FILEMÓN 1

Pabloj napaykuynin

1Noqa Pablo, Cristo Jesusrayku carcelpi presochasqa kani. Kay cartata escribimuni hermano Timoteowan, qanman munasqa Filemón, llank'aj masi. 2Ajinallatataj, munasqa hermananchej Apiaman, tinkupi yanapawajninchej Arquipoman, wasiykipi tantakoj iglesiamanwan. 3Qankunawan kachun khuyakuy, sonqo tiyakuy Dios Tatanchejmanta, Señor Jesucristomantawan.

Filemompa munakuynin fenin ima

4Qanmanta yuyarikuspa graciasta qonipuni, Diosniymanta mañakuspa. 5Uyarerqanipuni qanmanta, munakuyniyki, feniyki ima Señor Jesuspi kasqanta; jinallatataj Diospi creejkunatapis munakusqaykita. 6Diosmanta mañakuni creesqaykirayku creejkunaqa allinta unanchanankuta, tukuy ima qankunapi allinkuna kasqanta Cristonejta. 7Chayrayku ancha kusisqa, sonqo junt'asqataj kani munakuyniykirayku. Qannejta, hermano, ajllasqaspa sonqosninku kallpachasqas karqanku.

Pablo mañapun khuyakuyta Onesimopaj

8Chayrayku, atiymampis Cristopi kamachisuyta, imachus allin kajta ruwanaykita. 9Astawanqa mañakuyki munakuyrayku, noqa Pablo machuña kaspa, presochasqataj kani Jesucristorayku. 10Mañakuyki espirituman jina waway Onesimota khuyakunaykita, pitachus kay carcelpi kashaspa creejman tukucherqani. Payqa waway jina.

11Ujpacha Onesimoqa qampaj mana walejchu karqa; kunanqa qampaj, noqapajpis allin runa. 12Kunan kachampuyki. Watejmanta jap'ikapuy noqapis kayman jina. 13Munayman karqa pay noqawan qhepakunanta, yanapanawampaj qampaj cuentaykimanta, evangeliorayku preso kashajtiy. 14Mana imata ruwayta munarqanichu, manaraj qanwan parlashaspa, kay khuyakuyniykeqa ama kamachisqa jinachu kanampaj, astawanqa qampa munasqaykiman jina kachun. 15-16Ichapis Onesimoqa kaypaj t'aqakusorqa pisi tiempopaj. Kunanqa wiñaypaj jap'ikapuy, amaña wata runata jinachu, astawanqa uj wata runamantapis astawan munakuywan, uj munasqa hermanota jina. Noqa anchata munakuni. Qampis astawan munakuy, mana mayqen runata jinallachu, astawanqa Señorpi.

17Chayrayku llank'aj masiykichus kani chayqa, payta jap'ikapuy, noqapis kayman jina. 18Ima sajrata ruwasunkiman karqa chaypis, chayri manuyki kanman karqa chaypis, noqa junt'apusqayki. 19Noqa Pablo, makiywan kay cartata escribimuyki. Noqa chay manuta qopusqayki. Astawanqa munani yuyarichisuyta qampis noqaman manu kasqaykita. 20Arí, hermano, kusirichiy sonqoyta Señorpi, kallpachaytaj sonqoyta Cristopi.

21Kayta escribimuyki kasukoj kasqaykirayku, yachaspa kay nisusqaymantapis astawanraj ruwanaykita. 22Wakichipuway wasita chayakunaypaj; imaraykuchus suyashani jamuyta Diosmanta mañapuwasqaykichejman jina.

Napaykunas

23-24Napaykamusunku Epafras, presochasqa masiy Cristo Jesusrayku; evangeliopi yanapawajkuna Marcos, Aristarco, Demas, Lucas ima.

25Señor Jesucristoj khuyakuynin qankunawan kachun.

Currently Selected:

FILEMÓN 1: QCHSB

Highlight

Copy

Compare