FILIPENSES 3

Ñaupajman rinamanta

1Kunanqa hermanos, kusikuychej Señorpi. Noqapajqa mana imachu escribimusqayqa kikin kikinta, imaraykuchus qankunapaj sumaj allin kasqanrayku. 2Ithirikuychej alqos kajkunamanta. Ithirikuychej sajra imasta ruwajkunamanta. Ithirikuychej khuhurachiyta munajkunamanta. 3Noqanchejqa cheqamanta circuncisionmanta kanchej, imaraykuchus Diosta yupaychanchej Espirituman jina; kusikunchejtaj Cristo Jesuspi kasqanchejmanta, manataj chay circuncisionkunaspichu confianchej. 4Noqaqa atiymampis mundoj imasnimpi confiakuyta. Pillapis kay mundoj imasnimpi confiakuyta yuyanman chayqa, noqaqa astawanraj confiakuyman. 5Nacikusqaymanta pusaj p'unchayninman circuncidasqa karqani. Israelitataj kani Benjamimpa ayllunmanta. Hebreospa ayllunmanta hebreo kani. Judiospa leyninman jinataj fariseo kani. 6Leypi anchata creespa, Cristoj iglesianta qhatiykachaspataj ñak'aricherqani. Leypa cheqan kayninta waqaychaypeqa mana k'amina karqani. 7Chay tukuy imasqa qhapajyanaypaj karqanku. Kunantaj chaykunata qhesachani Cristota munakusqayrayku. 8Cheqamanta tukuy imata chinkasqasta jina qhawani Señor Jesucristota allinta rejsisqayrayku. Paypa munakuyninraykutaj tukuy imata saqepuni. Chaykunataqa q'opata jina qhawani, Cristojta kanaypaj. 9-11Paywan kayta munani manaña leyman jinachu kausanaypaj, astawanqa Cristopi creespa. Chaytaj Diospa cheqan kayninmanta feman jina; chayrayku Cristota astawan rejsinaypaj kausarimuynimpi, ferayku payman rijch'akunaypaj wañuynimpi, suyashanitaj imaynamantapis kausarimuyta wañusqakunamanta.

Atipajqa t'inkata jap'enqa

12Manaraj chaykunata taripanichu, nitaj cheqan runa kaymampis chayanirajchu; astawanqa ñaupajman rishani, ichapis taripayman nispa, imaynatachus Cristo Jesuswan ñaupajpi taripachikorqani, ajinata. 13Hermanos, mana ninichu noqa kikiy taripasqaytaña; astawanrí kay imasta ruwani qonqapuspa qhepapi kajmanta, taripanaypaj ñaupajpi kajta. 14Ñaupajman rishani chayanaman chayanaykama t'inkata jap'inaypaj, patamanta Dios wajyawarqa Cristo Jesuspi, chayman.

15Tukuy fepi allin wiñasqa kajkunaqa uj rejllata yuyana. Sichus waj jinata yuyawajchej chayqa, chaytapis sut'inchasonqachej Diosllataj. 16Kayman chayamuspataj uj yuyaylla, uj kamachiyllapitaj kausanachej.

17Hermanos, noqamanta yachakuychej, qhawaychejtaj pikunachus noqayku jina kausajkunata yachachisqaykuman jina. 18Ña niykichejña ashkha kutista. Kunampis waqayniywan nillaykichejtaj Cristoj cruznimpa enemigosnin ashkhas kasqankuta. 19Paykunaj tukukuynenqa wañuy, diosninkutaj wijsanku. P'enqaykunata ruwaspa kusikunku. Paykunaqa kay pachapi kajkunallata mask'ashanku. 20Llajtanchejqa janaj pachapi kashan, maymantachus suyashanchej. Salvadorninchej Señor Jesucristo jamunanta. 21Paytaj kay k'umuykukusqa cuerponchejta waj jinaman tukuchenqa, kikin paypa lliphipej cuerponman jina. Chay kikin atiyllawantaj tukuy imasta kamachiynimpa uranman churanqa.

Currently Selected:

FILIPENSES 3: QCHSB

Highlight

Copy

Compare