykunawan.

Currently Selected:

APOCALIPSIS 12: QCHSB

Highlight

Copy

Compare