HEBREOS 1

Dios parlan Churinnejta

1Ñaupa p'unchaykunapi, ashkha kutita tukuy imaymanamanta, Dios parlamorqa ñaupa tatasninchejman profetasnejta. 2Kay qhepa p'unchaykunapitaj Churinnejta parlamuwarqanchej; paytataj churarqa tukuy imamanta chayaqeyoj kanampaj; paynejtataj tukuy mundontinta ruwarqa. 3Paytaj Diospa k'anchaynimpa lliphipiynin kaspa, Dios kaynimpa kikin rijch'aynintaj, tukuy imata palabrampa atiyninwan sayachin, pay kikintaj juchasninchejta pichaspa, jatun kajpa pañanman janaj pachapi tiyaykukorqa.

Diospa Churenqa angelesmanta nisqaqa aswan kuraj

4Angelesmanta astawan sumaj kaspa, paykunamanta nisqaqa, aswan jatun sutitaraj chayaqepaj jap'erqa. 5Ajina kajtenqa, mayqen angelesmantaj Dios jayk'ajpis nerqa: Qan Churiy kanki. Kunan p'unchay yumarqayki, nispa? Ujtawan nillarqataj: Noqa paypa tatan kasaj, paytaj churiy kanqa, nispa. 6Ujtawan ñaupaj kaj Churinta kay mundoman pusaykamushaspa nerqa: Diospa tukuy angelesnin payta yupaychachunku. 7Cheqamanta Dios angelesninmantaqa nerqa: Pichus angelesninta espiritusta ruwan, kamachisnintapis nina larwaykunata jina. 8Payllataj Churimanta nin: Tiyakunaykeqa Diosníy, wiñaypaj wiñaynintinkama; reinoykej taunanqa, cheqan kaj taunamin. 9Cheqan kajta munakorqanki, sajra kajtataj chejnerqanki. Chayrayku Dios, qampa Diosniyki, kusiy aceitewan jawisorqa, astawanraj kausaqesniykimanta nisqaqa. 10Ajinallatataj nerqa: Qanmin, Señorníy, qallariypeqa jallp'ata ruwarqanki; janajkunapi kajkunapis makisniykej ruwasqallantaj. 11Chaykunaqa tukukonqanku. Qanrí kallankipuni. Tukuyninkutaj p'acha jina mauk'ayanqanku. 12P'acha jinataj paykunata mayt'uykukunki, paykunataj uj jinayanqanku. Qanrí kikillampuni kanki, watasniykipis mana tukukuyniyoj. 13Chantá, mayqen angelmantaj jayk'ajpis nerqa: Pañayman tiyaykukuy, chejnisojkunatataj chakisniyki uraman churanaykama, nispa? 14Manachu tukuynin espíritus kamachis kanku, Diospa kachamusqasnin, salvacionta chayaqepaj jap'ejkunata yanapanankupaj?

Currently Selected:

HEBREOS 1: QCHSB

Highlight

Copy

Compare