SAN MARCOS 8

Jesús mikhuchin tawa waranqa runasman

(Mt 15.32-39)

1-2Chay p'unchaykunapi ujtawan ashkha runas tantakamorqanku. Mana imapis mikhunankupaj kajtintaj, yachachisqasninta wajyaspa Jesús nerqa: Kay runasmanta sonqoy nanawan, imaraykuchus kinsa diataña noqawan kashanku, manataj imapis mikhunankupaj kanchu. 3Mana mikhusqasta wasisninkuman kachapusaj chayqa, ñampi sayk'uspa llauchhuyankuman, imaraykuchus wakenqa karumanta jamunku.

4Yachachisqasnintaj kuticherqanku: Maypitaj t'anta kanman, kay ch'impi, kay chhika runaman mikhuchinapajri?

5Jesustaj paykunata taporqa: Mashkha t'antastaj kapusunkichej? Paykunataj kuticherqanku: Qanchis t'antalla tiyan, nispa.

6Jesustaj runasta kamacherqa pampapi tiyarakunankuta. Chay qanchis t'antasta jap'ispataj, Diosman graciasta qorqa. T'antasta partiraspataj yachachisqasninman jaywarqa, runasman qomunankupaj. Paykunataj ajinata ruwarqanku. 7Kallarqataj paykunajta pisi challwitasninku; chaykunamantapis graciasta qospa kamachillarqataj chaytapis runasman jaywamunankuta. 8Tukuyninkutaj mikhorqanku sajsakunankukama; puchojtataj qanchis canastas junt'asta oqharerqanku.

9Mikhojkunaqa tawa waranqa jina qharis karqanku; chaymantataj Jesús runasta kacharaporqa. 10Chay kikimpachataj, yachachisqasninwan, boteman yaykuspa Dalmanuta jallp'aman riporqa.

Fariseos mañanku señalta

(Mt 16.1-4; Lc 12.54-56)

11Chaymantaqa, fariseos jamuspa Jesuswan churanakuyta qallarerqanku; pantachiyta munaspataj mañarqanku cielomanta señalta rikuchinanta. 12Jesustaj mayta ayqhospa, paykunaman nerqa: Imaraykutaj kunan tiempo runas señalta rikuyta munanku? Sut'inta niykichej: Mana ima señalpis ruwakonqachu kunan tiempo runaspajqa.

13Paykunata saqerparispataj, yachachisqasninwan ujtawan boteman yaykuspa qocha chimpaman rerqa.

Fariseospa levaduran

(Mt 16.5-12)

14Yachachisqasnintaj qonqapusqanku t'antata apakuyta. Botepiña kashaspataj uj k'ata t'antayojlla rikhurerqanku. 15Jesustaj paykunata kamacherqa: Allintapuni qhawakuychej fariseospa levaduranmanta; ajinallatataj Herodespa levaduranmantapis.

16Yachachisqasnintaj ninakusharqanku: Kaytaqa nishan mana t'antata apakamusqanchejrayku.

17Jesustaj chay ninakusqankuta yachaspa, paykunaman nerqa: Imaraykutaj churanakushankichej, mana t'antaykichej kasqanraykuchu? Manarajchu yachankichej, nitajchu entiendeyta atinkichej? Rumi sonqosllarajchu kashankichej? 18Ñawisniyoj kashaspa, manachu rikunkichej? Ningrisniyoj kashaspapis, manallatajchu uyarinkichej? 19Yuyariychej imaynatachus phishqa t'antata partispa, phishqa waranqa runaman mikhuchisqayta. Mashkha canastas junt'astataj, t'anta puchojta oqharerqankichej?

Paykunataj kuticherqanku: Chunka iskayniyoj canastaspi, nispa. 20Jesús nillarqataj: Qanchis t'antata tawa waranqa runasman mikhuchisqaymanta, mashkha canastaspi junt'astataj, t'anta puchojta oqharerqankichej? Paykunataj nerqanku: Qanchis canastaspi, nispa.

21Chantá, manarajpunichu entiendeyta atinkichej?

Betsaidapi Jesús qhawarichin ciegota

22Chay qhepata, Betsaida llajtaman chayamorqanku; Jesusmantaj pusamorqanku uj ciegota, mañarqankutaj llankhaykunanta. 23Jesustaj ciegoj makinmanta jap'iykuspa llajtamanta jawaman pusarqa. Thoqayninwan ñawisninta jawiykuspataj, makisninta payman churaykuspa taporqa: Rikunkichu imallatapis?, nispa. 24Paytaj qhawarispa nerqa: Rikushani runasta sach'asta jina, puriykachashajta.

25Jesustaj, ujtawan makisninta churaykorqa runaj ñawisninman. Kay kutipitaj allinta rikorqa; ñawisnintaj thañikaporqanku; tukuy imatataj sut'ita rikorqa karukama. 26Jesustaj wasinman kachaporqa, nispa: Ama llajtaman yaykuychu, [nitaj pimampis kayta willaychu.]

Pedro sut'inchan Jesusmanta

(Mt 16.13-20; Lc 9.18-21)

27Chaymanta Jesús yachachisqasninwan rerqa Cesarea Filipoj ranchosninman. Ñanta rishaspataj yachachisqasninta taporqa: Runasrí pi kasqaytataj ninku?

28Paykunataj kuticherqanku: Wakinkunaqa ninku Juan Bautista kasqaykita, wajkunataj Elías kasqaykita, wakinkunataj mayqen profetachá, ninku. 29Paykunatataj taporqa: Qankunarí pi kasqaytataj nishankichej?

Pedrotaj kutichispa nerqa: Qanqa Cristo kanki.

30Jesustaj yachachisqasninta kamacherqa amapuni pimampis ni imata paymanta ninankuta.

Jesús willan wañunanmanta

(Mt 16.21-28; Lc 9.22-27)

31Chaymantataj yachachisqasninman yachachiyta qallarerqa Runaj Churin maytapuni ñak'arinanta; kuraj runas, kuraj sacerdotes, leymanta yachachejkuna ima qhesachanankuta; chaymantataj payta wañuchinankuta, kinsa p'unchaymantataj kausarimpunanta. 32Ajina sut'ita paykunaman willarqa; Pedrotajrí Jesusta wajnejman pusaspa k'amerqa. 33Jesustaj yachachisqasninman kutirispa, Pedrota k'amerqa: Riy kaymanta, Satanás! Qanqa mana Diospa munaynintachu yuyanki, manachayqa runaspa munaynillanta.

34Chaymantataj runasta, yachachisqasnintawan wajyaspa nerqa: Pillapis qhepayta jamuyta munaspaqa, pay kikinmanta qonqapuchun. Chaymantataj cruzninta oqharispa qhepayta jamuchun. 35Pillapis salvakuyta munajqa, kausayninta chinkachenqa. Noqarayku, evangelioraykutaj kausayninta chinkachejtaj, salvasqa kanqa. 36Ima allintaj runapaj kanman, sichus mundoj tukuy kapuyninta jap'ikapunman, almantataj chinkachinman chayqa? 37Imatataj runaqa qonman almanmanta? 38Pillapis kunan tiempo qhenchachakoj juchasapa runa, noqamanta, palabrasniymantawan p'enqakunman chayqa, paymantapis Runaj Churenqa p'enqakullanqataj, Dios tatampa jatun k'anchaynimpi, ajllasqa angelesninwan jamojtin.

Currently Selected:

SAN MARCOS 8: QCHSB

Highlight

Copy

Compare